malayal.am

അന്നവിചാരം, മുന്നവിചാരം

Gossip Mongers — Fri, 30 Dec 2011 09:49:21 +0000

അണ്ണായെന്നാണു പേര്. ചിലര്‍ അന്നാ എന്നും വിളിക്കും. അഴിമതി എവിടെക്കണ്ടാലും എതിര്‍ക്കുന്നതാണു ശീലം. പക്ഷേ സംഗതി ശീലിച്ചുവരാന്‍ സമയം കുറച്ചെടുത്തു. അതുകൊണ്ട് പ്രായം കുറേയായപ്പോഴാണ് പരിപാടിയുമായി ഇറങ്ങിയത്. പരിശീലനം പൂര്‍ത്തിയാക്കാതെ ഇറങ്ങിയിട്ടു കാര്യമില്ലല്ലോ. ‌‌

അന്നമാണ് പ്രധാനസമരായുധം. അന്നം ഉപേക്ഷിച്ചുകൊണ്ടുള്ള സമരപരിപാടിയാണ് പഥ്യം. ഉണ്ണാതെ ഇരുന്നുകളയും. ഉണ്ടുമടുത്തവനോടുപോലും ഉരുളവാങ്ങില്ല. ഒടുക്കം ഉണ്ണാമന്മാരാരായാലും മുട്ടുമടക്കി, എന്തെങ്കിലുമൊക്കെ ബില്‍ പാസാക്കിവിടുന്നതുവരെ ഊണില്ല, ഉറക്കമില്ല, ഉച്ചമയക്കമോ പകല്‍ക്കിനാവോ പോലും ബന്ദ്...

പണിയൊക്കെ വിശപ്പിനോടും അഴിമതിയോടും മാത്രമേ നടക്കൂ എന്നതാണു പക്ഷേ, പ്രശ്നം. തണുപ്പിനോടും പനിയോടും ഇതൊന്നും നടക്കൂല കോയാ... അഴിമതി അവസാനിപ്പിക്കാനാണ് ത്വരയെന്ന മട്ടില്‍ പനിയോടു പനിമതി മുഖീബാലേ എന്നുപാടിയാലൊന്നും പനി പിടിതരില്ല. തെര്‍മോമീറ്റര്‍ തിളയ്ക്കും.

പനിയെന്നാല്‍ കുളിര്, അഥവാ തണുപ്പ് എന്നും അര്‍ത്ഥം. തണുപ്പാണ് ഇത്തവണ ചതിച്ചത്. ന്യൂഡല്‍ഹിയിലെ തണുപ്പിന്റെ താണ്ഡവം കണ്ടപ്പോള്‍ നിരാഹാരം മുംബൈയിലേക്കു മാറ്റി. അവിടെച്ചെന്നപ്പോള്‍ സ്ഥലം പന്തളമാണോ എന്നു സംശയം തോന്നിക്കുമാറ് പന്തോം കൊളുത്തിയായിരുന്നു തണുപ്പിന്റെ തകര്‍പ്പന്‍ പ്രകടനം. ഉണ്ണാവ്രതം കാലത്തു തുടങ്ങാമെന്നു കരുതിയിരുന്നത്, പതിനൊന്നരയ്ക്കു ശേഷം എന്നാക്കി മാറ്റി. അതാകുമ്പോള്‍ തണുപ്പും ഇത്തിരി മങ്ങും, പിന്നെ, ഉച്ചയൂണും കഴിച്ചേച്ച് നിരാഹാരം തുടങ്ങുകയും ചെയ്യാം. ഇതില്‍ പേടിക്കാനൊന്നുമില്ല. നന്നായി ഭക്ഷണം കഴിച്ചിട്ട് നിരാഹാരം തുടങ്ങിയാല്‍ കൂടുതല്‍ സമയം അതു ചെയ്യാനാകും. സമരം വര്‍ദ്ധിതവീര്യവത്താകും, ഫലസിദ്ധിയുണ്ടാകും. സിദ്ധികൂടാതെ സമരനായകനായി തുടരാന്‍ സാദ്ധ്യത കൂടും. സ്വന്തം നാടായ മറ്റേ സിദ്ധിയിലേക്കു തിരിച്ചുംപോകാം.

പക്ഷേ, പനിയും മറ്റേ പനിയും കൂടി വശംകെടുത്തിക്കളഞ്ഞു. തണുപ്പേറ്റു പുതച്ചുറങ്ങിയ മദ്ധ്യവര്‍ഗപെറ്റിബൂര്‍ഷ്വാസികള്‍ സമരപ്പന്തലിലേക്കു വന്നതേയില്ല. അല്ലെങ്കിലും ഈ പെറ്റിബൂര്‍ഷ്വാസിയെ വിശ്വസിച്ചതാണു പണ്ടു കാള്‍ മാര്‍ക്സിനും മാനിഫെസ്റ്റോ തെറ്റിപ്പോകാന്‍ കാരണം. മാര്‍ക്സിനെ കണക്കിലെടുക്കാതെ മഹാത്മാ അദ്വാനിജിയെയും ബാബാ ആംതേ, സോറി, രാംദേവിനെയും മാത്രം വിശ്വസിച്ചതാണ് പറ്റിപ്പായിപ്പോയത്.

വൈകുന്നേരത്തോടെ നിരാഹാരത്തിന്റെ രീതിയൊന്നുമാറ്റിനോക്കി. വൈകുന്നേരം വരെ നിരാഹാരം. പിന്നെ, ഇടവേള, കാലത്തു നിരാഹാരം തുടരുക... അതു ബുദ്ധിപരമായിരുന്നു. നേരത്തോടു നേരം നിരാഹാരം. എന്നുവച്ചാല്‍ വിശക്കുന്നതുവരെ നിരാഹാരം. വിശക്കുമ്പോള്‍, നിരയായി ആഹാരം എന്നതായി ഇന്നുവരെ ആരും പരീക്ഷിച്ചിട്ടില്ലാത്ത സമരമുറ. അതും പാളി. അത്രയ്ക്കായിരുന്നു തണുപ്പ്.

നിങ്ങള്‍ക്കും ശാസ്ത്രത്തിനും അറിയാമല്ലോ, തണുപ്പില്‍ വിശപ്പുകൂടും. ദാഹം കുറയും, പക്ഷേ, വിശന്നുപണ്ടാരമടങ്ങിപ്പോകും. അതുകൊണ്ടുകൂടിയാണ്, പനി സഹായിച്ച്, രണ്ടാം പക്കം തീര്‍ന്നപ്പോഴേക്കും നിരാഹാരം അവസാനിപ്പിച്ചത്.

അഴിമതിയാണ് ഇന്ത്യയുടെ ഒന്നാമത്തെ പ്രശ്നമെന്നായിരുന്നു ഇതുവരെ ധരിച്ചിരുന്നത്. എന്നാല്‍, ധരിക്കാനൊന്നുമില്ലാത്ത അനേകമാളുകളുള്ള ഈ രാജ്യത്ത് തണുപ്പാണ് അഴിമതിയെക്കാള്‍ വലിയ പ്രശ്നമെന്നു തിരിച്ചറിയാന്‍ ഈ സമരകാലം ഉപകരിച്ചു എന്നു പറയാം. ഏതായാലും, അഴിമതിയുടെ കാര്യം അവിടെ നില്‍ക്കട്ടെ, ഇനി സമരം തണുപ്പിനെതിരെയാണ്. ഠണ്ഡാ... ഠണ്ഡാ... കൂള്‍ കൂള്‍....

കൂള്‍ തേല്‍ ബില്‍... അതാണാദ്യം പാസാക്കേണ്ടത്. അതുകഴിഞ്ഞുമതി, ലോക് പാല്‍ ബില്‍...

അണ്ണ ഹസാരെ

പരിഹാസം

Country:

Default Home Page

Authors:

Gossip Mongers

അണ്ണാ ഹസാരേ സംഘം ഡിസംബര്‍ 27 മുതല്‍ നിരാഹാരം തുടങ്ങും

News Desk — Wed, 30 Nov 2011 03:06:47 +0000

ലോക്പാല്‍ കരട് ബില്ലില്‍ പ്രതിഷേധിച്ച് ഡിസംബര്‍ 27 മുതല്‍ വീണ്ടും അനിശ്ചിതകാല നിരാഹാരത്തിനൊരുങ്ങുകയാണ് അണ്ണാ ഹസാരേ സംഘം. പാര്‍ലമെന്ററി സ്ഥിരംസമിതി മുന്നോട്ടു വച്ച കരടില്‍ ജനങ്ങളെ വഞ്ചിക്കുന്ന കുത്തിത്തിരിപ്പുകളുണ്ടെന്നും തങ്ങളെ വിഡ്ഢികളാക്കാമെന്നു സര്‍ക്കാര്‍ കരുതരുതെന്നും പ്രസ്താവിച്ചിട്ടുണ്ട്.

അനിശ്ചിതകാലനിരാഹാരത്തിനു മുന്നോടിയായി ഡിസംബര്‍ പതിനൊന്നിന് ഹസാരെ സൂചനാനിരാഹാരം നടത്തും. ഉടന്‍ തിരഞ്ഞെടുപ്പ് നടക്കാനിരിക്കുന്ന അഞ്ചു സംസ്ഥാനങ്ങളിലും ലോക് പാലിലെ വഞ്ചന തുറന്ന് കാണിക്കാന്‍ താന്‍ പര്യടനം നടത്തുമെന്നും ഹസാരെ ഭീഷണിമുഴക്കുന്നു. കോണ്‍ഗ്രസിനെ സമ്മര്‍ദ്ദത്തിലാക്കാനാണ് ഹസാരേയുടെ നീക്കമെന്ന് ഇതുറപ്പുനല്കുന്നു.

പാര്‍ലമെന്റിന്റെ ശൈത്യകാലസമ്മേളനത്തില്‍ ശക്തമായ ലോക്പാല്‍ പാസ്സാക്കിയേ പറ്റൂ എന്നാണ് ഹസാരേയുടെ അന്ത്യശാസനം.

ജുഡീഷ്യറിയെയും സിബിഐയെയും ഒഴിവാക്കിക്കൊണ്ടുള്ള കരട് ലോക്പാല്‍ ബില്‍ ജനങ്ങളുടെ കണ്ണില്‍ പൊടിയിടാനുള്ളതാണെന്നാണ് ഹസാരേ സംഘം ആരോപിക്കുന്നത്. എന്നാല്‍, സന്നദ്ധസംഘടനകളെയും മാധ്യമങ്ങളെയും ലോക്പാല്‍ പരിധിയില്‍ കൊണ്ടുവരുന്നതിനെ സംഘം എതിര്‍ക്കുകയും ചെയ്യുന്നു.

മാധ്യമങ്ങളിലും സന്നദ്ധസംഘടനകളിലും അഴിമതിയുണ്ടെങ്കില്‍ അതു തടയാന്‍ പ്രസ് കൗണ്‍സിലിനെയും രജിസ്ട്രാര്‍ ഓഫ് സൊസൈറ്റി ആന്‍ഡ് ട്രസ്റ്റ് ആക്ടിനെയും ശക്തിപ്പെടുത്തിയാല്‍ മതിയെന്നാണ് ഹസാരേ സംഘത്തിന്റെ നയം.

അണ്ണ ഹസാരെയുടെ ക്യാരിക്കേച്ചര്‍

ദേശീയം

Country:

Default Home Page

Authors:

News Desk

ഹസാരെ ശീതകാലം വരെ കോണ്‍ഗ്രസിനെ ആക്രമിക്കില്ല!

News Desk — Sat, 15 Oct 2011 05:08:07 +0000

ന്യൂ ഡല്‍ഹി: കോണ്‍ഗ്രസ്സിന് തത്കാലം ആശ്വസിക്കാം. കോണ്‍ഗ്രസ്സിനൊഴിച്ച് മറ്റാര്‍ക്കും വോട്ടു ചെയ്യൂ എന്ന് ആഹ്വാനം ചെയ്യുന്നത് പാര്‍ലമെന്റിന്റെ ശീതകാലസമ്മേളനം കഴിയുന്നതു വരെ നീട്ടിവയ്ക്കാന്‍ ഹസാരെ തീരുമാനിച്ചു.

ബില്‍ പാസാക്കുമോ എന്നറിയാന്‍ ശീതകാലസമ്മേളനം കഴിയും എന്നും അതുവരെമൌനം പാലിക്കാമെന്നുമാണ് ഹസാരെയുടെ തീരുമാനമെന്ന് ഹസാരെ ടീം പ്രമുഖന്‍ അരവിന്ദ് കെജ്രിവാള്‍ പറഞ്ഞു. അതുവരെ ബില്ലിനെക്കുറിച്ച് ജനങ്ങല്‍ക്കിടയില്‍ ബോധവല്‍ക്കരണം നടത്തുമെന്നും കെജ്രിവാള്‍ മാധ്യമങ്ങളെ അറിയിച്ചു.

കഴിഞ്ഞ ദിവസം ഉപതെരഞ്ഞെടുപ്പു നടന്ന ഹിസാര്‍ മണ്ഡലത്തില്‍ കോണ്‍ഗ്രസ് സ്ഥാനാര്‍ത്ഥിക്കെതിരെ പരസ്യമായി ഹസാരെ രംഗത്തുവന്നിരുന്നു.

അണ്ണ ഹസാരെയും അരവിന്റ് കെജ്രിവാളും

ദേശീയം

Country:

Default Home Page

Authors:

News Desk

കശ്മീരിനെക്കുറിച്ചുള്ള പ്രശാന്ത് ഭൂഷണിന്റെ അഭിപ്രായം വ്യക്തിപരം- ഹസാരെ

News Desk — Sat, 15 Oct 2011 05:07:36 +0000

മഹാരാഷ്ട്ര: കശ്മീരില്‍ ഹിതപരിശോധനയാവാം എന്ന പ്രശാന്ത് ഭൂഷണിന്റെ അഭിപ്രായം തികച്ചും വ്യക്തിപരമെന്ന് അണ്ണ ഹസാരെ പറഞ്ഞു. ഹസാരെ ടീമിലെ പ്രമുഖനെന്ന നിലയില്‍ പ്രശാന്ത് ഭൂഷണിന്റെ ഈ അഭിപ്രായത്തിനോട് ടീമിനും തനിക്കും യോജിപ്പില്ലെന്നും ഹസാരെ വ്യക്താക്കി. ഇത്തരമൊരഭിപ്രായപ്രകടനത്തിനു മുമ്പ് ഭൂഷണ്‍ ടീമിനോട് കൂടിയാലോചന നടത്തിയിട്ടില്ലെന്നും ഹസാരെ പറഞ്ഞു.

എന്നാല്‍ ഇതിന്റെ പേരില്‍ ടീമില്‍ ഭിന്നതകളുണ്ടെന്ന അഭ്യൂഹം അദ്ദേഹം തള്ളി. പ്രഷാന്ത് ഭൂഷണ്‍ ടീമിന്റെ അവിഭാജ്യഘടകമാണെന്ന് വ്യക്തമാക്കിയ ഹസാരെ ജന്‍ലോക്‍പാല്‍ ബില്‍ നടപ്പാക്കി അഴിമതിയില്‍ നിന്ന് രാജ്യത്തെ മുക്തമാക്കുക എന്ന ഒറ്റ നയമേ ടീമിനു മുന്നിലുള്ളൂ എന്നും പറഞ്ഞു.

പ്രശാന്ത് ഭൂഷണും അണ്ണ ഹസാരെയും

വര്‍ത്തമാനം

Country:

Default Home Page

Authors:

News Desk

ലോക്പാല്‍ വിഷയത്തില്‍ നിരാഹാരസമരവുമായി എ ബി ബര്‍ദനും

News Desk — Sat, 15 Oct 2011 05:06:07 +0000

ന്യൂ ഡല്‍ഹി: ശീതകാലസമ്മേളനത്തില്‍ തന്നെ ലോക്പാല്‍ ബില്‍ പാസാക്കണമെന്ന് ആവശ്യപ്പെട്ട് സി പി ഐ നേതാവ് എ ബി ബര്‍ദനും നിരാഹാരസമരത്തിനൊരുങ്ങുന്നു. ഈ മാസം 21 ന് ദില്ലിയിലെ ജന്തര്‍മന്തറിലാണ് നിരാഹാരസമരം നടക്കുക.

ലോക്പാല്‍ വിഷയം ഉയര്‍ത്തി അണ്ണ ഹസാരെ നടത്തിയ സമരം സര്‍ക്കാരിനെ പ്രതിരോധത്തിലാക്കിയതിനു പിന്നാലെയാണ് അതേ ആവശ്യമുന്നയിച്ച് ഒരു ഉന്നത രാഷ്ട്രീയ നേതാവ് നിരാഹാരത്തിനൊരുങ്ങുന്നത്.

എ ബി ബര്‍ദ്ദാന്‍, സിപിഐ ജനറല്‍ സെക്രട്ടറി

ദേശീയം

Country:

Default Home Page

Authors:

News Desk