തൊമ്മനയയുമ്പോള് ചാണ്ടി മുറുകണമെന്നതു ലോകതത്വമാണ്. ഇക്കാര്യം കണ്ഫ്യൂഷസാണോ പറഞ്ഞത് എന്ന കണ്ഫ്യൂഷന് നിലവിലുണ്ടെങ്കിലും അയച്ചിലിനും മുറുക്കത്തിനും ഏതുകാലത്തും കുറവേതും വന്നിട്ടുമില്ല. തൊമ്മന് സ്ഥലത്തില്ലാതാകുന്ന അപൂര്വം സന്ദര്ഭങ്ങളില് ഒരു പകരക്കാരനായി ഉമ്മന് അയയുകയും മുറുകുകയും ചെയ്യാം. അപ്പോഴും അപരസ്ഥാനത്ത് ചാണ്ടിതന്നെ അതേ ക്രിയകളുടെ പ്രതിക്രിയകള് ചെയ്തുകൊണ്ടിരിക്കും. പ്രതിക്രിയാവാദവും വാതകവുമൊന്നും മനസ്സിലാകാത്ത, പാര്ട്ടിക്ലാസുകളില് സജീവമായി പങ്കെടുക്കാത്ത ഉത്തമന്മാര്ക്കുപോലും ഇക്കാര്യം അറിയാം.
ആകെയൊരു ആശയക്കുഴപ്പം വരുന്നത് തൊമ്മന് സ്ഥലത്തില്ലാതിരിക്കുകയും ശേഷിക്കുന്ന ചാണ്ടിയും തൊമ്മന്റെ പകരക്കാരന് ഉമ്മനും ഒരേയാളാകുകയും ചെയ്യുന്ന ഡിലെമ സിറ്റ്വേഷനാണ്. ഇതിനെ കൈകാര്യം ചെയ്യാന് നേരത്തും ചാണ്ടിക്കു് ഊനമേതുമില്ല. ചാണ്ടി ചാണ്ടിയായോ ചണ്ടിയായോ തുടരുകതന്നെചെയ്യുമ്പോള്, തൊമ്മനും പ്രാസമൊപ്പിക്കാന് വന്ന ഉമ്മനും പകരം ചാണ്ടിക്കു പ്രാസത്തില് പ്രതിയോഗിയാകുന്ന ചെന്നിയെ പിടിക്കാവുന്നതാണ്. ചെന്നിക്കുത്ത് എന്ന അവസ്ഥയെ ഇംഗ്ലീഷില് ഡിലെമ എന്നുതന്നെ പറയാവുന്ന സ്ഥിതിക്ക് ചാണ്ടിയയമ്പോള് ചെന്നി മുറുകുകയും വൈസ് വേഴ്സയില് ശാസ്ത്രസത്യം തുടരുകയും ചെയ്യുന്ന പ്രക്രിയയ്ക്ക് ലോകം സാക്ഷ്യം വഹിക്കുന്നതില് തെറ്റൊന്നും പറയാനാകില്ല. ലോകത്തിന്റെ ഒരു കോണായ കേരളത്തില് ഈ പ്രതിഭാസം പ്രതിദിനം പ്രകടമാകുന്നത് എന്തൊരു സുന്ദരം!
ഇപ്പോഴിതാ, അഞ്ചാം മന്ത്രിക്കാര്യത്തിലും വകുപ്പുമാറ്റത്തിന്റെ കാര്യത്തിലും ഒക്കെയാണ് ചെന്നിയും ചാണ്ടിയും തമ്മില് അയയുകയും മുറുകുകയും മാറിമാറിച്ചെയ്തത്. അവസാനം മുറുകിയത് അയയുമ്പോള് അതിന്റെ ആറാട്ടെന്നു പറഞ്ഞതുപോലെ, അഞ്ചാംമന്ത്രി അസ്സലാമു അലൈക്കും പറഞ്ഞു സത്യപ്രതിജ്ഞ ചെയ്തപ്പോഴാണ് കാര്യങ്ങള്ക്കു പരിണാമഗുപ്തന്നായരുണ്ടായത്.
ലീഗ് നടത്തിയ സമ്മര്ദ്ദത്തെ തവള പാണ്ടിലോറി മറിക്കാന് നടത്തുന്ന മസിലുപിടിത്തശ്രമത്തോടുപമിക്കാമെങ്കിലും, ഇവിടെ ആയത് പാണ്ടിലോറിയുടെ അധൈര്യത്തിലാണ് കലാശിച്ചത്. അതായത്, തവളയെക്കണ്ട്, ആ മസിലുപിടിത്തം കണ്ട്, ഇനിയെങ്ങാനും ലവന് കേറി മറിച്ചിട്ടാലോ എന്നുപേടിച്ച്, പാണ്ടിലോറിയുടെ ഡ്രൈവനും ക്ലീനനുംകൂടി വണ്ടി, ഷഡന് ബ്രേക്കിട്ടുനിര്ത്തിയതുപോലായി. തവളയ്ക്കാണെങ്കില് കിട്ടിയതു ഷോഡതി! ഇനിമേല് ലോറി മറിച്ച തവള എന്ന് ആയവന് അറിയപ്പെടും.
ഇതൊക്കെക്കഴിഞ്ഞിട്ടിപ്പോള് ചാണ്ടി അയഞ്ഞുതൂങ്ങിയിരിക്കുമ്പോള് ഇനി മുറുകിയിട്ടുകാര്യമില്ലെന്നു മനസ്സിലായിട്ടോ എന്തോ ചെന്നിയും അയയുകയാണ്. അതായത് അയച്ചിലിന്റെ ഒരു അയ്യരുകളി! ചെന്നി പറയുന്നത് ചാണ്ടിയൊറ്റയ്ക്ക് നടത്തിയ അബദ്ധമല്ല അഞ്ചാംമന്ത്രി എന്നാണ്. അബദ്ധമാണെന്നത് അവിതര്ക്കിതമെങ്കിലും ആയതു ചെയ്തതില് മുഖ്യപ്രതി ചാണ്ടിക്കെന്നപോലെ പ്രതിമുഖ്യനായ തനിക്കും പങ്കുണ്ടെന്നാണ് അദ്ദേഹം പറയുന്നത്. അഞ്ചാംമന്ത്രിക്കാര്യത്തില് താനും ചാണ്ടിയും തമ്മില് ആശയവിനിമയത്തില് നേരിയ പാളിച്ചകളുണ്ടായിട്ടുണ്ടെന്നും ആയതിനാല് രണ്ടാളും കുറ്റക്കാരാണെന്നുമാണ് അദ്ദേഹം ചാനലില് ചര്വണം ചെയ്തത്.
അതായത്, അഞ്ചാംമന്ത്രിയെ അനുവദിക്കുകയല്ല നാം ചെയ്യേണ്ടത് എന്നാണ് താന് ചാണ്ടിയോടു പറയാനുദ്ദേശിച്ചത്. എന്നാല് പറഞ്ഞുപോയത് അല്ല എന്നതിനു പകരം അല്ലി എന്നായിപ്പോയി. അപ്പോള് തന്റെ മുറുക്കം കണ്ട് പൊടുന്നനെ അയഞ്ഞ ചാണ്ടി കേട്ടത് അല്ലിയെന്നതിനുപകരം അലി എന്നായിപ്പോയി. അതായത്, തനിക്കു പറ്റിയ നാക്കുപിഴയും ചാണ്ടിക്കുപറ്റിയ കേക്കുപിഴയും ചേര്ന്നപ്പോള് അല്ലയെന്നത് അല്ലിയും ക്രമേണ അലിയുമായി. അല്ലു എന്നാണു ചാണ്ടി കേട്ടിരുന്നതെങ്കില് ഇപ്പോള് അലിക്കു പകരം തെലുഗുതാരം അല്ലു അര്ജുന് കേരള മന്ത്രിസഭയിലിരുന്നിരുന്നേനേ! പാവം, കൊടുത്തുവച്ചില്ല.
ഏതായാലും തെറ്റു തന്റേതുകൂടിയായതിനാല് പാവം ചാണ്ടിയെ മാത്രം ആരും കുരിശേറ്റുകയോ മരത്തില്കെട്ടിയിടുകയോ ഒന്നും വേണ്ട. താനാണു തെറ്റുകാരന്. അതുകൊണ്ടു താന്തന്നെ പറയുന്നു - ലേലു അല്ലു... ലേലു അല്ലു... ലേലു അല്ലു... ചാണ്ടിയെ അഴിച്ചുവിട്...
.jpg)
.jpg)
.jpg)
.jpg)
