malayal.am

പ്രതികരണനിയമം 2012

Ananthu Vasudev — Mon, 21 May 2012 18:40:56 +0000

സോഷ്യല്‍ മീഡിയയിലെ മറ്റു സൈറ്റുകളെ അപേക്ഷിച്ച് ഫേസ്ബുക്കും ട്വിറ്ററും എത്തിയപ്പോള്‍ കണ്ട പ്രധാന വ്യത്യാസം ആര്‍ക്കും എന്തിനെതിരേയും ഏതു തരത്തിലും പ്രതികരിക്കാമെന്നതും, അത് അനേകമാളുകള്‍ തങ്ങളുടെ സ്ക്രീനിനു മുന്നില്‍ കാണുമെന്നതാണ്. ഒരു തരത്തില്‍ ഇവ രണ്ടും ആളുകളുടെ പ്രതികരണശേഷി വര്‍ധിപ്പിച്ചുവെന്നു തന്നെ പറയാം. ഇന്ത്യയില്‍, അല്ലെങ്കില്‍ കുറഞ്ഞ പക്ഷം നമ്മുടെ കേരളത്തിലെങ്കിലും കൂടുതല്‍ ജനകീയമായത് ഫേസ്ബുക്കാണ്, ട്വിറ്ററിനെ അപേക്ഷിച്ച്. പ്രമുഖ ചാനലുകളും പത്രങ്ങളും അവരുടെ വാര്‍ത്തകള്‍ ഫേസ്ബുക്കില്‍ പോസ്റ്റ് ചെയ്യാന്‍ തുടങ്ങിയതോടെ അതിലേക്ക് നേരിട്ട് ഒട്ടേറെ പ്രതികരണങ്ങളെത്തിത്തുടങ്ങി. നാമെല്ലാമുള്‍പ്പെടുന്ന സമൂഹികജീവികള്‍ക്ക് അഭിപ്രായങ്ങള്‍ പങ്കുവെയ്ക്കുവാനും രോഷം പ്രകടിപ്പിക്കുവാനുമെല്ലാം പറ്റിയ ഒരു വേദി ഉണ്ടായിരുന്നില്ലയെന്നു തന്നെ പറയാം; ഉള്ളതാവട്ടെ വളരെ ചെറിയ അവസരങ്ങള്‍ മാത്രവും. അതു പ്രയോജനപ്പെടുത്തണമെങ്കില്‍ അതിനായി മിനക്കെടേണ്ട അവസ്ഥ. മാത്രമല്ല നമ്മുടെ പ്രതികരണങ്ങള്‍ക്കുള്ള 'പ്രതികരണങ്ങള്‍' എങ്ങനെയാകുമെന്ന് പേടിയും കൂട്ടിനു.

വീടിനു പുറത്ത് വഴിയിലോ ടൗണിലോ എന്തിനു, അമേരിക്കയില്‍ നടന്ന സംഭവത്തിനായാലും ഏവര്‍ക്കും സ്വന്തം അഭിപ്രായം കാണും. എന്നാല്‍ വീട്ടില്‍ തന്നെയോ ചങ്ങാതിക്കൂട്ടത്തിലോ ആ രോഷം പ്രകടിപ്പിച്ചു തീര്‍ക്കുകയാണ് പതിവ്. അത്രയേ ഉണ്ടാവുകയുള്ളു നമ്മുടെ ചോരത്തിളപ്പ്.

പൊതുജനത്തിനു പ്രതികരിക്കാനുള്ള ആദ്യ പ്രധാന ഉപാധി പത്രങ്ങളില്‍ ആഴ്ച്ചയില്‍ ഒരു ദിവസം കിട്ടുന്ന ഒരു കാല്പേജ് ആയിരുന്നു. അതും പത്രത്തിന്റെ 'ചരിവ്' അനുസരിച്ചും, വാര്‍ത്തയുടെ പ്രാധാന്യമനുസരിച്ചും കത്രിക കയറി ഏതൊക്കെയോ വിധത്തിലേ പ്രസിദ്ധീകരിക്കൂ, പ്രസിദ്ധീകരിച്ചാലായീന്നും പറയാം, അത്രതന്നെ. പിന്നെ പേപ്പറില്‍ എഴുതി സ്റ്റാമ്പൊട്ടിച്ച് പോസ്റ്റ് ചെയ്യുന്ന കാര്യമോര്‍ക്കുമ്പോള്‍ അധികമാളുകളുടെയും ചോര തണുക്കും.

പിന്നെപ്പിന്നെ സ്വന്തം ബ്ലോഗുകളില്‍ ചെറിയ രീതിയില്‍ പ്രതികരിച്ചു തുടങ്ങി ചിലര്‍. അതുകഴിഞ്ഞ് പതിയെ ചാനലുകളിലേക്ക് എസ്.എം.എസ് അയച്ച് അഭിപ്രായപ്രകടനം നടത്താമെന്നായി. എന്നാല്‍ അതിനോ കാശു ചെലവും. ഇനിയിപ്പോ ഇത്രയൊക്കെ കഷ്ടപ്പെട്ടാലും അത് വെറും ശശിയുടേയോ, ശശാങ്കന്റെയോ, ശോശാമ്മയുടെയോ വാക്കുകള്‍ മാത്രം. പറയുന്നത് ഒരു അഴീക്കോടോ ചുള്ളിക്കാടോ ഒന്നുമല്ലല്ലോ, അതിനാല്‍ അതിന്റെ വില തന്നെയേ കിട്ടൂ. മറ്റുള്ളവര്‍ക്ക് അങ്ങനെ ഒരു 'കാടും' 'കോടും' ഒന്നുമില്ലാത്തവര്‍ പറയുന്നത് കേള്‍ക്കാനോ വായിക്കാനോ അത്ര താല്പര്യമില്ലതാനും. ചാനലുകാര്‍ പോലും നമ്മുടെ വാക്കുകള്‍ തേടിയെത്തുന്ന സന്ദര്‍ഭങ്ങള്‍ തീരെ കുറവ്; പുതിയൊരു സിനിമ ഇറങ്ങി ആദ്യ ദിനം ആദ്യ ഷോ കണ്ട് പുറത്തിറങ്ങുമ്പോഴോ, ഏതെങ്കിലുമൊരു സീരിയല്‍ ആയിരമോ രണ്ടായിരമോ എപ്പിസോഡുകള്‍ പൂര്‍ത്തിയാക്കുമ്പോഴോ ആണ് ചാനലുകള്‍ വോയിസ് പോപ്പുലിക്കായി ജനങ്ങളിലേക്കിറങ്ങി ചെല്ലുന്നത്.

[blurb:1:right] ഫേസ്ബുക്ക് അതിനു പറ്റിയൊരു വേദിയാണ്. എന്തിനെ കുറിച്ചുമുള്ള എന്തഭിപ്രായവും വെറും ഫ്രീയായി പറയാം. ഫ്രണ്ട്സും അവരുടെ ഫ്രണ്ട്സും വഴി അതങ്ങനെ കുറെയധികം പേര്‍ കാണുകയും, അതിനെ പിന്താങ്ങുകയോ, അതിനിട്ട് 'താങ്ങുകയോ' ചെയ്യും. പണ്ടൊക്കെ പിന്നെപ്പിന്നെ, ഇപ്പോഴൊക്കെ അപ്പോള്‍തന്നെ എന്നു പറയുന്ന പോലെ നിമിഷങ്ങള്‍ക്കകം മറുപടികളെത്തിത്തുടങ്ങും. എന്തൊക്കെ എഴുതിവിട്ടാലും ചിലപ്പോള്‍ ഏതോ നാട്ടിലിരിക്കുന്ന, എതിരഭിപ്രായമുള്ളവന്‍ രണ്ട് ചീത്ത പറഞ്ഞെന്നിരിക്കും; ചിലപ്പോതിരിച്ചും പറയും. പിന്നെ അതവിടെ തീരും. അവര്‍ രണ്ടു പേരും നേരിട്ടെന്നല്ല, ഫേസ്ബുക്കില്‍ പോലും പിന്നീട് തമ്മില്‍ കാണണമെന്നില്ല. ആ ഒരു അവസ്ഥയുള്ളതിനാല്‍ ആരെയും പേടിക്കാതെ എന്തിനെതിരേയും കഠിനമായ ഭാഷയില്‍ തന്നെ പ്രതികരിക്കാം. അങ്ങനെയങ്ങനെ മലയാളികളുടെ ഉള്ളില്‍ ഉറങ്ങി കിടന്നിരുന്ന 'പ്രതികരണഭൂതം' കൂടി പുറത്തു ചാടി. അതോടൊപ്പം ഒരു സദാചാര പോലീസ് ശൈലിയും.

എന്നാല്‍ അതെല്ലാം അതിരുകടക്കുന്നുവെന്നാണ് ഇപ്പോള്‍ ഗവണ്മെന്റിന്റെ പക്ഷം.അങ്ങനെയൊരു വാര്‍ത്തയാണ് കഴിഞ്ഞ ദിവസം എത്തിയത്; നമ്മുടെ പ്രതികരണങ്ങളും കമന്റുകളും പരിധിക്കു പുറത്തു പോകുന്നുവെന്നാണ് ഗവണ്മെന്റിന്റെ നിരീക്ഷണം. ജനങ്ങളുടെ അഭിപ്രായ സ്വാതന്ത്ര്യം അതിരുകടക്കുന്നു പോലും.

ഹൈന്ദവദൈവങ്ങളേയും മുഹമ്മദ് നബിയേയും മറ്റും അധിക്ഷേപിക്കുന്ന രീതിയിലുള്ള പല പോസ്റ്റുകളും, അതിനു ചേര്‍ന്ന പല കമന്റുകളും ഒക്കെയാണ് പ്രധാനകാരണമായി ഇടയ്ക്ക് പറഞ്ഞതെങ്കിലും, മതമല്ല, രാഷ്ട്രീയമാണ് വിഷയമെന്ന് മനസ്സിലാക്കാം. ഈ വിധത്തില്‍ നിയമം ഭേദഗതി ചെയ്യുന്നതിനു എല്ലാ പാര്‍ട്ടികളുടെയും പിന്തുണ ഉണ്ടെന്നതു തന്നെ അതിനുദാഹരണമല്ലേ. അണ്ണ ഹസാരെയുടെ യുദ്ധം മൂത്തു നിന്ന സമയത്തു തന്നെ തുടങ്ങിയതാണ് നേതാക്കന്മാരുടെ ചൊരുക്ക്. അന്ന് പ്രസിഡന്റും പ്രധാനമന്ത്രിയും മുതല്‍ വാര്‍ഡ് മെമ്പര്‍മാര്‍ക്കെതിരെ പോലും കടുത്ത രോഷ പ്രകടനമായിരുന്നല്ലൊ! സെല്‍വരാജ് രാജി വെച്ച് യു.ഡി.എഫില്‍ എത്തിയപ്പോള്‍, ലീഗിനു അഞ്ചാം മന്ത്രി സ്ഥാനം കൊടുത്തപ്പോള്‍, ടി.പി യുടെ കൊലപാതകം, അങ്ങനെ ഓരോ കാലത്തും ഓരോ കാരണങ്ങളിലൂടെ ഫേസ്ബുക്കന്മാര്‍ പ്രതികരിക്കുന്നു. എന്നാല്‍ ഇതൊന്നും നേതാക്കന്മാര്‍ക്കങ്ങോട്ട് ദഹിക്കുന്നില്ല. ഫേസ്ബുക്കിലൂടെ അപമാനകരമായ പ്രസ്താവനകള്‍ പ്രചരിപ്പിച്ചുവെന്നു സി പി എം നേതാവ് ജനര്‍ദ്ദനന്‍ പതി പരാതി നല്‍കിയതോടെ പ്രതികരണങ്ങള്‍ക്കുള്ള പ്രതികരണവും എത്തിത്തുടങ്ങി. ഇനി ടി പി വധവുമായി ബന്ധപ്പെട്ട് പാര്‍ട്ടിയെ തേജോവധം ചെയ്യുന്നെന്നു പറഞ്ഞ് പിണറായിയും മറ്റും പിണങ്ങാറയോ എന്നും അറിയില്ല.

അപമാനിക്കുന്ന തരത്തില്‍ വാര്‍ത്ത പ്രചരിപ്പിക്കുന്നുവെന്നു പറഞ്ഞ് നേതാക്കന്മാര്‍ കേസ് കൊടുക്കാന്‍ തുടങ്ങിയാല്‍ വക്കീലന്മാര്‍ക്കു ആവശ്യത്തിനു പണി കിട്ടുമെന്നു മാത്രം. പിന്നെ അതിനെതിരേ പ്രതികരിച്ചുകൊണ്ട് വീണ്ടും കുറേയെണ്ണം എത്തും. അതില്‍ എത്രയെണ്ണം ഒറിജിനല്‍ ആണെന്നും എത്രയെണ്ണം ഫേക്ക് ആണെന്നും ആര്‍ക്കറിയാം. അസുഖം വന്നിട്ടു മരുന്നു കഴിക്കാതെ, അസുഖം വരാതെ നോക്കാമെന്ന ചിന്തയാവും നിയമഭേദഗതി എന്ന ഐഡിയയില്‍ എത്തിച്ചത്.

ഇനി പ്രശ്നമുള്ള പോസ്റ്റുകളോ, ആ പേജു തന്നെയോ കത്രിക വെയ്ക്കാനുള്ള അധികാരം വരുന്നു. ദൈവങ്ങളുടെ പിന്നില്‍ ഒളിച്ചിരുന്നു തങ്ങള്‍ക്കെതിരേയുള്ള അമ്പുകള്‍ ഒടിക്കാനുള്ള ശ്രമത്തിലാണ് നേതാക്കന്മാര്‍. എന്നാല്‍ ഇതു കാര്യക്ഷമായി പോകണമെങ്കില്‍ നാട്ടിലെ യേമാന്മാരെല്ലം തോക്കും ലാത്തിയും ഉപേക്ഷിച്ച് ഫേസ്ബുക്കില്‍ ഐഡിയുമായി ഇരിക്കേണ്ടി വരും. ഇവര്‍ പറയുന്ന വിധത്തിലുള്ള പോസ്റ്റുകള്‍ക്കൊരു പരിധിയുണ്ടെങ്കിലല്ലേ ഇതു പ്രായോഗികമാവു. നേതാക്കന്മാര്‍ക്കെതിരായ എല്ലാത്തരം പ്രസ്താവനകളും നിരോധിച്ചാല്‍ അതു കെട്ടിച്ചമച്ചതോ സത്യസന്ധമോയെന്ന് എങ്ങനെയറിയും? അനാവശ്യവിവാദപ്രസ്താവനകള്‍ ഒഴിവാക്കാമെങ്കിലും അതികഠിനമായ ചോരത്തിളപ്പു കാണിക്കാത്ത കമന്റ്സ് ഉള്ള, തെളിവുകള്‍ നിരത്തിയുള്ള ആരോപണ-പോസ്റ്റുകള്‍ ഒഴിവാക്കാതിരിക്കുകയല്ലെ ഭേദം? സത്യസന്ധന്മാരെന്നു നടിക്കുന്ന നേതാക്കന്മാര്‍ക്ക്, കള്ളന്മാരുടെ കഥകള്‍ പുറത്തറിയുന്നതിനോട് എന്താ ഇത്ര പുച്ഛം? ഇനി നേതാക്കന്മാരുടെ പേടി മാറണമെങ്കില്‍ ഫേസ്ബുക്ക് ഇന്ത്യയില്‍ നിരോധിക്കുകയല്ലാതെ വേറൊരു മാര്‍ഗ്ഗവുമില്ല ! അങ്ങനെ സംഭവിച്ചാല്‍ നിരോധനത്തിനെതിരേ കുറെ ഒച്ചയെടുക്കും, പിന്നെ അതോടെ തീരും പ്രതികരണഭൂതത്തിന്റെ ആയുസ്സ്.

[blurb:2:left] ഇനി അതവിടെ നില്‍ക്കട്ടെ. നമ്മുടെ കേരള മുഖ്യന്‍ കഴിഞ്ഞ ദിവസം പറഞ്ഞത് നല്ലൊരു 'കൊട്ട്' ആയിട്ടാണ് ഏറെ പേരും കണ്ടത്. എന്തിനുമേതിനും പ്രതികരിക്കുന്ന കേരളത്തിലെ സാംസ്കാരിക നായകര്‍ ടി പി വധത്തെക്കുറിച്ച് പ്രതികരിച്ചില്ല എന്ന കാര്യമാണ് മുഖ്യന്‍ എടുത്തിട്ടത്. സാംസ്കാരികപ്രവര്‍ത്തകര്‍ ഇതിനെതിരേ പ്രതികരിച്ചില്ലയെന്നത് അല്‍ഭുതപ്പെടുത്തുന്നുവെന്നും, പ്രതികരിക്കുന്നവര്‍ക്കും പ്രതികരിക്കാത്തവര്‍ക്കും സംരക്ഷണം നല്‍കുമെന്നും ഉമ്മന്‍ ചാണ്ടി പറഞ്ഞു. സംരക്ഷണം നല്‍കി പ്രതികരിപ്പിക്കേണ്ട സംസ്ഥാനമാണോ കേരളമെന്നും അദ്ദേഹം ചോദിച്ചു. ഫേസ്ബുക്കിലൂടെയും ജനസമ്പര്‍ക്കം നടത്തുന്നയാളാണ് മുഖ്യമന്ത്രി. അദ്ദേഹത്തിന്റെ വാക്കുകളില്‍ പ്രതികരണങ്ങള്‍ കേള്‍ക്കാത്തതിന്റെ സങ്കടം പ്രതിഫലിക്കുന്നുണ്ട്. അഭിപ്രായങ്ങളെ അനുകൂലിച്ചോ പ്രതികൂലിച്ചോ ആരെങ്കിലുമൊന്നു പ്രതികരിച്ചാല്‍ മതിയെന്നേയുള്ളു കുഞ്ഞൂഞ്ഞിന്.

ഇതെല്ലാം കൂടി കാണുമ്പോള്‍ ആകെയൊരു കണ്‍ഫ്യൂഷന്‍; എന്തിനുമേതിനും സാംസ്കാരികനായകര്‍ മാത്രം പ്രതികരിക്കണമെന്നും, പൊതുജനം പ്രതികരിക്കണ്ടായെന്നുമാണോ? കുറെ പുസ്തകങ്ങള്‍ രചിച്ചതു കൊണ്ട് മാത്രമല്ലല്ലോ അവര്‍ സാംസ്കാരിക നായകരായത്. അവര്‍ക്ക് അങ്ങനൊരു വേഷം കല്പ്പിച്ചു നല്‍കിയത് അവര്‍ നടത്തുന്ന അഭിപ്രായപ്രകടനങ്ങളിലൂടെയും വിമര്‍ശനങ്ങളിലൂടെയുമൊക്കെയാണ്. അതിനു മുന്‍പ് അവരും സാധാരണക്കാരും എഴുത്തുകാരുമൊക്കെ മാത്രമായിരുന്നു. അതായത് പൊതുജനം. അപ്പോള്‍ നമുക്കും പ്രതികരിക്കാനുള്ള അവകാശമില്ലേ. നമുക്ക് അതിനു ലഭിക്കുന്ന ഏക അവസരം സൈബര്‍ ലോകം തന്നെയാണ്. ആര്‍ക്കും എപ്പോഴും എന്തിനെതിരേയും പേടികൂടാതെ പ്രതികരിക്കാമെന്നുള്ളതാണ് അതിന്റെ കാര്യം. ആ ഒരു അവസരം പലരും ദുരുപയോഗം ചെയ്തതാണ് ഇങ്ങനെ ഒരു നിയമം കൊണ്ടുള്ള കൂച്ചുവിലങ്ങിടാന്‍ കാരണം. പക്ഷേ പലപ്പോഴും അതിരുകടന്ന അഭിപ്രായപ്രകടനങ്ങള്‍ ഈ സാംസ്കാരികരും നടത്തിയിരുന്നല്ലോ. എന്നിട്ടും യാതൊരു പ്രശ്നവുമില്ലാതെ അവര്‍ അവരുടെ കര്‍മ്മങ്ങള്‍ തുടര്‍ന്നുകൊണ്ടേയിരുന്നു.

അപ്പോള്‍ നമ്മുടെ മുഖ്യമന്ത്രി ആവശ്യപ്പെടുന്നത് പ്രതികരിക്കണമെന്നും, കേന്ദ്രം പറയുന്നത് പാടില്ലായെന്നുമാണ്. അതോ ഇനി നമ്മള്‍ പ്രതികരിക്കേണ്ട, അതിനുള്ളവര്‍ ഇവിടെയുണ്ട് എന്നാണോ രണ്ടും കൂടി ഉദ്ദേശിക്കുന്നത്? ആരുടെയെങ്കിലുമൊരു നടപടിയെ ഒരാള്‍ വിമര്‍ശിച്ചാല്‍ അതു കുറ്റമാവുമെങ്കില്‍ മോശപ്പെട്ട വാക്കുകള്‍ തിരഞ്ഞെടുത്ത് പ്രയോഗിക്കുന്ന ഇരുമുന്നണികളിലേയും പല നേതാക്കന്മാരുടെ കാര്യമോ?

എന്തായാലും ചിലര്‍ക്കു മാത്രം എന്തും പറയാമെന്ന അവസ്ഥ അനുവദിക്കുകയാണെങ്കില്‍ അതു പ്രോല്‍സാഹിപ്പിക്കുവാനാകില്ല. സാധാരണക്കാരന്റെ വാക്കുകള്‍ നാലാള്‍ കേള്‍ക്കുന്നത് ഇങ്ങനെയുള്ള ഒരേയൊരു മാര്‍ഗ്ഗത്തിലാവുമ്പോള്‍ ഒരു പഴുതുമില്ലാതെ അതു കൊട്ടിയടയ്ക്കാന്‍ പാടില്ല. ഇവിടെ ഉന്നയിക്കുന്ന ആരോപണങ്ങളിലെന്തെങ്കിലും കഴമ്പുണ്ടോയെന്ന് അന്വേഷിക്കുകയോ, അതില്‍ ഇവരുദ്ദേശിക്കുന്ന തരത്തിലൊന്നുമില്ലെന്നോ വാദിക്കുന്നതിനൊവാനുള്ള അവസരം തരാതെയോ ഉള്ള നിയമം തീരെ മോശം തന്നെ. അതിനു പകരം ഒരു കാര്യവുമില്ലാതെ അതിരുവിട്ടുള്ള പ്രകടനങ്ങള്‍ മാത്രം നിരീക്ഷിച്ചല്‍ അതു ഭേദമായിരിക്കും. ജനാധിപത്യം എന്നാല്‍ ജനങ്ങളുടെ മേല്‍ ആധിപത്യം സ്ഥാപിക്കുക എന്നാക്കുവാന്‍ പാടില്ലല്ലോ!

എന്തായാലും ഈ നിയമത്തിനെതിരേ പ്രമേയാനുമതി തേടി എത്തിയിരിക്കുന്നത് സി പി എമ്മിന്റെ രാജ്യസഭാ പ്രതിനിധി ആണെന്നത് ഒരു നല്ല വാര്‍ത്ത. മറ്റെല്ലാ പാര്‍ട്ടികളുടേയും എല്ലാ നേതാക്കളും അനുകൂലിച്ചപ്പോഴും പേടിയില്ലാതെ ജനങ്ങള്‍ക്കു വേണ്ടി വാദിക്കാനെത്തിയ പി. രാജീവിന് ആശംസകള്‍. എന്തെങ്കിലും മാറ്റം വരുത്തുവാന്‍ അദ്ദേഹത്തിനു കഴിയുമോയെന്ന് നോക്കാം.

നൂല്‍ക്കഷ്ണം: സ്വതേ തന്നെ ഒരു പേജ് പോകുന്നിടത്ത് അതേ സമയം പത്തു പുതിയ പേജ് വരുന്നതാണ് ഫേസ്ബുക്കിലെ അവസ്ഥ. ഫേസ്ബുക്ക് ആണെങ്കില്‍ ഇതാ ഒരു നിയന്ത്രണം എടുത്തു കളയുകയും ചെയ്തു. ഇനി പതിമൂന്നു വയസ്സില്‍ താഴെയുള്ളവര്‍ക്കും എഫ്ബി അക്കൗണ്ട് തുടങ്ങാം. അതേതായാലും നന്നായി. അവന്മാര്‍ക്കവുമ്പോ പേടിയുമില്ല, വല്ല പേജ് ഡിലീറ്റ് ചെയ്താല്‍ കുത്തിയിരുന്ന് വീണ്ടും ക്രിയേറ്റ് ചെയ്ത് പ്രതികരിക്കുകയും ചെയ്തോളും. കുട്ടിപ്പട്ടാളം 'ഫാരതത്തിന്റെ' 'ഫാവി' 'ശോഫനമാക്കട്ടെ' !

അനന്തു വാസുദേവ്

News Quotes

പൊതുജനത്തിനു പ്രതികരിക്കാനുള്ള ആദ്യ പ്രധാന ഉപാധി പത്രങ്ങളില്‍ ആഴ്ച്ചയില്‍ ഒരു ദിവസം കിട്ടുന്ന ഒരു കാല്പേജ് ആയിരുന്നു. അതും പത്രത്തിന്റെ 'ചരിവ്' അനുസരിച്ചും, വാര്‍ത്തയുടെ പ്രാധാന്യമനുസരിച്ചും കത്രിക കയറി ഏതൊക്കെയോ വിധത്തിലേ പ്രസിദ്ധീകരിക്കൂ, അതും പ്രസിദ്ധീകരിച്ചാലായി; അത്രതന്നെ. പിന്നെ പേപ്പറില്‍ എഴുതി സ്റ്റാമ്പൊട്ടിച്ച് പോസ്റ്റ് ചെയ്യുന്ന കാര്യമോര്‍ക്കുമ്പോള്‍ അധികമാളുകളുടെയും ചോര തണുക്കും.

Online Shout

നിരീക്ഷണം

Country:

Default Home Page

Authors:

Ananthu Vasudev

ധോണിയുടെ ഒരു ഭാഗ്യം

S Narendran — Mon, 21 May 2012 14:19:28 +0000

ഇന്ത്യന്‍ ക്രിക്കറ്റ് ടീം ക്യാപ്റ്റന്‍ മഹേന്ദ്രസിംഗ് ധോണി ഭാഗ്യം ചെയ്തൊരു ജന്മമാണെന്നത് തികച്ചും വ്യക്തമാണ്. ഏകദിനലോകകപ്പ് നേടിത്തന്ന ക്യാപ്റ്റനും ട്വന്റി 20 ലോകകപ്പു നേടിത്തന്ന ക്യാപ്റ്റനുമാണദ്ദേഹം. അതിനുപുറമേ, അദ്ദേഹം നായകത്വം വഹിക്കുന്ന ചെന്നൈ കിംഗ്സ് രണ്ടുതവണ തുടര്‍ച്ചായി ഐപിഎല്‍ ചാംപ്യന്മാരായി. നിലവിലുള്ള ചാംപ്യന്‍മാരുമാണവര്‍. ഈ എഡിഷനില്‍ ക്വാളിഫൈയര്‍ അഥവാ ക്വാര്‍ട്ടര്‍ ഫൈനല്‍ പോലും കാണാതെ ചെന്നൈ പുറത്താകുമെന്നു കരുതിയിരുന്നപ്പോഴാണ് ഭാഗ്യം ധോണിയുടെ തലയ്ക്കുമുകളില്‍ത്തന്നെ വന്നുനിന്നു തുടര്‍ച്ചയായി പുഞ്ചിരിച്ചുകൊണ്ടിരിക്കുന്നത്.

രണ്ടായിരത്തി ഏഴിലെ ലോകകപ്പില്‍ രാഹുല്‍ ദ്രാവിഡിന്റെ നായകത്വത്തില്‍ ഇന്ത്യ കളിക്കുമ്പോള്‍ ധോണി വിക്കറ്റ് കീപ്പറാണ്. അതിനുമുന്‍പ് ഇന്ത്യന്‍ ഉപഭൂഖണ്ഡത്തിലെ കളികളില്‍ അടിവീരനായിക്കൊണ്ട് തിളങ്ങിയ ധോണിയില്‍ അത്തവണത്തെ ഇന്ത്യന്‍ മുന്നേറ്റമോഹികള്‍ ഒരു മദ്ധ്യനിരസ്ഥിരത കണ്ടിരുന്നു. എന്നാല്‍ ഇന്ത്യ ആദ്യറൌണ്ടില്‍ പുറത്തായി. തുടര്‍ച്ചയായി ഡക്കായിക്കൊണ്ട് ആ പതനത്തില്‍ ഏറ്റവും വലിയ പങ്കുവഹിച്ച താരമായിരുന്നു ധോണി. ധോണിയുടെ റാഞ്ചിയിലോ മറ്റോ പണിതുകൊണ്ടിരുന്ന വീടിനുനേരേ ക്രിക്കറ്റ് ആരാധകരുടെ ആക്രമണമുണ്ടായി. ലോകകപ്പ് വേദിയില്‍നിന്നു തിരികെ ഇന്ത്യയിലെത്തിയ ധോണിയെ വിമാനത്താവളത്തില്‍ അക്രമാസക്തരായി കാത്തുനിന്ന നിരാശിതാരാധകരില്‍നിന്നു രക്ഷിക്കാന്‍ പിന്‍വാതിലില്‍ക്കൂടിയാണു് അന്നു പുറത്തേക്കു വിട്ടത്.

ആ ലോകകപ്പ് പരാജയത്തെത്തുടര്‍ന്ന് ടീമിനുള്ളിലും മാനേജ്മെന്റ് തലത്തിലും ഉണ്ടായ പടലപിണക്കങ്ങളുടെ ഭാഗമായി ദ്രാവിഡിന്റെ ക്യാപ്റ്റന്‍ സ്ഥാനം തെറിച്ചു. സച്ചിന്‍ ഒരിക്കല്‍ക്കൂടി ക്യാപ്റ്റനാകാന്‍ അവസരമൊരുങ്ങിയെങ്കിലും അദ്ദേഹമതു നിരസിച്ചു. ആ അവസ്ഥയില്‍ ടീമില്‍ മുതിര്‍ന്ന താരങ്ങള്‍ മറ്റാരുമില്ലാതെ വന്ന സവിശേഷസാഹചര്യത്തിലാണ് ധോണി ക്യാപ്റ്റനാകുന്നത്. തുടര്‍ന്ന്, ചെറിയ വിജയങ്ങളിലൂടെ, കൂള്‍ സമീപനത്തിലൂടെ ധോണിയുടെ ക്യാപ്റ്റന്‍സി ശ്രദ്ധേയമായി. ക്യാപ്റ്റന്‍സി വഹിക്കുമ്പോഴും സ്വന്തം ബാറ്റിംഗ് മികവ് കാത്തുസൂക്ഷിക്കാനും ധോണിക്കു കഴിഞ്ഞു.

ബാറ്റിംഗിന്റെ ശൈലിമാറ്റിക്കൊണ്ട് അദ്ദേഹം സമ്മര്‍ദ്ദത്തെ അതിജീവിച്ചു. ആദ്യ ട്വെന്റി ട്വെന്റി ലോകകപ്പ് നേടിക്കൊണ്ട്, അതും ഫൈനലില്‍ പാക്കിസ്ഥാനെ തകര്‍ത്തുകൊണ്ട് ധോണി ഇന്ത്യന്‍ ആരാധകരുടെ മാനസപുത്രനായി. ആ വിജയപരമ്പര കഴിഞ്ഞ വര്‍ഷത്തെ ഏകദിനലോകകപ്പ് നേട്ടംവരെ എത്തി.

ഇതിനിടെയും പരാജയങ്ങള്‍ ഇന്ത്യയ്ക്കു നേരിടേണ്ടിവന്നിരുന്നു. ഓസീസ്, ഇംഗ്ലണ്ട് പര്യടനങ്ങള്‍ ഇന്ത്യയെ നാണക്കേടിലാക്കി. എന്നാലും തുടര്‍ന്ന് ഇംഗ്ലണ്ടിനെ തൂത്തുവാരി ഇന്ത്യയും ധോണിയും മാനംകാത്തു.

ഇപ്പോള്‍ ഐപിഎലില്‍ ഇത്തവണ പതിനേഴു പോയിന്റുമായി പതിനാറു കളികളും ദിവസങ്ങള്‍ക്കു മുന്നേ അവസാനിച്ച ചെന്നൈ പുറത്തേക്ക് എന്നു പൂര്‍ണമായും ഉറപ്പിച്ചതാണ്. അവര്‍ക്ക് ആ പോയിന്റുമായി നാലാം സ്ഥാനം നിലനിര്‍ത്തണമെന്നുണ്ടായിരുന്നെങ്കില്‍ മൂന്നുതവണ അവരെ ഭാഗ്യം കടാക്ഷിക്കേണ്ടതുണ്ടായിരുന്നു. അതും മറ്റുള്ളവരുടെ കളികളിലെ വിജയപരാജയങ്ങള്‍. തങ്ങള്‍ക്ക് ഒന്നും ചെയ്യാന്‍ ബാക്കിയില്ലാത്തതിനാല്‍, മൂന്നു തവണ മറ്റുള്ളവരുടെ കളികളില്‍ തങ്ങളെ ഭാഗ്യം കടാക്ഷിക്കുന്നത് നോക്കിയിരിക്കാന്‍ ചെന്നൈ ബാദ്ധ്യസ്ഥരായി. അത്രയും തവണത്തെ ശ്രമം ഭാഗ്യദേവതയ്ക്കു പോലും ബോറടിക്കുമെന്നതിനാല്‍ ആ വിചിത്രസമവാക്യം ആരും പ്രതീക്ഷിച്ചിരുന്നില്ല.

അതായത്, തുടര്‍ന്നുള്ള കളികളില്‍, പഞ്ചാബ് ടീം രണ്ടുകളികളില്‍ ഒന്നിലെങ്കിലും തോല്‍ക്കണമായിരുന്നു. തീര്‍ന്നില്ല, രാജസ്ഥാന്‍ റോയല്‍സും രണ്ടിലൊരു കളി തോല്‍ക്കണമായിരുന്നു, അതുകൊണ്ടും അവസാനിച്ചില്ല, ബാംഗ്ലൂര്‍ റോയല്‍ ചാലഞ്ചേഴ്സ് തങ്ങളുടെ അവസാനകളി തോല്‍ക്കണമായിരുന്നു.

ഇതില്‍ വിചിത്രമായ സംഗതി, പഞ്ചാബിന്റെയും ബാംഗ്ലൂരിന്റെയും അവസാനകളികള്‍ ഡെക്കാനോടായിരുന്നു. അതുവരെ കളിച്ച പതിനാലു കളികളില്‍ പതിനൊന്നും തോറ്റ് പോയിന്റ് പട്ടികയില്‍ അവസാനക്കാരായി അഞ്ചുപോയിന്റുമായി നില്‍ക്കുകയായിരുന്ന ഡെക്കാനോട് പഞ്ചാബോ ബാംഗ്ലൂരോ തോല്‍ക്കുമെന്ന് ആരും കരുതിയിരുന്നില്ല. പ്രത്യേകിച്ച് ഇത്തവണയും പൂരപ്രപഞ്ചം തീര്‍ത്ത് ബാംഗ്ലൂരിന്റെ ക്രിസ് ഗെയില്‍ വിളയാട്ടുവീരനായി അരങ്ങുവാഴുന്ന സാഹചര്യത്തില്‍.

പക്ഷേ, നീര്‍ക്കോലി കടിച്ചു. പഞ്ചാബിനെയും ബാംഗ്ലൂരിനെയും ഡെക്കാന്‍ തകര്‍ത്തു. രണ്ടിന്റെയും അത്താഴം മുടങ്ങി. ചെന്നൈയ്ക്ക് സൂപ്പര്‍ ലോട്ടോ. അങ്ങനെ തുടര്‍ച്ചയായി മൂന്നാം സീസണിലും ചെന്നൈ അകത്തെത്തുകയാണ്. നാലാം സ്ഥാനക്കാരായ അവര്‍ക്ക് മൂന്നാം സ്ഥാനക്കാരായ മുംബൈയെയാണു നേരിടേണ്ടത്. അവസാനമത്സരത്തില്‍ പത്തുവിക്കറ്റിനു ജയിച്ചുകൊണ്ട് മുംബൈ ശക്തി തെളിയിച്ചിരിക്കുന്നു. അവരെ തോല്‍പ്പിച്ചാല്‍ ചെന്നൈയ്ക്ക് ഒന്നും രണ്ടും സ്ഥാനക്കാര്‍ തമ്മിലുള്ള ക്വാളിഫൈയറിലെ ജേതാക്കളോടു് ഏറ്റുമുട്ടേണ്ടതുണ്ട്. അതില്‍ ജയിച്ചാല്‍ ഫൈനലിലേക്ക്.

അങ്ങനെ ഇത്തവണത്തെ ഐപിഎലും ആവേശകരമായ അന്ത്യത്തിലേക്കു നീങ്ങുന്നു. ഒപ്പം ഭാഗ്യത്തിന്റെ സ്വര്‍ഗീയക്കോണികേറി ധോണിയും

ശ്യാം നരേന്ദ്രന്‍

മഹേന്ദ്രസിങ് ധോണി

ക്രിക്കറ്റ്

Country:

Default Home Page

Authors:

S Narendran

ഐപിഎല്‍ അഞ്ചാം സീസണ്‍ - ആവേശകരമായ അന്ത്യത്തിലേക്ക്

S Narendran — Mon, 21 May 2012 14:22:51 +0000

ഐപിഎല്‍ അഞ്ചാം സീസണിലെ റൌണ്ട് മത്സരങ്ങളെല്ലാം അവസാനിച്ചിരിക്കുന്നു. ഇന്നലെ മുംബൈയും രാജസ്ഥാന്‍ റോയല്‍സും തമ്മിലുള്ള കളിയോടെ എല്ലാ ടീമുകളും പതിനാറു വീതം മത്സരങ്ങള്‍ പൂര്‍ത്തിയാക്കി. ഇനി ഫൈനല്‍സ്.

അപ്രതീക്ഷിതമായ ചില തിരിമറികളാണ് അവസാനനിമിഷം ഈ ഐപിഎല്ലിനെ ആവേശകരമാക്കുന്നത്. അവസാനത്തെ രണ്ടുകളികളിലും രാജസ്ഥാനും പഞ്ചാബും ജയിച്ചിരുന്നെങ്കില്‍, ഒപ്പം ബാംഗ്ലൂര്‍ അവസാനമത്സരത്തില്‍ ജയിച്ചിരുന്നെങ്കില്‍ മുംബൈയുടെയും ചെന്നൈയുടെയും സ്ഥാനത്ത് ബാംഗ്ലൂരും മറ്റു രണ്ടു ടീമുകളിലൊന്നും ഇടംപിടിച്ചിരുന്നേനേ. എന്നാല്‍, അവസാനമത്സരത്തില്‍ പഞ്ചാബ് തോറ്റതോടെ, മുംബൈക്ക് ആശ്വാസമായി.

രാജസ്ഥാന്‍ അതിനുമുന്നേതന്നെ തങ്ങളുടെ പതിനഞ്ചാം മത്സരത്തില്‍ ദുര്‍ബലരായ ഡെക്കാനോടു തോറ്റ് പുറത്തായിരുന്നു. അവസാനമത്സരത്തില്‍ കരുത്തരായ ബാംഗ്ലൂരിനെ അട്ടിമറിച്ച ഡെക്കാന്‍ വീണ്ടും സമവാക്യം തിരുത്തി. ബാംഗ്ലൂര്‍ അകത്താകേണ്ടിയിരുന്നതിനു പകരം ആരും പ്രതീക്ഷിക്കാതെ ചെന്നൈ അകത്ത്.

ഇനി മൂന്നു മത്സരങ്ങളാണ് അവസാനരണ്ടു പോരാളികളെ തീരുമാനിക്കുക. ഒന്നാം ക്വാളിഫൈയറില്‍ ആദ്യസ്ഥാനക്കാരായ ഡല്‍ഹി രണ്ടാം സ്ഥാനത്തുള്ള കൊല്‍ക്കത്തയെ നേരിടും. ആ മത്സരത്തിലെ ജേതാക്കള്‍ നേരേ ഫൈനലിലേക്ക്. പരാജിതര്‍ക്ക് ഒരു അവസരം ബാക്കി.

രണ്ടാമത്തെ മത്സരം എലിമിനേഷനാണ്. മൂന്നാം സ്ഥാനക്കാരായ മുംബൈയും നാലാം സ്ഥാനക്കാരായ ചെന്നൈയും തമ്മില്‍ നടക്കുന്ന ആ മത്സരത്തില്‍ തോല്‍ക്കുന്നവര്‍ പുറത്തേക്ക്. ജയിക്കുന്നവര്‍ രണ്ടാം ക്വാളിഫൈയറിന്.

രണ്ടാം ക്വാളിഫയര്‍ ഒന്നാം ക്വാളിഫയര്‍ തോറ്റ ടീമും ഒന്നാം എലിമിനേഷന്‍ മത്സരം ജയിച്ച ടീമും തമ്മില്‍. അതാണ് ക്വാളിഫയര്‍ രണ്ട്. അതിലെ വിജേതാക്കള്‍ ഫൈനലിലേക്ക്.

അവസാനമത്സരങ്ങളിലേക്ക് ബാംഗ്ലൂരിന്റെ അസാന്നിദ്ധ്യമൊഴിച്ചാല്‍ കരുത്തരായ ടീമുകള്‍ തന്നെയാണ് എത്തിച്ചേര്‍ന്നിരിക്കുന്നത്. മൂന്നു മത്സരങ്ങളെങ്കിലും കൈവിട്ടുവെന്നു പൂര്‍ണമായും തോന്നിച്ചശേഷം തിരിച്ചുപിടിച്ച് ജയിച്ചുകൊണ്ടാണ് മുംബൈ തങ്ങളുടെ ശക്തി തെളിയിക്കുന്നത്. കൈപ്പിടിയിലൊതുക്കി എന്നു തോന്നിച്ച ചില മത്സരങ്ങള്‍ കൈവിട്ടുകൊണ്ട് മുംബൈ അസ്ഥിരതയും കാട്ടിയിട്ടുണ്ട്. എന്നാല്‍ ഡെക്കാനെതിരെ അവസാനത്തെ ഓവറില്‍ ക്രിസ്ത്യനെ തൂക്കിയടിച്ചും പഞ്ചാബിനെതിരെ പത്തൊന്‍പതാം ഓവറില്‍ പീയുഷ് ചാവ്ലക്കെതിരെ ഇരുപത്തേഴ് റണ്‍സെടുത്തും അഞ്ചുവിക്കറ്റും പോയി തകര്‍ന്നുനില്‍ക്കവേ, ബാംഗ്ലൂരിനെതിരെ അമ്പാടി റായുഡുവും കൈറോണ്‍ പൊള്ളാദും ചേര്‍ന്ന് അവിശ്വസനീയ തിരിച്ചുവരവു നടത്തി ജയിച്ചതും മുംബൈയുടെ മികവു കാട്ടുന്നു. അവസാനഘട്ടത്തില്‍ കൊല്‍ക്കത്തയ്ക്കെതിരെ കുറഞ്ഞ സ്കോര്‍ പിന്തുടരാനാകാതെ ഇടറിവീണതും മുംബൈ തന്നെയായിരുന്നു.

ഇപ്പോള്‍ ആദ്യത്തെ എലിമിനേഷന്‍ മത്സരത്തില്‍ മുംബൈയ്ക്കു നേരിടാനുള്ളത് ചെന്നൈയെയാണ്. റൌണ്ട് മത്സരങ്ങളില്‍ രണ്ടുതവണയും ചെന്നൈയെ തോല്‍പ്പിച്ചു എന്നത് മുംബൈയുടെ ആത്മവിശ്വാസം കൂട്ടും. എന്നാല്‍ മധുരപ്രതികാരത്തിനുള്ള ചെന്നൈയുടെ ദാഹവും അപ്രതീക്ഷിതമായി ഫൈനല്‍സില്‍ കടന്നുകൂടാനായതിന്റെ ആവേശവും കണക്കിലെടുക്കണം.

അവിടം കടന്നാല്‍ മുംബൈയെ കാത്തിരിക്കുന്നത് കൊല്‍ക്കത്തയും ഡല്‍ഹിയുമാണ്. എങ്ങനെയായാലും ഈ രണ്ടു ടീമുകളെയും ഓരോ തവണ മറികടക്കാതെ പറ്റില്ല. ഇവരില്‍ കൊല്‍ക്കത്തയെ റൌണ്ടില്‍ ഒരിക്കല്‍ തോല്‍പ്പിച്ചു. അടുത്ത തവണ അവരോടു തോറ്റു. ഡല്‍ഹിയോടു രണ്ടുതവണയും തോറ്റു.

മുംബൈ നേരിടുന്ന ഏറ്റവും വലിയ പ്രശ്നങ്ങള്‍ സച്ചിന്‍ തെണ്ടുല്‍ക്കറുടെ മോശം ഫോമും മികച്ചൊരു ഓപ്പണിംഗ് ജോഡിയുടെ അഭാവവുമാണ്. അഞ്ചാം സീസണ്‍ കളിക്കുമ്പോഴും അവര്‍ക്ക് സ്ഥിരതയാര്‍ന്നൊരു ഓപ്പണിംഗ് ജോഡിയെ വാര്‍ത്തെടുക്കാന്‍ കഴിഞ്ഞിട്ടില്ല. സച്ചിന്‍ തന്നെ ഒരു ഓപ്പണര്‍. മറ്റേയാളുടെ റോളില്‍ ഇത്രയും കാലംകൊണ്ട് ജയസൂര്യ, ഹെര്‍ഷല്‍ ഗിബ്സ്, അഭിഷേക് നായര്‍, വെയ്ഡ്, ഫ്രാങ്ക്ളിന്‍, ഡ്വെയാന്‍ സ്മിത്ത്, രാഹുല്‍ ശര്‍മ എന്നിങ്ങനെ ഒട്ടേറെപ്പേരെ പരീക്ഷിച്ചുകഴിഞ്ഞിരിക്കുന്നു. ഇവരില്‍ ഫ്രാങ്ക്ളിനും വെയ്ഡും സ്മിത്തും ഒറ്റപ്പെട്ട ഇന്നിംഗ്സുകളില്‍ വിജയിച്ചെങ്കിലും സ്ഥിരത കാട്ടുന്നില്ല.

ഇത്തവണ ലീഗിലെ അവസാനമത്സരത്തില്‍ സച്ചിനും സ്മിത്തും ഓപ്പണ്‍ ചെയ്യുകയും രണ്ടാളും അര്‍ദ്ധശതകം പൂര്‍ത്തിയാക്കുകയും ടീം പത്തുവിക്കറ്റിനു വിജയിക്കുകയും ചെയ്തു. ഐപിഎലിലെ ഏറ്റവും മികച്ച ഓപ്പണിംഗ് കൂട്ടുകെട്ടും ഇതുതന്നെ. സച്ചിനും ഫോമിലേക്കെത്തി എന്നു കരുതാമെങ്കില്‍ അവരുടെ മുന്നേറ്റം അതിശക്തമായിരിക്കും. അവരുടെ ഏറ്റവും വലിയ ദൌര്‍ബല്യം പരിഹരിച്ചുവെന്നു കരുതേണ്ടിവരും. എന്നാല്‍, സ്മിത്തിന്റെ ഇന്നിംഗ്സ് പിഴവുകള്‍ ഇല്ലാത്തതായിരുന്നില്ല. ഫീല്‍ഡിംഗ് നിയന്ത്രണത്തിന്റെ ആനുകൂല്യം പലപ്പോഴും ഇഞ്ചുകള്‍ക്കാണ് സ്മിത്തിനു വീണ്ടും വീണ്ടും ജീവന്‍ പകര്‍ന്നത്. അതുകൊണ്ട് അതിനെ എത്രമാത്രം ആശ്രയിക്കാമെന്നത് ഉറപ്പില്ല.

ഏതായാലും അവസാനപ്പോരാട്ടങ്ങളില്‍ ഏറ്റവും മികച്ച ടീമുകള്‍ തന്നെയാണ് എത്തിയിരിക്കുന്നതെന്നത് സുന്ദരം. ചെന്നൈയ്ക്കു പകരം ബാംഗ്ലൂരായിരുന്നു അവസാനനാലിലെങ്കില്‍ ആരു കിരീടം ചൂടിയാലും അതു പുതിയൊരു ചാംപ്യനായിരിക്കുമായിരുന്നു. ഒന്നാം ഐപിഎല്‍ രാജസ്ഥാനും രണ്ടാം കിരീടം ഡെക്കാനും നേടിയപ്പോള്‍ മൂന്നും നാലും ചെന്നൈ കരസ്ഥമാക്കി. ചെന്നൈ അല്ലാതെ ഡെല്‍ഹിയോ കൊല്‍ക്കത്തയോ മുംബൈയോ നേടിയാല്‍ ഇത്തവണ നാലമതൊരു രാജാവ് ഉദയം ചെയ്യും.

ശ്യാം നരേന്ദ്രന്‍

ഐപിഎല്‍ സീസണ്‍ 5ന്റെ ഓപ്പണിങ് സെറിമണി

ക്രിക്കറ്റ്

Country:

Default Home Page

Authors:

S Narendran

പിതാവും പുത്രനും പരിശുദ്ധാത്മാക്കളും

Gossip Mongers — Sun, 20 May 2012 09:53:22 +0000

വനം സിനിമാ മന്ത്രി ഗണേശ് കുമാറും അദ്ദേഹത്തിന്റെ പിതാവ് ആര്‍ ബാലകൃഷ്ണപിള്ളയും തമ്മില്‍ അത്ര നല്ല സ്വരച്ചേര്‍ച്ചയിലല്ല എന്നു നമുക്കൊക്കെ അറിയാം. സ്വരം നന്നായിരിക്കുമ്പോഴാണു പാട്ടുനിര്‍ത്തേണ്ടത്, അല്ലാതെ സ്വരച്ചേര്‍ച്ചയില്ലായ്മ നന്നായിരിക്കുമ്പോഴല്ല എന്നറിയാവുന്നതുകൊണ്ടാണ് പിള്ള എത്ര കൈകാലിട്ടടിച്ചിട്ടും പുള്ള മന്ത്രിസ്ഥാനം വിട്ടുമാറാന്‍ തയ്യാറാകാത്തത്. വിട്ടുമാറാത്ത ചുമ പോലെയൊന്നാണ് ഈ മന്ത്രിസ്ഥാനം വിട്ടുമാറാനുള്ള മടിയും എന്നറിയാവുന്നതിനാല്‍ ചാണ്ടിച്ചന്‍ പുള്ളാച്ചന്‍ പറയുന്നതല്ല, അച്ഛന്റെ പുള്ള പറയുന്നതാണു കേള്‍ക്കുന്നത് (ചാണ്ടിച്ചനു സപ്പറു ജോറായേ എന്ന് മറവത്തൂര്‍ കനവ് എന്ന ചിത്രത്തില്‍ അന്തരിച്ച ഗാനരചയിതാവ് ഗിരീഷ് പുത്തഞ്ചേരി).

അച്ഛനും മകനും തമ്മിലുള്ള വൈരനിര്യാതനബുദ്ധിപരമായ കളി ഇങ്ങനെ തുടര്‍ന്നുകൊണ്ടിരിക്കുന്നതിനിടെ, കഴിഞ്ഞയാഴ്ച ഒരു രസകരമായ സംഭവമുണ്ടായി. ഒരു സ്കൂളുകാര്‍ മന്ത്രി ഗണേശ് കുമാറിനെ ഒരു പരിപാടിക്കു ക്ഷണിച്ചു. ചെറിയ ക്ലാസുകളിലെ കുട്ടികളുമായി മന്ത്രിയുടെ ഒരു സംവാദമായിരുന്നു പരിപാടി. പരിപാടിക്കൊക്കെ വരാമെന്നു സമ്മതിക്കുവാന്‍ ഗണേശ് കുമാര്‍ ഒരു ചെറിയ നിബന്ധനമാത്രം വെച്ചു. കുട്ടികള്‍ മന്ത്രിയോടു ചോദിക്കുന്ന ചോദ്യങ്ങളില്‍ ഒരുകാരണവശാലും താനും അച്ഛനുമായി ബന്ധപ്പെട്ട ഒന്നുമുണ്ടാകരുത്.

സ്കൂള്‍ അധികൃതര്‍ ആലോചനാപൂര്‍വം തിരിച്ചുപോയി. പിടിഎ കൂടി ആലോചിച്ചപ്പോള്‍ എല്ലാവര്‍ക്കും ഒരേ അഭിപ്രായം. ചെറിയ കുട്ടികളല്ലേ. എല്‍കെജിയിലും യുകെജിയിലും ഒന്നിലും രണ്ടിലുമൊക്കെ പഠിക്കുന്ന കുട്ടികളല്ലേ, അവര്‍ക്ക് രാഷ്ട്രീയത്തിലൊന്നും ഒരു താല്പര്യവുമില്ല. അവര്‍ക്ക് പിള്ള - ഗണേശ് പ്രശ്നമൊന്നും അറിയുകയുമില്ല. അതിനാല്‍ ധൈര്യമായി മന്ത്രിക്കു വാക്കുകൊടുക്കാം. ഒരു കുഞ്ഞും ഒരു കുഞ്ഞു കുടുംബപ്രശ്നവും ചോദിക്കുകയില്ല.

ഏതായാലും ഈ പിള്ളയെയും ഗണേശിനെയും വച്ച് ഒരു ചോദ്യവും ചോദിച്ചേക്കരുത് എന്നു കുട്ടികളോടു പറയുകയേ വേണ്ടെന്നും തീരുമാനമെടുത്തു. പോളണ്ടിനെപ്പറ്റി ഒരക്ഷരം മിണ്ടരുത് എന്നു പറഞ്ഞാലാണല്ലോ എല്ലാവര്‍ക്കും പോളീഷ് ചോദ്യങ്ങള്‍ മനസ്സിലുദിക്കുക. അതുകൊണ്ട് അക്കാര്യം മിണ്ടണ്ട. എന്നാലും ഈ കുട്ടികള്‍ ടീവീയും അതിലെ തമാശപ്പരിപാടികളായ ടോം ആന്റ് ജെറി, മിക്കി ആന്റ് ഡൊണാള്‍ഡ്, നികേഷ് കുമാര്‍ ഷോ, ഷാനി പ്രഭാകര്‍ ഷോ തുടങ്ങിയവ കാണുന്നതുമല്ലേ എന്നും ബുദ്ധിജീവികളായ പിടിഎ ഭാരവാഹികള്‍ ചിന്തിക്കാതിരുന്നില്ല. അതുപോലെ കുട്ടികളെ പത്രം വായിക്കാനും പരിശീലിപ്പിച്ചുവരുന്നു. ഇതിനൊക്കെ എന്തു ചെയ്യും. ഒരു പ്രതിവിധിയും അവര്‍ തന്നെ കണ്ടെത്തി. മന്ത്രിയുമായി സംവാദം നടക്കുന്നതിനു തൊട്ടുമുന്‍പുള്ള ഒരാഴ്ച കുട്ടികള്‍ക്ക് വീടുകളില്‍ ടെലിവിഷന്‍ ബന്ദ് ഏര്‍പ്പെടുത്തുക. പത്രവായന ബാന്‍ പ്രഖ്യാപിക്കുക. അങ്ങനെ യാതൊന്നും അറിയാതെ കുട്ടികള്‍ സംവാദത്തില്‍ പങ്കെടുക്കട്ടെ.

അങ്ങനെ, ബന്ദും ഹര്‍ത്താലും ബാനും എല്ലാമായി ഒരാഴ്ചക്കാലം ടെലിവിഷനോടും പത്രമിത്രാദികളോടും സല്ലപിക്കാതെ കുട്ടികള്‍ ഫ്രെഷായി വനപാലകന്റെ മുന്നില്‍ എത്തി. സംവാദം തുടങ്ങി. പലപല ചോദ്യങ്ങള്‍. സിനിമയെപ്പറ്റി, കാടിനെപ്പറ്റി, കുരങ്ങനെപ്പറ്റി, മഞ്ചാടിക്കുരുവിനെപ്പറ്റി, കൊട്ടാരക്കര ഗണപതിയെപ്പറ്റി... എന്നുവേണ്ട ഇനി ഇന്നൊരുചോദ്യം കൂടിയേ ചോദിക്കാനില്ലാതുള്ളൂ എന്ന അവസ്ഥയില്‍ കുട്ടികള്‍ കസറി. പിതാക്കള്‍ക്കും മാതാക്കള്‍ക്കും ഗുരുനാനാക്കുമാര്‍ക്കുമെല്ലാം പെരുത്തു ഖുശി. അപ്പോഴതാ, ഒരു കുട്ടി തൊണ്ടയനക്കുന്നു. അവന്റെ തീപാറുന്ന ചോദ്യശരം തൊടുക്കപ്പെടുന്നു.

-എനിക്കൊരു കാര്യം ചോദിക്കാനുണ്ട്... സാറിന്റെ അച്ഛന്‍...

ഹാളില്‍ സമ്പൂര്‍ണനിശ്ശബ്ദത. ഈ കൊച്ചുമിടുക്കന്‍ ഇങ്ങനെയൊരു പണിപറ്റിക്കുമെന്നാരു കണ്ടു? മന്ത്രിയും അസ്വസ്ഥനായി. എന്താണിവന്‍ ചോദിക്കാന്‍ പോകുന്നത് എന്നോര്‍ത്ത് സകലരും ഉരുകി. അതാ, ചോദ്യം തുടരുന്നു... തടയാന്‍ കഴിയുംമുന്‍പ്.

-സാറിന്റെ അച്ഛന്‍ സാറിനെ കൊച്ചുന്നാളില്‍ ടീവീ കാണാന്‍ സമ്മതിക്കുമാരുന്നോ?...

ഒരുനിമിഷത്തെ നിശ്ശബ്ദതകൂടി. ബോംബെറിഞ്ഞിട്ടു പൊട്ടാതെ വന്ന നിമിഷത്തിന്റെ മൌനം. പിന്നെ ഗണേശ് കുമാര്‍ പൊട്ടിച്ചിരിച്ചു. തന്റെ കുട്ടിക്കാലത്ത് ടീവീ ഇല്ലായിരുന്നു മോനേ എന്നു മറുപടിയും പറഞ്ഞു. മാതാപിതാഗുരുവെല്ലാം ദൈവത്തെ വിളിച്ചു നന്ദി പറഞ്ഞു.കുട്ടികള്‍ വെറും ശുദ്ധാത്മാക്കളല്ല, പരിശുദ്ധാത്മാക്കളാണെന്നവര്‍ തിരിച്ചറിഞ്ഞു.

പക്ഷേ, ഒന്നാലോചിച്ചാല്‍ ആ കുരുന്നിന്റെ ചോദ്യത്തിന്റെ ആഴം എത്രമേല്‍ മുഴങ്ങുന്നതാണ്. ടെലിവിഷന്‍ കാണാന്‍ സമ്മതിക്കാത്ത പിതാക്കന്മാരെക്കുറിച്ചുള്ള ആ ചോദ്യത്തിലില്ലേ എല്ലാ ചോദ്യങ്ങളും. അവിടെ ചോദിക്കാതിരുന്ന, അവിടെ വരിയുടച്ചിട്ടിരുന്ന എല്ലാ ചോദ്യങ്ങളും. ഇതാണ് പറയുന്നത്, വിത്തിനെ ഇല്ലാതാക്കാന്‍ അതിനെ മണ്ണിലേക്കു ചവിട്ടിത്താഴ്ത്തരുത്. ഒരു മഴത്തുള്ളി വീണാല്‍ മതി, അതു തലനീട്ടാന്‍. അപ്പോള്‍ നിങ്ങള്‍ക്കതിനെ രണ്ടാമതും ഹനിക്കേണ്ടിവരും. ജാഗ്രതൈ!

ആര്‍ ബാലകൃഷ്ണപിള്ള, കെ ബി ഗണേഷ്‌കുമാര്‍

പരിഹാസം

Country:

Default Home Page

Authors:

Gossip Mongers

വര്‍ഗ്ഗരാഷ്ട്രീയം വര്‍ഗ്ഗീയതയ്ക്കു വഴിമാറുമ്പോള്‍

പുലരി — Sat, 19 May 2012 19:12:39 +0000

റവലൂഷനറി പാർട്ടി നേതാവ് ടി.പി ചന്ദ്രശേഖരന്റെ കൊലപാതകത്തിനുത്തരവാദിത്വത്തിൽ നിന്നു പുറത്തുകടക്കാനാകാതെ സിപിഐ(എം) പ്രയാസപ്പെടുമ്പോൾ തന്നെ പൊതുപ്രവണതക്ക് വിരുദ്ധമായി തീർത്തും വ്യത്യസ്തമായ നിലപാടുകൾ കൈരളി ചാനലിലും, പാർട്ടി സെക്രട്ടറി പിണറായി വിജയനിൽ നിന്നുമുണ്ടായത് പിന്നീടുള്ള ബഹളത്തിൽ മുങ്ങിപ്പോയെങ്കിലും, കേസ് അന്വേഷണം മുന്നോട്ടു നീങ്ങവെ അന്വേഷണ സംഘം കണ്ടെത്തിയ ചില വസ്തുതകളുമായി യാദൃശ്ചികമായെങ്കിലും ബന്ധമുള്ളതാണ്.

ടിപിയുടെ കൊലപാതകം സിപിഎമ്മുമായി ബന്ധപ്പെട്ട പതിവു രാഷ്ട്രീയ കൊലപാതകത്തിനപ്പുറമുള്ള രാഷ്ട്രീയമാനങ്ങളോടെ പാർട്ടിയെ ശക്തമായി അക്രമിക്കാൻ തുടങ്ങിയതു മുതൽ, പാർട്ടി നിയന്ത്രണത്തിലുള്ള കൈരളി ചാനൽ ടി.പിയുടെ കൊലപാതകത്തിനുത്തരവാദികൾ എൻ.ഡി എഫ് എന്ന നിലക്കുള്ള ബ്രേക്കിങ് ന്യൂസ് നിരന്തരം പ്രചരിപ്പിച്ചുകൊണ്ടിരുന്നു. എൻ.ഡി.എഫിനെ കൊലപാതകത്തിനു ബന്ധിപ്പിക്കത്തക്ക തെളിവുകൾ അന്വേഷണ സംഘത്തിനു കിട്ടി എന്ന നിലക്കുള്ള വാർത്താ പ്രചാരണം. അതിനു കാരണം പ്രധാനപ്രതിയായി ആരോപിക്കപ്പെട്ട വ്യക്തിയുടെ മുസ്ലിം നാമവും.

അല്പസമയത്തിനകം പാർട്ടി സെക്രട്ടറിയും സമാനമായ വാദങ്ങളുമായി രംഗത്തു വന്നു. മതതീവ്രവാദികളാണ് ടി.പിയുടെ കൊലപാതകത്തിനു പിന്നിൽ എന്നായിരുന്നു പിണറായി വിജയന്റെ കണ്ടെത്തൽ. കാരണമായി പറഞ്ഞത് മതതീവ്രവാദികൾ നടത്തുന്ന കൊലപാതക രീതി പോലെയുള്ള കൃത്യമാണ് ടി.പി വധത്തിൽ നടന്നതെന്നായിരുന്നു. എന്നാൽ ടി.പിക്ക് കൈരളിയും, പിണറായിയും ലക്ഷ്യം വെക്കുന്ന വിഭാഗങ്ങളുമായി ഒരു നിലക്കുള്ള ഭിന്നതയോ, ശത്രുതയോ ഇല്ലെന്നു മാത്രമല്ല സി.പി.എം വിട്ടു പുതിയ പാർട്ടി രൂപീകരിച്ചതിനു ശേഷം ഈ പറയുന്ന വിഭാഗങ്ങളുമായി ഊഷ്മളമായ ബന്ധമാണ് ഉണ്ടായിരുന്നതെന്നും പകല്പോലെ വ്യക്തമായിരുന്നു. അതിനേക്കാളുപരി കൊലപാതകത്തിന്റെ നേർക്കുനേരെയുള്ള ഉത്തരവാദിത്വം സി.പി.എമ്മിനു നേരെ തിരിയുന്ന ശക്തമായ സാഹചര്യങ്ങളാണ് നിലനിന്നിരുന്നതെന്നത് കൊണ്ടു തന്നെ കൈരളിയും, പിണറായിയും തൊടുത്ത അമ്പിനു സംഘപരിവാര ജിഹ്വയായ ജന്മഭൂമി പത്രത്തിനപ്പുറം ആയുസ്സുണ്ടായില്ല. മറ്റു മാദ്ധ്യമങ്ങൾ ഒന്നും തന്നെ ഈ വാദങ്ങൾക്ക് പരിഗണന നൽകിയില്ലെന്നു മാത്രമല്ല കൈരളിയുടെയും, പിണറായിയുടെയും വാദങ്ങളെ തള്ളിക്കളയുന്ന വാർത്തകളും, വിശകലനങ്ങളുമായാണ് മാദ്ധ്യമങ്ങള്‍ ടിപി വധത്തെ കൈകാര്യം ചെയ്തതു.

പക്ഷെ കേസ് അന്വേഷണം മുന്നോട്ടു നീങ്ങവെ കൊലപാതകത്തിന്നുപയോഗിച്ച് ഉപേക്ഷിക്കപ്പെട്ട നിലയിൽ കണ്ടെത്തിയ ഇന്നോവ കാറിന്റെ പിൻഗ്ലാസിൽ കണ്ട അറബി – ഇസ്ലാമിക വാചകവും കൈരളിയുടെയും പിണറായിയുടെയും മുൻകൂട്ടിയുള്ള പ്രചാരണങ്ങളും കൂട്ടിവായിച്ചാൽ ടിപിയുടെ കൊലപാതകത്തിനുത്തരവാദിത്വം ചില കേന്ദ്രങ്ങളുടെ മേലെ കെട്ടിവെക്കാനുള്ള ഒറ്റപ്പെട്ടതല്ലാത്ത ആസൂത്രിതമായ നീക്കം പ്രതികളുടെ ഭാഗത്തു നിന്നു മാത്രമല്ല സിപിഎം കേന്ദ്രങ്ങളിൽ നിന്നും ഉണ്ടായിരുന്നോ എന്ന സംശയം പ്രസക്തമാണ്. പ്രതികൾ കൊലയ്ക്കുപയോഗിച്ച ഇന്നോവ കാറിന്റെ ഉടമ ഒരു അമുസ്ലിം ആണെന്നു മാത്രമല്ല കാറ് വാടകക്ക് നൽകുമ്പോൾ യാതൊരു തരത്തിലുള്ള സ്റ്റിക്കറോ, വിശുദ്ധവചനങ്ങളോ പതിച്ചിരുന്നില്ലെന്ന കാർ ഉടമയുടെ മൊഴിയും ഇവിടെ ശ്രദ്ധേയമാണ്. കാറു വാടകക്ക് എടുത്തതിനു ശേഷമാണ് കൊലയാളികൾ ഈ സ്റ്റിക്കർ പതിച്ചതെന്ന് വ്യക്തം.

ഈ വിഷയവുമായി ബന്ധപ്പെട്ട് പൊലീസ് നടത്തിയ വെളിപ്പെടുത്തലുകളും വ്യക്തമായ ഗൂഢാലോചനയിലേക്കാണ് വിരൽ ചൂണ്ടുന്നത്. അതായത് കൊലപാതകം നടത്തി അതിന്റെ ഉത്തരവാദിത്വം മുസ്ലിം തീവ്രവാദികളിൽ ആരോപിക്കത്തക്കരീതിയിൽ അന്വേഷണത്തെ തെറ്റിദ്ധരിപ്പിക്കാനായിരുന്നു കാറിന്റെ പിൻഭാഗത്ത് വിശുദ്ധവചനങ്ങളോടു കൂടിയ സ്റ്റിക്കർ പതിച്ചതെന്നാണ് ഇതെപ്പറ്റി പൊലീസ് പറഞ്ഞത്. വ്യക്തമായി പറഞ്ഞാൽ കാറിനു പിന്നിൽ കാണപ്പെട്ട ‘മാശാ അല്ലാ’ പോസ്റ്റർ കാണുന്ന അന്വേഷണ സംഘം കൊലയ്ക്കു പിന്നിൽ മുസ്ലിം തീവ്രവാദികൾ ആണെന്ന് കരുതി അന്വേഷണം ആ വഴിക്ക് തിരിച്ചുവിടും എന്ന ഉദ്ദേശത്തോടെയാണ് ഈ കൃത്യം ചെയ്തതെന്നു വ്യക്തം.

ഈ നിലയ്ക്കുള്ള നീക്കം ആദ്യമായല്ല ഉണ്ടാകുന്നത്. രാജ്യത്തിന്റെ വിവിധ ഭാഗങ്ങളിൽ നടന്ന ബോംബ് സ്ഫോടനങ്ങൾക്കു ശേഷം കൃത്യമായി അവശേഷിപ്പിക്കുന്ന ചില നിർണ്ണായക തെളിവുകള്‍ക്കു സമാനമായ സംഭവം തന്നെ എന്നു പറയാം. രാജ്യത്ത് എവിടെ സ്ഫോടനം നടന്നാലും, സ്ഫോടനം നടന്ന വാഹനമോ, ചാവേറോ തന്നെ ചിന്നഭിന്നമായാലും ഒരു പോറൽ പോലും ഏൽക്കാതെ ചില നിർണ്ണായക തെളിവുകൾ എല്ലായ്പ്പോഴും അവശേഷിക്കാറുണ്ട്. ഈ തെളിവുകള്‍ക്കു മാത്രം ഒരു പോറൽ പോലും സംഭവിക്കുകയില്ല. മുസ്ലിങ്ങൾ ഉപയോഗിക്കുന്ന ജപമാല, ഖുർആൻ വചനങ്ങൾ, ചില റൂട്ട് മാപ്പുകൾ, ഉന്നതരായവരുടെ പേരുകൾ, അവരുടെ നമ്പറുകൾ പിന്നെ ഒന്നോ രണ്ടോ പിസ്റ്റളുകൾ, ഏ.കെ 47 തോക്കുകൾ കൂട്ടത്തിൽ ആർഡീഎക്സുമൊക്കെയാണ് ഒരു നിലക്കുമുള്ള കേടുപാടുകളും കൂടാതെ സ്ഫോടനാനന്തരം അവശേഷിക്കുന്ന തെളിവുകള്‍. ഈ തെളിവുകള്‍ വച്ചാണ് ഇന്ത്യൻ മുജാഹീദ്ദീൻ ആണോ, ഡെക്കാൻ മുജാഹിദ്ദീൻ ആണോ, അതോ സാക്ഷാൽ സിമി തന്നെ ആണോ എന്നു പോലീസ് വേർതിരിച്ചു കണ്ടുപിടിക്കുക.

ജപമാലയുടെ കളർ നോക്കി സ്ഫോടനം നടത്തിയത് ഡെക്കാൻ മുജാഹിദീൻ ആണോ അതോ ഫുജി ആണോ എന്നു കണ്ടുപിടിക്കാൻ ഐബിയും പോലീസുമൊക്കെ വിദഗ്ദന്മാരാണ്. ഈ കണ്ടെത്തലിന്റെ തുടർച്ചയായിട്ടാണ് അന്വേഷണവും മുന്നോട്ടു നീങ്ങുക. പക്ഷെ ഏറെ കാലം ഈ കേടുപാടു പറ്റാതെ അവശേഷിക്കുന്ന തെളിവുകള്‍ക്ക് അയുസ്സുണ്ടായില്ല. രാജ്യത്ത് നടന്ന പല സ്ഫോടനങ്ങളുടെയും ഉത്തരവാദിത്വം സാക്ഷാൽ ഹിന്ദുത്വ തീവ്രവാദികള്‍ക്കാണെന്നു വ്യക്തമായപ്പോൾ സ്ഫോടനാനന്തരം യാദൃശ്ചികമെന്നോണം അവശേഷിക്കപ്പെടുന്ന ഇത്തരം നിർണ്ണായക തെളിവുകളുടെ യാഥാർത്ഥ്യവും പുറത്തുവന്നു തുടങ്ങി. മാത്രമല്ല ബോംബ് നിർമ്മിക്കുമ്പോൾ കൊലചെയ്യപ്പെട്ട ചില ഹിന്ദുത്വ തീവ്രവാദികളുടെ പക്കൽ നിന്നു വെപ്പുതാടി, പാക്കിസ്ഥാനി സൽവാർ കമ്മീസുകൾ, ജപമാല, ഖുർആൻ എന്നിവയൊക്കെ കണ്ടെടുക്കപ്പെട്ടതായി റിപ്പോർട്ടുകളും വന്നു.

അതായത് രാജ്യത്തിന്റെ അഖണ്ഡതയെ കുറിച്ചു വാചാലരാകുന്ന, മറ്റെല്ലാവരുടെയും രാജ്യസ്നേഹം കാപട്യമാണെന്നും അത്തരക്കാരെ പുറംതള്ളണമെന്നും വാദിച്ചുകൊണ്ടിരിക്കുന്ന ഹിന്ദുത്വഭീകരർ തന്നെയാണ് രാജ്യത്ത് അരക്ഷിതാവസ്ഥ ഉണ്ടാക്കുവാനായി സ്ഫോടനങ്ങൾ സൃഷ്ടിച്ചതെന്നും അന്വേഷണത്തെ വഴിതിരിച്ചുവിട്ട് മുസ്ലിംകളിലേക്ക് എത്തിക്കുവാനാണ് മുസ്ലിം ബന്ധമുള്ള ചിഹ്നങ്ങളും സ്ഫോടന സ്ഥലത്തു ബോധപൂർവം നിക്ഷേപിക്കപ്പെട്ടിരിക്കുന്നതെന്നുമുള്ള യാഥാർഥ്യം പിന്നീടു പുറത്തുവന്നു.

ഇതിനോട് ചേർത്തുവായിക്കാവുന്ന തെളിവു നിക്ഷേപം തന്നെയാണ് ഇന്നോവ കാറിന്റെ പുറകിൽ പതിച്ച അറബിയിലുള്ള വിശുദ്ധ വചനങ്ങളും. പ്രതികൾ മാത്രമല്ല ഇത്തരമൊരു ആരോപണം ഉന്നയിച്ചതെന്നത് ഈ വിഷയത്തിന്റെ ഗൌരവം വർദ്ധിപ്പിക്കുന്നതാണ്. മുൻകൂട്ടി തിരുമാനിക്കപ്പെട്ടതു പോലെയാണ് പാർട്ടി ചാനലിൽ ടിപി വധത്തിന്റെ ഉത്തരവാദിത്വം എൻഡിഎഫ് ആണെന്ന നിലയ്ക്കുള്ള ബ്രേക്കിങ് ന്യൂസുകൾ വന്നുകൊണ്ടിരുന്നത്. അതിനൊപ്പം തന്നെയാണ് ഇതേ നിലയ്ക്കുള്ള പാർട്ടി സെക്രട്ടറിയുടെ ആരോപണങ്ങളും വന്നത്. കൊലയാളികളുടെ ലക്ഷ്യവും പാർട്ടി ചാനലിന്റെ പ്രചാരണവും, പാർട്ടി സെക്രട്ടറിയുടെ ആരോപണങ്ങളുമെല്ലാം ഒരേ സ്വഭാവം പുലർത്തിയത് തീർത്തും യാദൃശ്ചികം മാത്രമാണോ? അതോ ബോധപൂർവമായ ഒരു ഗൂഢാലോചനയും അഭിപ്രായ ഐക്യവും ഈ വിഷയത്തിൽ ഉണ്ടായിട്ടുണ്ടോ?

സമാനമായ മറ്റൊരു സംഭവത്തിൽ പാർട്ടി സ്വീകരിച്ച നിലപാടു കൂടെ ഇവിടെ പരിശോധിക്കുമ്പോഴാണ് വെറും യാദൃശ്ചികതകൾക്കപ്പുറമുള്ള മാനം സി.പി.എമ്മിന്റെ ഭാഗത്തുനിന്നുള്ള ഇത്തരം നീക്കങ്ങൾക്ക് ഉണ്ട് എന്ന് മനസ്സിലാക്കാൻ നിര്‍ബന്ധിതരാകുന്നത്.

2006 ഒക്ടോബർ 22നു തലശ്ശേരി സൈദാർപീടികയിൽ വെച്ചു എൻഡിഎഫ് പ്രവർത്തകനും, തേജസ് ദിനപത്രത്തിന്റെ ഏജന്റുമായ മുഹമ്മദ് ഫസൽ കൊല്ലപ്പെട്ട സംഭവവും അതിനോടു സിപിഎം സ്വീകരിച്ച നിലപാടുകളും ഇവിടെ പരിശോധിക്കപ്പെടേണ്ടത് ആവശ്യമാണ്. തലശ്ശേരിയിൽ സംഘപരിവാരവും എൻഡിഎഫും തമ്മിൽ നിലനിന്നിരുന്ന ചെറിയ സംഘർഷത്തിന്റെ പശ്ചാത്തലത്തിലാണ് പള്ളിയില്‍ നിന്നു പത്രക്കെട്ടെടുക്കാന്‍ സൈക്കിളില്‍ പോകവെ സൈദാര്‍ പള്ളിക്ക് സമീപം ഫസൽ കൊല്ലപ്പെടുന്നത്.

ഫസൽ കൊല്ലപ്പെടുന്ന സമയത്ത് അന്നത്തെ ആഭ്യന്തര മന്ത്രിയും, തലശ്ശേരി എംഎൽഎയുമായ സഖാവ് കോടിയേരി ബാലകൃഷ്ണൻ തലശ്ശേരിയിൽ തന്നെ ഉണ്ടായിരുന്നു. സംഘപരിവാരവുമായി നിലനിന്നിരുന്ന സംഘർഷത്തിന്റെ പശ്ചാത്തലത്തിൽ ഫസലിന്റെ കൊലയ്ക്കുത്തരവാദികൾ സംഘപരിവാരം ആയിരിക്കുമെന്ന നിഗമനത്തിലാണ് ബന്ധപ്പെട്ടവർ ആദ്യം എത്തിയത്. ഫസലിന്റെ മൃദദേഹം കാണാൻ തലശ്ശേരി അശുപത്രിയിൽ വന്ന ആഭ്യന്തര മന്ത്രി കോടിയേരിയും കൊലയ്ക്കുത്തരവാദികൾ സംഘപരിവാരം ആണെന്ന നിലയ്ക്കുള്ള പ്രസ്താവനയാണ് നടത്തിയത്. മാത്രമല്ല സിപിഎം ഏരിയ കമ്മറ്റി സെക്രട്ടറി കാരായി രാജൻ സാമുദായിക സംഘർഷം ഉണ്ടാക്കാനുള്ള ബോധപൂർവമായ ശ്രമത്തിന്റെ ഭാഗമായി സംഘപരിവാരമാണ് കൊല നടത്തിയതെന്ന പ്രസ്താവനയും നടത്തി.

പക്ഷെ അന്വേഷണത്തിന്റെ ആദ്യസൂചനകൾ തന്നെ പ്രതിസ്ഥാനത്ത് സംഘപരിവാരമല്ല മറിച്ച് സിപിഎം പ്രവർത്തകർ ആണെന്ന സൂചനകൾ ആണു നൽകിയത്. എന്നാല്‍ കേസ് അന്വേഷണം പുരോഗമിക്കുമ്പോഴേക്കും അന്വേഷണ ഉദ്യോഗസ്ഥനെ മാറ്റിക്കൊണ്ട് ഉത്തരവിറങ്ങി. ഒന്നും രണ്ടു തവണയല്ല മൂന്നു തവണയാണ് ഫസൽ വധക്കേസിലെ അന്വേഷണ ഉദ്യോഗസ്ഥരെ ഇടതുപക്ഷ സർക്കാർ മാറ്റിപ്രതിഷ്ഠിച്ചത്. അന്വേഷണം നടത്തിയ ഉദ്യോഗസ്ഥർ ആകട്ടെ സംഘപരിവാരമല്ല മറിച്ചു സിപിഎമ്മാണു കൊലക്കു പിന്നിലെന്ന യാഥാർഥ്യം ഗ്രഹിച്ചവർ ആയിരുന്നു. അവസാനം കൊലപാതകവുമായി ബന്ധപ്പെട്ടു ചില സിപിഎം പ്രവർത്തകരെ അറസ്റ്റ് ചെയ്യുകയും ചെയ്തു.

ഫസല്‍ വധക്കേസില്‍ സിപിഎം പ്രവര്‍ത്തകരെ അറസ്റ്റ് ചെയ്ത ഡിവൈഎസ്‌പി ദുരൂഹമായ സാഹചര്യത്തിൽ ഒരു പെണ്ണുകേസിൽ അകപ്പെടുകയും സസ്പെൻഷനിൽ ആകുകയും ചെയ്തു. കേസ് അന്വേഷണം ഈ നിലക്കു മുന്നോട്ടു പോയാൽ ഇടതുപക്ഷ സർക്കാരിന്റെ പോലീസിൽ നിന്നു ഫസൽ വധകേസിൽ നീതി ലഭിക്കുകയില്ല എന്ന യാഥാർത്ഥ്യത്തിൽ നിന്നാണ് ഫസലിന്റെ വിധവ മറിയു ഫസൽ വധം സിബിഐ അന്വേഷിക്കണമെന്നാവശ്യപ്പെട്ടു ഹൈക്കോടതിയെ സമീപിക്കുന്നത്.

കേസ് അന്വേഷണത്തിൽ ആഭ്യന്തര വകുപ്പു നിരന്തരം നടത്തിയ ഇടപെടലുകളും, അട്ടിമറികളും തെളിവു സഹിതം ഹൈക്കോടതിയെ ബോധിപ്പിച്ചു. മറിയുവിന്റെ വാദം അംഗീകരിച്ചും സർക്കാരിന്റെ ശക്തമായ എതിർവാദം നിരാകരിച്ചും ഫസൽ വധക്കേസ് സിബിഐക്കു വിടാൻ ഹൈക്കോടതി തിരുമാനമെടുത്തു. ഈ വിധിക്കെതിരെ ഇടതുപക്ഷ സർക്കാർ സുപ്രീം കോടതിയിൽ ഹർജി നൽകി. ഒരു സിറ്റിങ്ങിനു ലക്ഷങ്ങൾ പ്രതിഫലം വാങ്ങുന്ന വക്കീലിനെ സർക്കാർ ചെലവിൽ നിശ്ചയിച്ചുകൊണ്ടാണ് സർക്കാർ സുപ്രീം കോടതിയിൽ ഹർജി നൽകിയത്. എന്നാൽ സർക്കാരിന്റെ വാദം തള്ളിക്കൊണ്ട് ഫസൽ വധക്കേസ് സിബിഐക്കു വിടാനുള്ള ഹൈക്കോടതി വിധി അംഗീകരിക്കുകയാണ് സുപ്രീംകോടതി ചെയ്തത്. കേസ് അന്വേഷണത്തിൽ അനാവശ്യമായ ഭരണകൂട ഇടപെടൽ നടന്നതായി ഇരു കോടതികളും എടുത്തു പറയുകയും സർക്കാരിന്റെ സമീപനത്തെ ശക്തമായി വിമർശിക്കുകയും ചെയ്തു.

സിബിഐ അന്വേഷിച്ചുകൊണ്ടിരിക്കുന്ന ഈ കേസിൽ ഇതുവരെ അറസ്റ്റിലായത് എല്ലാം സിപിഎം പ്രവർത്തകർ. കൊലപാതകത്തിനുത്തരവാദികള്‍ സംഘപരിവാരം ആണെന്നു പ്രസ്താവന ഇറക്കിയ അന്നത്തെ സിപിഎം ഏരിയാ സെക്രട്ടറിയും, ഇപ്പോൾ ജില്ലാ കമ്മറ്റി അംഗവുമായ കാരായി രാജനെ അടക്കം അറസ്റ്റ് ചെയ്യാനുള്ള നടപടികള്‍ നടന്നുവരുന്നു. പാർട്ടി ജില്ലാ സെക്രട്ടറി ആയിരുന്ന പി. ശശിയെ ഫസൽ വധക്കേസുമായി ബന്ധപ്പെട്ടു സിബിഐ ചോദ്യം ചെയ്തു കഴിഞ്ഞു. പാർട്ടിയിലെ പല താപ്പാനകളും ഫസൽ വധക്കേസിന്റെ അന്വേഷണപരിധിയിൽ ആണെന്ന റിപ്പോർട്ടുകളും വരുന്നു. സിബിഐ നൽകിയ എഫ് ഐ ആറിൽ ഫസലിനെ വധിച്ചതു സിപിഎം തന്നെയാണെന്നു പറയുന്നു. സിപിഎം പ്രവർത്തകൻ ആയിരുന്ന ഫസൽ എൻഡിഎഫിൽ ചേർന്ന വൈരാഗ്യത്തിലാണ് സിപിഎം കൊലപ്പെടുത്തിയത്. മാത്രമല്ല ദേശാഭിമാനി വരിക്കാരായിരുന്ന ചില വീടുകളിൽ തേജസ് ദിനപത്രം വരിചേർപ്പിച്ചതും കൊലപാതകത്തിനു കാരണമായതായി സിബിഐ കോടതിയിൽ ബോധിപ്പിച്ചിരിക്കുന്നു.

ഇവിടെ കൊലപാതത്തേക്കാൾ മാരകമായിരുന്നു അതിനു തെരഞ്ഞെടുത്ത സമയവും അതിന്റെ ഉത്തരവാദിത്വം സംഘപരിവാരത്തിന്റെ മേലെ ചാർത്താനുള്ള സിപിഎമ്മിന്റെയും സർക്കാരിന്റെയും ശ്രമങ്ങളും. സംഘപരിവാരവുമായി നിലനിന്നിരുന്ന സംഘർഷ പശ്ചാത്തലം തന്നെയാണ് ഫസലിനെ വെട്ടിക്കൊലപ്പെടുത്താൻ സിപിഎം ഉപയോഗിച്ചത്. മാത്രമല്ല ആഭ്യന്തര മന്ത്രിയായിരുന്ന കോടിയേരി ബാലകൃഷ്ണൻ കൊലപാതകത്തിനു പിന്നിൽ സംഘപരിവാരം ആണെന്നു പ്രസ്താവന ഇറക്കുകയും ചെയ്തു.

സിപിഎം സ്വയം ചെയ്ത ഒരു കൊലപാതകത്തിന്റെ ഉത്തരവാദിത്വം തന്ത്രപരമായി സർക്കാർ മെഷിനറിയെ ഉപയോഗിച്ചു സംഘപരിവാരത്തിന്റെ മേലെ ചാർത്താൻ ശ്രമിച്ചത് ഏതു ലക്ഷ്യം വെച്ചായിരുന്നു? സ്വയം രക്ഷപ്പെടാനുള്ള ശ്രമത്തേക്കാളുപരി ഒരു വർഗ്ഗീയ സംഘർഷ സാധ്യത മനഃപൂർവം സൃഷ്ടിക്കാനുള്ള വൻ ഗൂഢാലോചനയുടെ ഭാഗമായിട്ടാണ് അടിസ്ഥാനരഹിതമായ ഈ ആരോപണം സിപിഎം ബോധപൂർവം ഉന്നയിച്ചത് എന്നു വ്യക്തം. പാർട്ടിയിൽ നിന്നു വിട്ടുപോയ വർഗ്ഗശത്രുവിനെ ഇല്ലായ്മ ചെയ്യുക എന്ന പ്രഥമ അജണ്ടക്കുപരി ഈ കൊലപാതകത്തെ തുടർന്നു രൂപപ്പെടുന്ന വർഗ്ഗീയ സാമുദായിക വേർതിരിവും അവിടെ സമാധാനദൂതുമായിവന്നു കളംനിറഞ്ഞുകളിക്കാം എന്ന കണക്കുകൂട്ടലും പാർട്ടി ലക്ഷ്യം വെച്ചിരുന്നു എന്നു ചുരുക്കം.

എന്നാൽ ബന്ധപ്പെട്ടവരുടെ പ്രത്യേകിച്ച് എൻഡിഎഫിന്റെ ഭാഗത്തു നിന്നുണ്ടായ കനത്ത ജാഗ്രത മൂലം ഒരനിഷ്ടസംഭവം പോലും ഫസലിന്റെ വധം മൂലം രൂപപ്പെട്ടില്ല എന്നു മാത്രമല്ല സർക്കാരിന്റെയും, സിപിഎമ്മിന്റെയും ഭാഷ്യം വിശ്വസിക്കാനും എൻഡിഎഫ് തയ്യാറായില്ല. അതുകൊണ്ട് തന്നെ കലക്കവെള്ളത്തിൽ മീൻ പിടിക്കാനുള്ള സിപിഎമ്മിന്റെ ശ്രമം തലശ്ശേരിയിൽ പരാജയപ്പെടുകയാണുണ്ടായത്.

ഈ പശ്ചാത്തലത്തിൽ നിന്നുകൊണ്ടാണ് കൊട്ടേഷൻ ടീമിന്റെ സ്റ്റിക്കറും, പാർട്ടി സെക്രട്ടറിയുടെ പ്രസ്താവനയും, പാർട്ടി ചാനലിന്റെ പ്രചാരണത്തെയും വിലയിരുത്താൻ. ആഗോളതലത്തിൽ തന്നെ ഇസ്ലാം വിരുദ്ധ ശക്തികള്‍ പരീക്ഷിച്ചു വിജയിച്ച, ഇന്ത്യയിൽ ഏറെക്കാലമായി പരീക്ഷിച്ചു കൊണ്ടിരിക്കുന്ന ഒരു തന്ത്രമാണ് മതേതരത്വത്തിലും, മതസൌഹാർദ്ദത്തിലും സർവോപരി മാനവികതയിലും വിശ്വസിക്കുന്നു എന്ന് പറയുന്ന സിപിഎം പയറ്റിയത് എന്നത് തീർത്തും നിസാര സംഭവമല്ല. വ്യക്തമായ സാമുദായിക ചേരിതിരിവ് രൂപപ്പെടുത്തുമാറ് പാർട്ടിയുമായി ബന്ധപ്പെട്ട് ഉയർന്നു വരുന്ന ആരോപണത്തിന്റെ കുന്തമുന സാമുദായികമായി വഴിതിരിച്ചു വിട്ടു നേട്ടം കൊയ്യാനുള്ള ശ്രമത്തിന്റെ ഭാഗമായിട്ടുവേണം ഈ ശ്രമങ്ങളെ വീക്ഷിക്കാൻ.

ഫസൽ വധക്കേസ് സംഘപരിവാരത്തിന്റെ മേലെ ചാർത്തിക്കൊണ്ട് രൂപപ്പെടുത്താൻ ശ്രമിച്ച സാമുദായിക ധ്രുവീകരണം തന്നെയാണ് അറബി സ്റ്റിക്കർ കൊണ്ടും കൊലയാളികൽ ഉദ്ദേശിച്ചതെന്ന് വ്യക്തം. ഇവിടെ കൊലയാളികളുടെ തെളിവു നശിപ്പിക്കാനുള്ള, അല്ലെങ്കിൽ അന്വേഷണത്തെ വഴിതിരിച്ചു വിടാനുള്ള ശ്രമത്തിന്റെ ഭാഗമായിട്ടാണ് അറബി സ്റ്റിക്കർ പതിച്ചതെങ്കിൽ ഈ അജണ്ട തന്നെയായിരുന്നു പാർട്ടി സെക്രട്ടറിയുടെ പ്രസ്താവനയിൽ നിന്നും, പാർട്ടി ചാനലിന്റെ പ്രചാരണത്തിൽ നിന്നും വെളിപ്പെടുന്നത്. സമൂഹത്തിൽ അടിക്കടി ഉണ്ടാകുന്ന സംഘർഷത്തിന്റെയും, സാമുദായിക ചേരിതിരിവുകളുടെയും അടിസ്ഥന കാരണങ്ങൾ അന്വേഷിച്ചാൽ ചെന്നെത്തുക ഇത്തരം കുതന്ത്രങ്ങളിലായിരിക്കുമെന്നത് ഒട്ടും ആശാസ്യമല്ല

സിപിഎം പോലുള്ള ഒരു പാർട്ടിക്കു ചേരുന്നതാണോ ഈ സാമുദായിക അജണ്ടകൾ എന്ന് ബന്ധപ്പെട്ടവർ പരിശോധിക്കേണ്ടതുണ്ട്. സമൂഹത്തിൽ വർഗ്ഗീയ സ്പർദ്ധ ഉണ്ടാക്കിക്കൊണ്ട് അതിൽ നിന്നു മുതലെടുക്കാൻ പാകത്തില്‍ രാഷ്ട്രീയം പയറ്റുക എന്നതാണോ സിപിഎം സ്വയം മുന്നോട്ടുവെക്കുന്ന പുരോഗമന രാഷ്ട്രീയത്തിന്റെ കാതൽ എന്നും സ്വയം വിലയിരുത്തേണ്ടതുണ്ട്. എന്‍കൌണ്ടര്‍ എന്ന വിശേഷണത്തിലൊളിച്ച് നിരായുധരായ എതിരാളികളെ കൊന്നുതള്ളി അവരുടെ ജഡത്തിൽ ആയുധവും, മതഗ്രന്ഥവും നിക്ഷേപിക്കുന്ന വർഗ്ഗീയ ഫാഷിസ്റ്റ് രാഷ്ട്രീയത്തിൽ നിന്നു അകലെയല്ല സിപിഎം മുന്നോട്ടു വെക്കുന്ന മതേതര രാഷ്ട്രീയം എന്നുവരുന്നത് അപകടകരമാണ്. അധികാരം നിലനിർത്താനായി, പാർട്ടി എതിരാളികളെ ഇല്ലായ്മ ചെയ്യാനായി വർഗ്ഗീയ ചേരിതിരിവടക്കം എതു തന്ത്രവും പാർട്ടി പയറ്റുമെന്നതിനുള്ള വ്യക്തമായ സൂചനയും.

പി കെ നൌഫല്‍

ഫസല്‍

കേരളം

Country:

Default Home Page

Authors:

പുലരി