അപകടം | Malayal.am

കൊല്‍ക്കത്തയില്‍ സ്വകാര്യ ആശുപത്രിയില്‍ തീപ്പിടിത്തമുണ്ടായി, രണ്ടു മലയാളി നഴ്സുമാരടക്കം തൊണ്ണൂറുപേര്‍ മരിച്ചു. വന്‍കിട സ്വകാര്യ ആസ്പത്രിയായ, തെക്കന്‍ കൊല്‍ക്കത്തയിലെ, ധകുരിയയിലുള്ള എ.എം.ആര്‍.ഐ. ഹോസ്പിറ്റലിലാണ് വന്‍തീപ്പിടിത്തമുണ്ടായത്. തീവ്രപരിചരണവിഭാഗത്തിലാണ് തീപ്പിടിത്തമുണ്ടായത്. മരിച്ചവരിലേറെയും ഇവിടെ ചികിത്സയിലിരുന്ന രോഗികളാണ്.

ഝാര്‍ഖണ്ഡില്‍ ഓടുന്ന തീവണ്ടിക്ക് തീപ്പിടിച്ച് ഏഴുപേര്‍ മരിച്ചു. ഹൗറ-ഡെറാഡൂണ്‍ എക്സ്‌പ്രസ് തീവണ്ടിയുടെ എ.സി.കോച്ചുകളില്‍ രണ്ടെണ്ണത്തിലാണ് തീപ്പിടിത്തമുണ്ടായത്. രണ്ടു കുട്ടികളുള്‍പ്പെടെയാണ് ഏഴുമരണം.

മന്ത്രി കെ.സി. ജോസവിന്റെ കാറിടിച്ച്, വഴി മുറിച്ചുകടക്കുകയായിരുന്ന രണ്ടുപേര്‍ മരിച്ചു. മറ്റൊരാള്‍ക്ക് പരിക്കേറ്റു. അങ്കമാലി കരയാംപറമ്പില്‍ വെച്ചാണു സംഭവം. കരയാംപറമ്പില്‍ കണ്ടനാട് വീട്ടില്‍ സുന്ദരേശന്‍മേനോന്‍ (55), പെരുമ്പാവൂര്‍ കുറുപ്പംപടി കൂട്ടുമഠം മാണിയേലി വീട്ടില്‍ വിജയന്‍ (50) എന്നിവരാണ് മരിച്ചത്. കൂടെയുണ്ടായിരുന്ന കോട്ടയം മുരിങ്ങാത്തറ വീട്ടില്‍ തോമസ് എബ്രഹാ (50) മിനെ പരിക്കുകളോടെ ആശുപത്രിയില്‍ പ്രവേശിപ്പിച്ചു. മൂന്നാളും നിര്‍മാണത്തൊഴിലാളികളാണ്.

ദല്‍ഹിയില്‍ ഹിജഡകളുടെ സമ്മേളനത്തിനിടെ വന്‍തീപ്പിടിത്തം. സംഭവത്തില്‍ 15 പേര്‍ മരിച്ചു. കിഴക്കന്‍ ഡല്‍ഹിയിലെ നന്ദ്‌നഗരിയില്‍ ആണു് ദുരന്തം അരങ്ങേറിയത്. മരണം ഇനിയും കൂടിയേക്കാമെന്നതാണ് ആദ്യറിപ്പോര്‍ട്ടുകള്‍. അന്‍പതിനും നൂറിനുമിടയില്‍ ആളുകള്‍ക്ക് സാരമായ പൊള്ളലേറ്റിട്ടുണ്ട്.

വടക്കുകിഴക്കന്‍ സംസ്ഥാനങ്ങളായ അസം, മണിപ്പൂര്‍, നാഗാലാന്‍ഡ് എന്നിവടങ്ങളില്‍ സാമാന്യം തീവ്രമായ ഭൂമികുലുക്കം. ഇന്ത്യയുടെ വടക്കുകിഴക്കന്‍ അയല്‍രാജ്യങ്ങളായ മ്യാന്‍മാര്‍, ബംഗ്ലാദേശ് എന്നിവിടങ്ങളിലും ഭൂചലനം ആശങ്ക പരത്തി. റിക്ടര്‍ സ്‌കെയിലില്‍ 5.9 തീവ്രത രേഖപ്പെടുത്തിയിട്ടുണ്ട്. ആളപായമോ നാശനഷ്ടങ്ങളോ റിപ്പോര്‍ട്ട് ചെയ്തിട്ടില്ല.

കണ്ണൂരില്‍ ഐസ് പ്ളാന്റില്‍ പൊട്ടിത്തെറിയുണ്ടായി അമോണിയം വാതകം ചോര്‍ന്ന് മൂന്നുപേര്‍ മരിച്ചു. ഒരു ഡസനോളം പേര്‍ പരിക്കേറ്റ് ആശുപത്രിയിലാണ്. അസം തൊഴിലാളികളാണ് മരിച്ചത്. രക്ഷാപ്രവര്‍ത്തനത്തിനിറങ്ങിയ നാട്ടുകാരില്‍ ചിലര്‍ക്കും വാതകം ശ്വസിച്ച് കടുത്ത അസ്വസ്ഥതയുണ്ടായി, ആശുപത്രിയിലായത് നാട്ടില്‍ ആശങ്ക പരത്തി.

തീര്‍ഥാടനകേന്ദ്രമായ ഹരിദ്വാറിലെ ലാല്‍ജിവാലയില്‍ യജ്ഞത്തിനിടെ വന്‍തിക്കും തിരക്കുമുണ്ടായി നടന്ന ദുരന്തത്തില്‍ 14 സ്ത്രീകളടക്കം 16 മരണം. അന്‍പതിലേറെപ്പേര്‍ക്കു പരിക്കേറ്റിട്ടുമുണ്ട്. ഉത്തരാഖണ്ഡിലുള്ള ഹരിദ്വാര്‍ ലോകപ്രശസ്തമായ ഹൈന്ദവതീര്‍ത്ഥാടനകേന്ദ്രമാണ്.

പശ്ചിമബംഗാളിലെ ഡാര്‍ജിലിങ് ജില്ലയില്‍ നടപ്പാലം തകര്‍ന്നു് 31 മരണം. നൂറിലധികം പേര്‍ പരിക്കേറ്റു ചികിത്സയിലാണ്. ശനിയാഴ്ച രാത്രിയാണ് നാടിനെ നടുക്കിയ അപകടമുണ്ടായത്. ബൈജോണ്‍ബാരി മേഖലയില്‍ നടന്ന ഗൂര്‍ഖാ ജനമുക്തി മോര്‍ച്ചയുടെ യോഗത്തിനെത്തിയവരാണ് അപകടത്തില്‍പ്പെട്ടത്. ഇന്ത്യയിലെ പ്രമുഖ വിനോദസഞ്ചാര കേന്ദ്രങ്ങളിലൊന്നാണ് ഡാര്‍ജിലിംഗ്.

പഴയ ദില്ലിയില്‍ ജുമാ മസ്‌ജിദിനടുത്ത് മൂന്നുനിലക്കെട്ടിടം തകര്‍ന്നുവീണ് അഞ്ചുമരണം. മരിച്ചവരില്‍ മൂന്നുപേര്‍ സ്‌ത്രീകളാണ്. 25 പേര്‍ക്കു പരുക്കേറ്റിട്ടുണ്ട്. കെട്ടിടാവശിഷ്‌ടങ്ങള്‍ക്കടിയില്‍ കൂടുതല്‍പേര്‍ കുടുങ്ങിക്കിടക്കുന്നുണ്ടെന്നാണു സൂചന. രക്ഷാപ്രവര്‍ത്തനം ഇപ്പോഴും നടക്കുന്നു. ഇന്നലെ രാത്രി എട്ടുമണിയോടെ ചാന്ദിനി മഹല്‍ മേഖലയിലാണ്‌ കെട്ടിടം തകര്‍ന്നത്. 70 വര്‍ഷം പഴക്കമുള്ളതായിരുന്നു കെട്ടിടം.

ഹൈദരാബാദ്: ഇന്ത്യന്‍ ക്രിക്കറ്റ് ടീം മുന്‍ ക്യാപ്റ്റനും കോണ്‍ഗ്രസ് എം പി യുമായ മുഹമ്മദ് അസ്ഹറുദ്ദീന്റെ മകന്‍ അയാസുദ്ദീന്‍(20) ബൈക്കപകടത്തില്‍ പരിക്കേറ്റതിനെത്തുടര്‍ന്ന് മരിച്ചു. തലയ്ക്ക് ഗുരുതരമായി പരിക്കേറ്റ അയാസുദ്ദീന്‍ നാല് ദിവസമായി ഹൈദരാബാദ് അപ്പോളോ ആസ്പത്രിയില്‍ വെന്റിലേറ്ററിലായിരുന്നു.

Tuesday, May 22, 2012