കാളിയന്റെ വിടര്ന്ന ഫണത്തിന്റെ ദര്പ്പത്തിന്മേല് ആഹ്ലാദനൃത്തമാടുന്ന കാര്വര്ണ്ണന്റെ രൂപമാണ് ആ പോസ്റ്റര് മനസ്സിലേക്കുകൊണ്ടുവന്നത്. മഹിഷാസുരമര്ദ്ദിനിയായ ദുര്ഗ്ഗയുടെ കരാളരൂപമല്ല, ഇരയുടെ എല്ലാ രൌദ്രത്തേയും തൃണവത്ഗണിച്ച് ആനന്ദനടനമാടുന്ന ലീലാലോലുപനായ കൃഷ്ണന്റെ സ്ത്രൈണപ്രതിരൂപം. ടുണീഷ്യയില് നിന്നുപടര്ന്ന മുല്ലപ്പൂമണം അറബ് ലോകത്തുവിരിയിച്ച വസന്തത്തിന്റെ പുഷ്പമേളയെങ്കിലുമാവാന് വെമ്പിയ അമേരിക്കന് യുവത്വത്തിലെ എണ്ണിപ്പെറുക്കാവുന്ന വാടാമുല്ലകളുടെ ഗന്ധരഹിതമായ ദുര്ബലപ്രതിഷേധത്തിനുവേണ്ടി തയ്യാറാക്കപ്പെട്ട, ക്രുദ്ധനായ ഓഹരിക്കാളയുടെ പൂഞ്ചിയില് കാല്ച്ചവിട്ടി നൃത്തമാടുന്ന ഓപ്പറേക്കാരിയുടെ രൂപം. Occupy Wall Street എന്ന പരാജയപ്പെട്ടുകൊണ്ടിരിക്കുന്ന പ്രസ്ഥാനത്തിന്റെ പരസ്യ പോസ്റ്റര്.
സോഷ്യല് വെബ്സൈറ്റുകളിലൂടെ ആരംഭിച്ച്, പിന്നീട് ഭരണകൂടങ്ങളെ ദുര്ബലപ്പെടുത്തുകയും ഭരണമാറ്റങ്ങള്ക്കു കാരണമാവുകയും ചെയ്യുകവഴി ലോകശ്രദ്ധ ആകര്ഷിച്ച അറബ് വസന്തത്തില് നിന്നും ആവേശം പൂണ്ടാണ് വാള്സ്ട്രീറ്റ് കീഴടക്കല് (Occupy Wall Street) പ്രസ്ഥാനത്തിന്റെ തുടക്കം. ഉപഭോഗത്വരയുടെ സംസ്കാരം ശക്തീകരിക്കുന്നത് പരസ്യങ്ങളായതിനാല് അവയെ എതിര്ക്കുവാന് രൂപീകരിക്കപ്പെട്ട, പരിസ്ഥിതി അടക്കമുള്ള സാമൂഹിക പ്രശ്നങ്ങളില് ശക്തമായ നിലപാടുള്ള, കാനഡയിലെ ബ്രിട്ടീഷ് കൊളംബിയയില് ആസ്ഥാനമുറപ്പിച്ച, അഖില ലോക ആര്ട്ടിസ്റ്റുകളുടെയും ആക്റ്റിവിസ്റ്റുകളുടെയും എഴുത്തുകാരുടെയും വിദ്യാര്ത്ഥികളുടെയും അദ്ധ്യാപകരുടെയും ഒക്കെ പ്രസ്ഥാനമായ, ആഡ്ബസ്റ്റേഴ്സ് മീഡിയ ഫൌണ്ടേഷന് സോഷ്യല് വെബ്സൈറ്റിലൂടെ നടത്തിയ ഒരു ആഹ്വാനമാണ് വാള്സ്ട്രീറ്റ് കീഴടക്കല് പ്രസ്ഥാനമായി മാറിയത്.
വളരെ ആവേശകരമായ പ്രതികരണം സോഷ്യല് വെബ്സൈറ്റുകളിലൂടെ നേടുകയും പതിനായിരക്കണക്കിന് ആളുകളുടെ പിന്തുണ നേടിയെടുക്കയും ചെയ്ത വാള്സ്ട്രീറ്റ് കീഴടക്കല് പ്രസ്ഥാനം കടന്നുപോയ സെപ്റ്റംബര് 17ന് വാള്സ്ട്രീറ്റിനു സമീപം നടന്ന പ്രകടനത്തോടെ സ്ഥാപിതമായി. ലോകത്തിന്റെ തന്നെ സാമ്പത്തിക തലസ്ഥാനം എന്നു വിശേഷിപ്പിക്കാവുന്ന മാന്ഹാട്ടണ് പട്ടണത്തിന്റെ “ലോവര് മാന്ഹാട്ടന്“ എന്ന് അറിയപ്പെടുന്ന സ്ഥലത്തെ “സുക്കോട്ടി” പാര്ക്കില് ന്യൂയോര്ക്ക് സ്റ്റോക് എക്സ്ചേഞ്ചിന് നൂറുവാരമാറി, വാള്സ്ട്രീറ്റിലേക്ക് ഒരു കല്ലെറിഞ്ഞാല് എത്താന് മാത്രം ദൂരത്തില് ഈ പ്രസ്ഥാനം നടന്നുകൊണ്ടിരിക്കുന്നു!
"തോരിന് കാരിസ്റ്റൊ" എന്ന വക്താവിന്റെ വാക്കുകളില് അറബ് വസന്തത്തില് അവേശംകൊണ്ട “ആഡ്ബസ്റ്റേഴ്സ്” ആഹ്വാനം നല്കി യുവജനതയെ അമേരിക്കയുടെ എല്ലാ കോണില് നിന്നും “ലോവര് മാന്ഹട്ടനിലേക്ക്” നയിച്ചിട്ട് പിന്വാങ്ങുകയുണ്ടായി! അങ്ങനെ തുടങ്ങും മുമ്പുതന്നെ ഒരു വലിയ തകര്ച്ചയെ നേരിട്ട “വാള്സ്ട്രീറ്റ് കീഴടക്കല്” പ്രസ്ഥാനം ഒരു സംഘടനയല്ല. സ്വയം അര്പ്പിച്ച് എത്തിയ യുവതീയുവാക്കള് മാത്രമാണവര്.
ഡച്ച് അധിനിവേശ ശക്തികള് നിര്മ്മിച്ച ന്യൂ ആംസ്റ്റര്ഡാം എന്ന പട്ടണമാണ് പിന്നീട് ബ്രിട്ടീഷ് കൊളോണിയല് ഭരണത്തിന് കീഴില് ന്യൂ യോര്ക്ക് എന്നു പേരുമാറുന്നത്. തമിഴ്നാട്ടിലെ സേലത്ത് ഈയടുത്തു തകര്ന്നുവീണ ജാതിമതില് പോലെ തീണ്ടായ്മയുടെ ഒരു വന്മതില് ആ പട്ടണത്തില് ഉയര്ന്നുനിന്നു. തദ്ദേശീയരായ റെഡ് ഇന്ത്യക്കാരില്നിന്നും നഗരത്തെ 'സംരക്ഷിക്കാന്' അധിനിവേശക്കാര് പണിതതായിരുന്നു, പില്ക്കാലത്ത് “വാള് സ്ട്രീറ്റ്” എന്നപേരിന് കാരണഭൂതമായ ആ വിവേചനത്തിന്റെ പെരുങ്കോട്ട. ആ മതില്നിന്ന തെരുവിലാണ് ഓഹരിക്കമ്പോളത്തിന്റെ ആറപ്പേവിളികളുയര്ന്നത്. സ്ഥലത്തിന്റെ യഥാര്ത്ഥ ഉടമകളായ ആദിവാസികളില്നിന്ന് പിടിച്ചെടുത്ത അക്കല്ദാമയാണ് അമേരിക്കയെ ഇന്നുകാണുന്ന എല്ലാ സാമ്പത്തിക അനീതിയുടെയും അത്യാഗ്രഹത്തിന്റെയും പ്രഭവകേന്ദ്രമാക്കി മാറ്റിയത്.
തോരിന് കാരിസ്റ്റൊയുടെ വാക്കുകളില് ഈ അനീതിയോടൂള്ള അദ്ദേഹത്തിന്റെയും കൂട്ടാളികളുടെയും എതിര്പ്പ് പ്രകടമാണ്. അത്യാര്ത്തിക്കും കോര്പ്പറേറ്റ് സ്വാധീനത്തിനും സാമൂഹിക അനീതികള്ക്കും മുതലാളിത്തത്തിന്റെ മറ്റെല്ലാ ദുഷിപ്പുകള്ക്കുമെതിരെ പ്രകടനപരതയോ നേതൃത്വമോ രൂപരേഖയോ കൂടാതെ ഒത്തുകൂടിയ ജനമാണ് “വാള്സ്ട്രീറ്റ് പിടിച്ചെടുക്കല്” പ്രസ്ഥാനം.
അദ്ദേഹം പറയുന്നു, വാള്സ്ട്രീറ്റിനു അക്കൌണ്ടബിലിറ്റി വേണം, മനുഷ്യാവകാശങ്ങള്ക്ക് ലാഭത്തിനു മുകളില് സ്ഥാനം നല്കണം! ലാഭം എന്ന ദുരയ്ക്കല്ല സമൂഹം ഊന്നല് നല്കേണ്ടത്, മറിച്ച് മാനവനാണ്! വാള്സ്ട്രീറ്റിനുവേണ്ടിയല്ല മാനവകുലം നിലനില്ക്കേണ്ടത് മറിച്ച് മാനവകുലത്തിനുവേണ്ടിയാണ് വാള്സ്ട്രീറ്റ് നിലനില്ക്കേണ്ടത്!
വാള്സ്ട്രീറ്റിന്റെ ലാഭദുരക്ക് മുന്നില് അമേരിക്കന് സമൂഹത്തിന് പലതും നഷ്ടപ്പെടുന്നു. തങ്ങളുടെ ജീവിക്കുവാനുള്ള അവകാശം പോലും ചോദ്യചിഹ്നമായി മാറിയിരിക്കുന്നു. അമേരിക്ക എന്ന രാഷ്ട്രവും, അമേരിക്കന് ജനതയും നിലനില്ക്കുന്നതിനാലാണ് വാള്സ്ട്രീറ്റ് എന്ന സാമ്പത്തിക കേന്ദ്രം ഉണ്ടായത്. അതിനാല് അടിസ്ഥാനപരമായി വാള്സ്ട്രീറ്റ് അമേരിക്കന് ജനതയോട് തങ്ങളുടെ വളര്ച്ചക്ക് കടപ്പെട്ടിരിക്കുന്നു. സാമ്പത്തിക അത്യാര്ത്തിക്ക് വാള്സ്ട്രീറ്റിനെ വിട്ടുകൊടുക്കുകയല്ല വേണ്ടത്. അതിനെ സാമൂഹിക നന്മക്ക് ഉതകുന്ന രീതിയില് ഉടച്ചുവാര്ക്കണം.
ഈ രാജ്യത്തിന്റെ വളര്ച്ചക്കും പുരോഗതിക്കും ഒരു തടസ്സമാണ് ഇന്ന് വാള്സ്ട്രീറ്റ്. സുതാര്യ, ജനാധിപത്യ സമൂഹം എന്ന അമേരിക്കന് സങ്കല്പം തന്നെ വാള്സ്ട്രീറ്റിന്റെ അത്യാര്ത്തിക്കുമുന്നില് കീഴടങ്ങിയിരിക്കുകയാണ്. അമേരിക്കന് യുവത്വത്തിന്റെ ഭാവി തുലാസ്സില് ആടുന്നു, പ്രതീക്ഷകള് മങ്ങുന്നു, അമേരിക്കന് ആദിവാസി സമൂഹത്തിനും അധിനിവേശ ശക്തികള്ക്കും ഇടയില് കെട്ടിപ്പടുക്കപ്പെട്ട ആപഴയ മതില് ഇന്ന് അമേരിക്കന് സമൂഹത്തിനും കോര്പ്പറേറ്റ് അത്യാര്ത്തിക്കും ഇടയിലെ ഒരു പുതിയ മതിലായി രൂപപ്പെടുന്നു.
നിങ്ങള് എല്ലാ യുദ്ധങ്ങളിലും പങ്കെടുത്തു, നിങ്ങള് എല്ലാ മേധാവികള്ക്കുവേണ്ടിയും പണി എടുത്തു, നിങ്ങള് എല്ലാ രാജ്യങ്ങളിലും അലഞ്ഞുതിരിഞ്ഞു, നിങ്ങളുടെ അധ്വാനത്തിന്റെ പ്രതിഫലം നിങ്ങള്ക്ക് കിട്ടിയോ? വര്ത്തമാനം നിങ്ങളെ നോക്കി പുഞ്ചിരിതൂകാറുണ്ടോ? ഭാവി നിങ്ങള്ക്ക് എന്തെങ്കിലും വാഗ്ദാനം ചെയ്യുന്നുവോ? ഒരു മനുഷ്യനെപോലെ ജീവിക്കുവാനും മരിക്കുവാനും ഒരു തുണ്ടു ഭൂമി നിങ്ങള്ക്ക് കണ്ടെത്തുവാന് കഴിഞ്ഞുവോ? ഈ ചോദ്യങ്ങളില്, അതിന്റെ സന്ദേശത്തില് ആണ് നിലനില്പിനുവേണ്ടിയുള്ള ഈ സമരം.
ഞങ്ങളോടൊപ്പം അണിചേരൂ! ഞങ്ങള് ഒന്നായി സംസാരിക്കുന്നു! വാള്സ്ട്രീറ്റിലേക്കു മാര്ച്ചുചെയ്യുവാനുള്ള ഞങ്ങളുടെ തിരഞ്ഞെടുപ്പുമുതല് സ്വാതന്ത്ര്യചത്വരം കീഴ്പ്പെടുത്തുവാനുള്ള തീരുമാനംവരെ എടുക്കപ്പെട്ടത് ഒരു സമന്വയത്തില് അടിസ്ഥാനപ്പെട്ടുള്ള പ്രക്രിയയിലൂടെയാണ്. ഇവിടെ കടന്നുവന്ന് ഈ വാള്സ്ട്രീറ്റ് കീഴക്കല് കൂട്ടായ്മയായി മാറിയവര്ക്കായി എടുക്കപ്പെട്ട തീരുമാനം!
സമരരംഗത്തുള്ളവര് മുന്നോട്ടുവയ്ക്കുന്ന സമര പത്രികയില് പല സമകാലിക രാഷ്ട്രീയ, സാമൂഹിക പ്രശ്നങ്ങളും ഉള്പ്പെടുത്തി ആവശ്യമായ മാറ്റങ്ങള്ക്ക് ഇടം നല്കുന്നു. സമരപത്രികയിലെ ആവശ്യങ്ങള് പരിശോധിച്ചാല് അക്കാര്യം വ്യക്തമാവും:
- ജോര്ജ്ജിയ സംസ്ഥാനത്ത് നിരപരാധി എന്ന് സംശയിക്കുന്ന ട്രോയ് ഡേവീസിനെ വധശിക്ഷക്കു വിധിക്കയും ശിക്ഷിക്കയും ചെയ്തു. വധശിക്ഷ നിര്ത്തലാക്കുക!
- സമ്പന്നരായ നാനൂറ് അമേരിക്കക്കാര് അമേരിക്കന് ജനസംഖ്യയുടെ പകുതിയിലധികത്തിന്റെ സമ്പത്തിനെക്കാള് അധികം കൈവശം വച്ചിരിക്കുന്നു – സാമ്പത്തിക അസമത്വം അവസാനിപ്പിക്കുക!
- ഈ പ്രക്ഷോഭത്തില് പങ്കെടുക്കുന്ന പല പ്രവര്ത്തകരെയും അനാവശ്യകാരണങ്ങള് പറഞ്ഞ് പോലീസ് അറസ്റ്റ് ചെയ്യുന്നു – പോലീസിന്റെ മര്ദ്ദനമുറകള് അവസാനിപ്പിക്കുക!
- യാഹു കമ്പനി ഈ സമരത്തെപ്പറ്റി അസത്യം പറയുന്നു എന്ന് ഞങ്ങള് വിശ്വസിക്കുന്നു. സമരത്തിന്റെ വെബ്സൈറ്റായ occupywallst.org യാഹൂവിന്റെ സ്പാം ഫില്ട്ടറുകളില് ഉള്പ്പെടുത്തിയിരിക്കുന്നു – കോര്പ്പറേറ്റ് സെന്സര്ഷിപ്പ് അവസാനിപ്പിക്കുക!
- അമേരിക്ക തെറ്റായ പാതയിലാണു സഞ്ചരിക്കുന്നത് എന്ന് എണ്പത് ശതമാനത്തോളം അമേരിക്കകാരും വിശ്വസിക്കുന്നു – പുകമറകള് നിറഞ്ഞ ആധുനികയുഗം അവസാനിപ്പിക്കുക!
- വെറും പതിനഞ്ച് ശതമാനം അമേരിക്കക്കാര് മാത്രമാണ് അമേരിക്കന് നിയമനിര്മ്മാണസഭ ചെയ്യുന്ന ജോലി അംഗീകരിച്ചിട്ടുള്ളത് – രാഷ്ട്രീയ അഴിമതി അവസാനിപ്പിക്കുക!
- ആറില് ഒരു അമേരിക്കക്കാരന് തൊഴില്രഹിതനാണ് – തൊഴിലില്ലായ്മ അവസാനിപ്പിക്കുക!
- ആറിലൊരു അമേരിക്കകാരന് ദാരിദ്ര്യരേഖക്കുതാഴെയാണു ജീവിക്കുന്നത് – പട്ടിണി അവസാനിപ്പിക്കുക!
- ഏകദേശം അമ്പത് മില്യണ് അമേരിക്കക്കാര് ആരോഗ്യ ഇന്ഷ്വറന്സ് ഇല്ലാത്തവരാണ് – ആരോഗ്യം ലാഭക്കൊയ്ത്തിനുപയോഗിക്കുന്നത് അവസാനിപ്പിക്കുക!
- ലോകത്തെ നൂറ്ററുപത്തഞ്ച് രാജ്യങ്ങളില് നൂറ്റിമുപ്പതിലും അമേരിക്കയ്ക്ക് പട്ടാള ക്യാമ്പുകള് ഉണ്ട് – അമേരിക്കന് സാമ്രാജ്യത്വം അവസാനിപ്പിക്കുക!
- അമേരിക്ക ലോകത്തോടു മുഴുവന് യുദ്ധത്തിലാണ് – യുദ്ധം അവസാനിപ്പിക്കുക!
ഈ ആവശ്യങ്ങള് സമര പത്രികയില് ഉള്പ്പെടുത്തിയിരിക്കുന്നു.
അടിമത്തത്തിനെതിരെയുള്ള സമരത്തിലൂടെ, കറുത്തവന്റെ അവകാശപ്പോരാട്ടങ്ങളിലൂടെ, സ്ത്രീസമത്വത്തിനുവേണ്ടിയുള്ള പ്രക്ഷോഭങ്ങളിലൂടെ, തൊഴിലാളിയുടെ എട്ടുമണിക്കൂര് തൊഴില്, എട്ടുമണിക്കൂര് വിശ്രമം, എട്ടുമണിക്കൂര് വിനോദം എന്ന ആവശ്യം നേടിയെടുക്കുവാന് നടന്ന തൊഴിലാളി സമരത്തിലൂടെ, വിയറ്റ്നാം യുദ്ധത്തിനെതിരായ പ്രക്ഷോഭത്തിലൂടെ ഒക്കെ ലോകത്തെ ആവേശം കൊള്ളിച്ച അമേരിക്കന് യുവത്വത്തിന്റെ പുത്തന് തലമുറ സമരങ്ങളെ ഭയക്കുന്നുവോ എന്ന് സംശയിക്കേണ്ടിയിരിക്കുന്നു. ലാപ്ടോപ്പും ഐഫോണും ഐപാഡും അടക്കം എല്ലാ പുത്തന് സാങ്കേതിക വിദ്യകളും ഉപയോഗപ്പെടുത്തി, ലിത്വിയം ബാറ്ററി അരക്കു കെട്ടി ഫോണ് ചാര്ജ്ജുചെയ്തുവരെ സമര രംഗത്തുവന്നിരിക്കുന്ന പുതിയ തലമുറ പ്രായോഗികമായി സമരഭൂമില് അടിപതറുന്നുവോ എന്ന് ആശങ്കപ്പെടേണ്ടിയിരിക്കുന്നു.
അണ്ണാ ഹസാരെയുടെ ദില്ലിനാടകം ഇന്ത്യന് മാദ്ധ്യമഭീമന്മാര് പരമാവധി പ്രോത്സാഹിപ്പിച്ചെങ്കില് ന്യൂ യോര്ക്കിലെ ഈ സമരത്തെ ഒരു മാദ്ധ്യമസ്ഥാപനവും കാര്യമായി ശ്രദ്ധിക്കുന്നില്ല. എന്നാല് ലൈവ് വെബ് കാസ്റ്റിങ്ങിലൂടെ ഈ സമരദൃശ്യങ്ങള് ലോകംമുഴുവന് കാണുന്നു. ട്വിറ്ററിലും ഫ്ലിക്കറിലുമൊക്കെ അപ്ഡേറ്റുകളും ചിത്രങ്ങളും പോസ്റ്റ് ചെയ്യപ്പെടുന്നു. NYC General Assembly എന്ന നായകരഹിതക്കൂട്ടായ്മ സമരസംഘടനാപ്രവര്ത്തകരാവുന്നു. യുഎസിലെമ്പാടുമുള്ള സമരാനുകൂലികളെ തടുത്തുകൂട്ടാന് "ഒന്നിച്ചുപിടിച്ചടക്കുക" എന്ന ആഹ്വാനം മുഴങ്ങുന്നു. ജനാധിപത്യപ്രക്രിയയിലൂടെ ഉരുത്തിരിഞ്ഞെടുത്ത സമരാവശ്യങ്ങള് വെബ് സൈറ്റിലൂടെ സ്വാതന്ത്ര്യപ്രഖ്യാപനത്തിന്റെ മാനം കൈവരിക്കുന്നു.
മഴച്ചാര്ത്തിലാണ്ട ഒരു ദിനം ഈ ലേഖകന് സമരമുഖത്തുചെന്നു. സമരസഖാക്കളോടു സംസാരിച്ചു. നനവില്കുതിര്ന്ന സമരത്തിന്റെ ചിത്രങ്ങളെടുത്തു. പോസ്റ്ററില് കാണുന്ന ഉണര്വ്വ് സമരഭടന്മാര്ക്കില്ലല്ലോ എന്നു വ്യസനപ്പെട്ടു. എന്നാല് തങ്ങളുടെ പഠനവും ജോലിയും മാറ്റിവച്ച് ജീവിതാഹ്ലാദങ്ങള് തേടിപ്പോകുന്നതിനുപകരം പരാജയപ്പെട്ടുകൊണ്ടേയിരിക്കുന്നതെങ്കിലും മധുരതരമായ ഒരു പ്രക്ഷോഭത്തിന്റെ അങ്കത്തട്ടില് ഒന്നിക്കാന് അവര് കാട്ടുന്ന ഇച്ഛാശക്തിയെ ഉള്ളിലാവാഹിച്ചു. ഒന്നുമൊന്നുമാകാതെപോകുന്ന വാള്സ്ട്രീറ്റ് പിടിച്ചടക്കലില് മനസ്സുകൊണ്ടെങ്കിലും ഉന്മാദിയായ ആ നര്ത്തകിയെപ്പോലെ ഞാനും ഒഴുകിപ്പരന്നു. യുവാക്കളെ, ഇതു നിങ്ങളുടെ സമരമാണ്. വരൂ, മുഷ്ടിചുരുട്ടൂ. ആകാശത്തേക്കു ചുഴറ്റിയെറിയുന്ന മുഷ്ടിയുടെ കരുത്താകൂ... വിജയങ്ങളേക്കാള് മഹത്താണ്, ചില പരാജയങ്ങള് ...
ന്യൂ യോര്ക്കില് നിന്ന്
റെജി പി ജോര്ജ്
(വോള് സ്ട്രീറ്റ് പിടിച്ചടക്കല് പ്രക്ഷോഭത്തിന്റെ ചിത്രങ്ങള് ഇവിടെ കാണാം)
.jpg)
.jpg)
.jpg)
.JPG)
