പരിഹാസം

വനം സിനിമാ മന്ത്രി ഗണേശ് കുമാറും അദ്ദേഹത്തിന്റെ പിതാവ് ആര്‍ ബാലകൃഷ്ണപിള്ളയും തമ്മില്‍ അത്ര നല്ല സ്വരച്ചേര്‍ച്ചയിലല്ല എന്നു നമുക്കൊക്കെ അറിയാം. സ്വരം നന്നായിരിക്കുമ്പോഴാണു പാട്ടുനിര്‍ത്തേണ്ടത്, അല്ലാതെ സ്വരച്ചേര്‍ച്ചയില്ലായ്മ നന്നായിരിക്കുമ്പോഴല്ല എന്നറിയാവുന്നതുകൊണ്ടാണ് പിള്ള എത്ര കൈകാലിട്ടടിച്ചിട്ടും പുള്ള മന്ത്രിസ്ഥാനം വിട്ടുമാറാന്‍ തയ്യാറാകാത്തത്. വിട്ടുമാറാത്ത ചുമ പോലെയൊന്നാണ് ഈ മന്ത്രിസ്ഥാനം വിട്ടുമാറാനുള്ള മടിയും എന്നറിയാവുന്നതിനാല്‍ ചാണ്ടിച്ചന്‍ പുള്ളാച്ചന്‍ പറയുന്നതല്ല, അച്ഛന്റെ പുള്ള പറയുന്നതാണു കേള്‍ക്കുന്നത് (ചാണ്ടിച്ചനു സപ്പറു ജോറായേ എന്ന് മറവത്തൂര്‍ കനവ് എന്ന ചിത്രത്തില്‍ അന്തരിച്ച ഗാനരചയിതാവ് ഗിരീഷ് പുത്തഞ്ചേരി).

അല്ലെങ്കിലും ഈ ബോളിവുഡ് താരങ്ങള്‍ എന്നും എല്ലാവര്‍ക്കും മാതൃകയാണ്. അവര്‍ ചെയ്യുന്ന ഓരോ കാര്യങ്ങളും അനുകരിക്കാന്‍ നമ്മള്‍ തയ്യാറാകുകയാണെങ്കില്‍ ഈ ലോകം എത്ര സുന്ദരമായിത്തീരുമെന്നതു പ്രവചിക്കാനാവില്ല. പിന്നെ, അവര്‍ ചെയ്യുന്നതു പലതും നാം മനസ്സിലാക്കുന്നില്ലെന്നുമാത്രം. കാരണം, സൂഫികളെയും യോഗികളെയും പോലെ വിചിത്രമായ രീതിയിലാണ് അവരതു ചെയ്യുന്നത്.

ടിപി ചന്ദ്രശേഖരന്റെ മരണത്തില്‍, അല്ല, കൊലയില്‍ ഇവിടെ ഒരൊറ്റ എഴുത്തുകാരനും വേണ്ടും വണ്ണം പ്രതികരിച്ചില്ലെന്നും ഇതൊക്കെ മിണ്ടാനുള്ള ധൈര്യക്കുറവു കൊണ്ടുമാത്രമല്ലെന്നും അധികാരസ്ഥാപനങ്ങളിലേക്കുള്ള സാദ്ധ്യതകള്‍ അടഞ്ഞുപോകാതിരിക്കാനുള്ള പോംവഴിയായിട്ടാണെന്നും ഈയിടെ സി ആര്‍ പരമേശ്വരന്‍ പറഞ്ഞിരുന്നു. പറഞ്ഞദ്ദേഹം വാക്കു നായില്‍, സോറി, നാക്കു വായിലിട്ടില്ല, കുറേയധികം എഴുത്തുകാര്‍ പ്രസ്താവനയുമായി ചാടിവീണിട്ടുണ്ട്.

സംസ്ഥാനത്തെ മാലിന്യ സംസ്കരണം കാര്യക്ഷമം ആക്കണമെന്ന് ആഹ്വാനം ചെയ്തുകൊണ്ട് മുഖ്യന്‍ ഫേസ്ബുക്കില്‍ 'സ്റ്റാറ്റസ്' നല്‍കിയിരിക്കുന്നു. സ്ഥലപരിമിതിമൂലം കാര്യങ്ങള്‍ വ്യക്തമാക്കാന്‍ അദ്ദേഹത്തിനു സാധിക്കാത്തതിനാല്‍ അല്പം സഹായിക്കുന്നു.

റെവല്യൂഷണറി മാര്‍ക്സിസ്റ്റു പാര്‍ട്ടിയുടെ നേതാവും സിപിഎമ്മില്‍നിന്നു രാജിവച്ച വിമതസ്വരത്തിന്റെ കാര്‍ക്കശ്യവുമായിരുന്ന ടിപി ചന്ദ്രശേഖരന്‍ കൊല്ലപ്പെട്ടു. ആ കൊലപാതകം കേരളത്തില്‍ ആര്‍ക്കൊക്കെയോ സന്തോഷമാകുകയാണ്. അവരില്‍ നെയ്യാറ്റിന്‍കരയില്‍ നിന്നു രാജിവച്ച്, പാര്‍ട്ടി മാറി, വീണ്ടും ഉപതെരഞ്ഞെടുപ്പില്‍ മത്സരിക്കാന്‍ പോകുന്ന ശെല്‍വരാജ് മുതല്‍ നുണപരിശോധനയന്ത്രത്തെപ്പോലും ഇക്കാര്യത്തില്‍ വെല്ലുവിളിക്കുന്ന ചീഫ് വിപ്പ് പിസി ജോര്‍ജു വരെയുണ്ട്.

പ്രസിഡന്റ് എന്ന പദത്തില്‍ത്തന്നെ പ്ര കിടന്നങ്ങനെ പ്രകാശിക്കുകയാണ്. പിന്നെ, പ്രസിഡന്റാകുന്നയാളില്‍ പ്ര ഇല്ലെങ്കിലോ? ഇല്ലെങ്കിലും ഒരു പ്രാക്കും വരാനില്ല. എന്നാലും പ്രായും കൂടിയുണ്ടെങ്കില്‍ ഒരു പ്രകമ്പനമാകും. പ്രാസത്തിനു പ്രകാരഭംഗിയുണ്ടെന്നു പ്രതിഷ്ഠാപിച്ച പ്രതിഭാധനന്മാരായ കവികളുടെ നാടാണു നമ്മുടെയീ ആര്‍ഷന്‍. ആര്‍ഷന്‍ ലോപിച്ചാണ് അതിനു പിന്നീടു പല വേര്‍ഷനുമുണ്ടായത്.

തൊമ്മനയയുമ്പോള്‍ ചാണ്ടി മുറുകണമെന്നതു ലോകതത്വമാണ്. ഇക്കാര്യം കണ്‍ഫ്യൂഷസാണോ പറഞ്ഞത് എന്ന കണ്‍ഫ്യൂഷന്‍ നിലവിലുണ്ടെങ്കിലും അയച്ചിലിനും മുറുക്കത്തിനും ഏതുകാലത്തും കുറവേതും വന്നിട്ടുമില്ല. തൊമ്മന്‍ സ്ഥലത്തില്ലാതാകുന്ന അപൂര്‍വം സന്ദര്‍ഭങ്ങളില്‍ ഒരു പകരക്കാരനായി ഉമ്മന് അയയുകയും മുറുകുകയും ചെയ്യാം. അപ്പോഴും അപരസ്ഥാനത്ത് ചാണ്ടിതന്നെ അതേ ക്രിയകളുടെ പ്രതിക്രിയകള്‍ ചെയ്തുകൊണ്ടിരിക്കും. പ്രതിക്രിയാവാദവും വാതകവുമൊന്നും മനസ്സിലാകാത്ത, പാര്‍ട്ടിക്ലാസുകളില്‍ സജീവമായി പങ്കെടുക്കാത്ത ഉത്തമന്മാര്‍ക്കുപോലും ഇക്കാര്യം അറിയാം.

കൂടുവിട്ടുകൂടുമാറുന്നത്ര പ്രയാസമില്ല മുന്നണിവിട്ടു മുന്നണിമാറാന്‍. വേണമെങ്കില്‍ അയ്യഞ്ചുകൊല്ലം കൂടുമ്പോള്‍ മുന്നണികളില്‍നിന്ന് ഉറയുരിഞ്ഞ് അടുത്ത മുന്നണിയിലേക്കു കടക്കുകയും വേണമെങ്കില്‍ കുറച്ച് തടിക്കുകയും ചെയ്യാവുന്നതാണ്. ഇങ്ങനെ പാട്ടുംപാടി കടന്നവനും തൊപ്പിയിട്ടു കടന്നവനുമൊക്കെ ഇപ്പോള്‍ നമ്മുടെ മുന്നിലുണ്ടുതാനും.

രാജ്യസഭയിലേക്ക് കയറുന്ന സച്ചിന്‍ നൂറ് തികച്ചിട്ടാണെത്തുന്നതെങ്കില്‍ രാഷ്‌ട്രപതിഭവനില്‍ നിന്നു പ്രതിഭ പാട്ടീല്‍ പടിയിറങ്ങുന്നത് ഇരുന്നൂറ് തികച്ചുകൊണ്ടാണ്. ഇരുന്നൂറ് കോടിയിലധികം രൂപ ചെലവഴിച്ചുകൊണ്ടുള്ള ഇരുപതിലധികം വിദേശയാത്രകളാണ് പ്രതിഭാജി അഞ്ച് വര്‍ഷത്തിനിടെ നടത്തിയത്. ഒറ്റയ്ക്ക് യാത്ര ചെയ്യാനുള്ള പേടി മൂലം സകുടുംബമായിരുന്നു യാത്രകളെല്ലാം. സകുടുംബമെന്നാല്‍ ഭര്‍ത്താവും മക്കളുമാണെന്ന് തെറ്റിധരിക്കരുതേ. അമ്മാവന്മാരും അമ്മായിമാരും മക്കളും മരുമക്കളും ചേട്ടന്മാരും ചേച്ചിമാരും അവരുടെ മക്കളും മരുമക്കളും കൊച്ചുമക്കളും അങ്ങനെയങ്ങനെ ഒരു നീണ്ട നിര തന്നെ പലപ്പോഴുമുണ്ടാവും. ഒരു വിധത്തില്‍ പറഞ്ഞാല്‍ എല്ലാ രാജ്യങ്ങളിലും ചെറിയ തോതില്‍ ഒരു കുടുംബസംഗമം തന്നെ നടത്തി.

മാദ്ധ്യമങ്ങളില്‍ എക്കാലവും ആളുകളെ രസപ്പിച്ചിട്ടുള്ളൊരു പംക്തിയാണ് ഉരുളയ്ക്കുപ്പേരി സ്വഭാവമുള്ള വാക്പയറ്റുകള്‍. എല്ലാ പത്രങ്ങളും അത്തരം പംക്തികള്‍ മുടങ്ങാതെ വര്‍ഷങ്ങളായി നല്‍കിവരുന്നു. അച്ചടിമാദ്ധ്യമങ്ങള്‍ക്കാണ് ഇത്തരം വാക്പയറ്റുകള്‍ക്ക് വളരെ സാദ്ധ്യതയുള്ളത്. പ്രമുഖരുടെ വാക്പോയിന്റുകള്‍ എടുത്തെഴുതി, അവയിലെ വീക്കപോയിന്റുകള്‍ കുത്തിപ്പുറത്തുചാടിക്കുന്ന വിധത്തിലുള്ള മറുമൊഴികള്‍ ചേര്‍ത്ത് പ്രസിദ്ധീകരിക്കുന്നതും പതിവുകാഴ്ച. ചാനലുകള്‍ പോലും പോളിട്രിക്സ് പോലെയും സാക്ഷി പോലെയുമുള്ള പരിപാടികളിലൂടെ ഇത്തരം നര്‍മഅമ്പുകളെയ്യുന്നുണ്ട്.

വളരെ നീണ്ട ഒരു ലേഖനത്തേക്കാളോ വിശകലനക്കുറിപ്പിനേക്കാളോ ചിലപ്പോള്‍ അര്‍ത്ഥഗര്‍ഭവും സൂക്ഷ്മവുമാകാറുമുണ്ട് ഇത്തരം ഒളിയമ്പുകള്‍. ഇവിടെ സമാനമായ ഒരു പംക്തി തുടങ്ങുന്നു.

മലയാളത്തില്‍ ഇന്നുവരെ വന്നിട്ടുള്ള ഇത്തരം പംക്തികളില്‍ ഏറ്റവും രസകമായിരുന്ന ഒന്നാണ് മാതൃഭൂമി ആഴ്ചപ്പതിപ്പില്‍ ചിത്രകാരന്‍ എഎസ് വരച്ചെഴുതിയിരുന്ന അകവും പുറവും. അദ്ദേഹത്തോടുള്ള ആദരം കൂടി മുന്‍നിര്‍ത്തി ഈ പംക്തിക്ക് ആ പേരിടുകയാണ്.

Tuesday, May 22, 2012