malayal.am

കൊട്, വക്കത്തിനൊരു പൊന്മോതിരം

Shibu Joseph — Thu, 04 Aug 2011 17:10:28 +0000

കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസിനുണ്ടായ തിരിച്ചടികള്‍ വിലയിരുത്താനും പാര്‍ട്ടി നേതാക്കളുടെയും പ്രവര്‍ത്തകരുടെയും പരാതികള്‍ അറിയാനുമായി കെ പി സി സി ചുമതലപ്പെടുത്തിയ ഉന്നതതല കമ്മിറ്റി മാസങ്ങള്‍ നീണ്ട പരിശോധനകള്‍ക്ക് ശേഷം ഫലം പുറത്തുവിട്ടു.

കടുത്ത നിലപാടുകാരനായ വക്കം പുരുഷോത്തമന്‍ കമ്മിറ്റിയുടെ ചെയര്‍മാനായതിനാല്‍ ഫലം വളരെ വേഗത്തില്‍ പുറത്തുവരുമെന്ന് ഉറപ്പായിരുന്നു, അത് സംഭവിക്കുകയും ചെയ്തു. കമ്മിറ്റിയുടെ കണ്ടെത്തല്‍ വലിയൊരു കണ്ടെത്തല്‍ തന്നെയാണ്. ഇന്ത്യയിലെ ഏറ്റവും വലിയ ജനാധിപത്യ പാര്‍ട്ടിയുടെ കേരളത്തിലെ ഘടകമല്ലേ, കമ്മിറ്റിയും അന്വേഷണവും തെളിവെടുപ്പുമൊക്കെ മുറയ്ക്ക് നടന്നില്ലെങ്കില്‍ പിന്നെന്ത് പാര്‍ട്ടി? പിന്നെന്ത് ജനാധിപത്യം.

നിയമസഭാ തിരഞ്ഞെടുപ്പില്‍ പല മണ്ഡലങ്ങളിലും യു ഡി എഫ് സ്ഥാനാര്‍ത്ഥികളെ അതില്‍ തന്നെ കോണ്‍ഗ്രസ് സ്ഥാനാര്‍ത്ഥികളെ തോല്‍പ്പിക്കാന്‍ കോണ്‍ഗ്രസില്‍ വ്യാപകമായി കാലുവാരല്‍ നടന്നുവെന്നാണ് വക്കം പുരുഷോത്തമന്‍ കമ്മിറ്റിയുടെ കണ്ടെത്തല്‍. തിരഞ്ഞെടുപ്പ് മുന്നൊരുക്കം നടത്തുന്ന കാര്യത്തില്‍ സംഘടനാപരമായ ദൗര്‍ബല്യം പ്രകടമായിരുന്നുവെന്നും ഇത് സംബന്ധിച്ച് പലയിടത്ത് നിന്നും നൂറുകണക്കിന് പരാതികള്‍ ലഭിച്ചതായും വക്കം പുരുഷോത്തമന്‍ വ്യക്തമാക്കി. സ്ഥാനാര്‍ത്ഥി നിര്‍ണയത്തിലും അപാകതയുണ്ടായി. വസ്തുനിഷ്ഠമായ റിപ്പോര്‍ട്ടാണിത്. മുഖം നോക്കാതെയാണ് റിപ്പോര്‍ട്ട് തയ്യാറാക്കിയതെന്നും വക്കം അവകാശപ്പെടുന്നുണ്ട്. പലയിടത്തും കാലുവാരല്‍ നടന്നതായുള്ള സ്ഥാനാര്‍ത്ഥികളുടെ പരാതിയില്‍ കഴമ്പുണ്ടെന്നും നടപടി തീരുമാനിക്കേണ്ടത് കെ പി സി സിയാണെന്നും വക്കം വ്യക്തമാക്കി.

റിപ്പോര്‍ട്ട് അദ്ദേഹം കെ പി സി സി പ്രസിഡന്റ് രമേശ് ചെന്നിത്തലയ്ക്ക് സമര്‍പ്പിച്ചു. ചിലയിടങ്ങളില്‍ അച്ചടക്ക നടപടിയ്ക്കും റിപ്പോര്‍ട്ടില്‍ ശുപാര്‍ശ ചെയ്തിട്ടുണ്ട്. രണ്ട് മാസം കൊണ്ടാണ് തെളിവെടുപ്പ് നടത്തിയ കമ്മിറ്റി റിപ്പോര്‍ട്ട് തയ്യാറാക്കിയത്. എ സി ജോസ്, വി എസ് വിജയരാഘവന്‍ എന്നീ മുതിര്‍ന്ന നേതാക്കളും അന്വേഷണസംഘത്തില്‍ അംഗങ്ങളായിരുന്നു. തെരഞ്ഞെടുപ്പിലെ കോണ്‍ഗ്രസിന്റെ മോശം പ്രകടനത്തെക്കുറിച്ച് പഠിക്കാന്‍ വക്കം അധ്യക്ഷനായ സമിതിയെ കെ പി സി സി നിയോഗിച്ചശേഷം മൂന്നുമാസത്തെ സാവകാശമാണ് റിപ്പോര്‍ട്ട് നല്‍കാന്‍ അനുവദിച്ചത്. വക്കം സ്വതവേ ശുഷ്‌കാന്തിക്കാരനായതിനാല്‍ വെറും രണ്ടുമാസം കൊണ്ട് അന്വേഷണവും റിപ്പോര്‍ട്ട് തയ്യാറാക്കലുമൊക്കെ നടന്നു. എല്ലാ ജില്ലകളിലും കമ്മിറ്റി ഓടിനടന്ന് തെളിവെടുത്തിരുന്നു. ഇനി വക്കം കമ്മിറ്റി ഒരിടത്തും പോയി തെളിവെടുത്തില്ലെങ്കിലും റിപ്പോര്‍ട്ട് ഇതുതന്നെയായിരിക്കും. ഇത് കോണ്‍ഗ്രസാണ്. കാലുവാരല്‍ നടക്കാത്ത ഏതെങ്കിലും തെരഞ്ഞെടുപ്പിനെക്കുറിച്ച് കോണ്‍ഗ്രസിന് പറയാനാകുമോ? പിന്നെ ഇത്രയും കാലം കോണ്‍ഗ്രസ് സ്ഥാനാര്‍ത്ഥികള്‍ ജയിച്ചിട്ടുണ്ടെങ്കില്‍ അത് പാര്‍ട്ടിയുടെയും പാര്‍ട്ടിക്കാരുടെയും കഴിവോ കാര്യപ്രാപ്തിയോ സഹായമോ ഒന്നും കൊണ്ടല്ല. അവനവന്റെ കഴിവുകൊണ്ടും നാട്ടുകാരുടെ സഹകരണം കൊണ്ടും മാത്രമാണ്.

പഞ്ചായത്ത് തെരഞ്ഞെടുപ്പ് മുതല്‍ ലോക്‌സഭാ തെരഞ്ഞെടുപ്പുവരെ കുതികാല്‍ വെട്ടിയും കാലുവാരിയും കാശടിച്ചുമാറ്റിയും വോട്ടുമറിച്ചും കോണ്‍ഗ്രസ് നേതാക്കളും പ്രവര്‍ത്തകരും സ്ഥാനാര്‍ത്ഥികളെ സഹായിക്കാറുണ്ട്. എതിര്‍ സ്ഥാനാര്‍ത്ഥികളുടെ ക്വാളിറ്റി പോലിരിക്കും പിന്നീടുള്ള കാര്യങ്ങള്‍. വക്കം പറഞ്ഞ കാര്യങ്ങളില്‍ ഒന്നൊഴികെ മറ്റെല്ലാം അക്ഷരം പ്രതി ശരിയാണ്. മുഖം നോക്കാതെയാണ് റിപ്പോര്‍ട്ട് തയ്യാറാക്കിയിരിക്കുന്നത് എന്ന കാര്യത്തില്‍ മാത്രം വിയോജിപ്പുണ്ട്.

മുഖം നോക്കാതെയാണെങ്കില്‍ പിന്നെ രമേശ് ചെന്നിത്തലയെയും ഉമ്മന്‍ ചാണ്ടിയെയും കുറിച്ച് ഒരക്ഷരം പോലും റിപ്പോര്‍ട്ടില്‍ പരാമര്‍ശിക്കാത്തതെന്താണ്? ചെന്നിത്തലയും ഉമ്മന്‍ ചാണ്ടിയും മുഖ്യമന്ത്രിക്കസേരയ്ക്കുവേണ്ടി നടത്തിയ കളികളല്ലേ യഥാര്‍ത്ഥത്തില്‍ കോണ്‍ഗ്രസിനുണ്ടായ തിരിച്ചടിയുടെ പ്രധാന കാരണം? അണികള്‍ക്കിടയില്‍ ആരാണ് മുഖ്യമന്ത്രിയെന്ന് ആശയക്കുഴപ്പമുണ്ടാക്കി പരസ്പരം മുതലെടുപ്പ് നടത്താനുള്ള അടവുകളല്ലേ കോണ്‍ഗ്രസിനെ കയ്യാലപ്പുറത്തെ തേങ്ങയാക്കി മാറ്റിയത്? തെരഞ്ഞെടുപ്പിനെ മുന്നില്‍ നിന്ന് നയിക്കേണ്ട കെ പി സി സി പ്രസിഡന്റ് തെരഞ്ഞെടുപ്പില്‍ കഷ്ടിച്ച് രക്ഷപെട്ടതിനെക്കുറിച്ച് റിപ്പോര്‍ട്ടില്‍ എന്തേ പരമര്‍ശമില്ലാത്തത്? ചോദ്യങ്ങള്‍ അവസാനിപ്പിക്കുകയാണ്, ചോദിക്കാനാണെങ്കില്‍ നാലുദിവസം രാപകലിരുന്ന് ചോദിക്കാന്‍ വകയുണ്ട് കോണ്‍ഗ്രസും നിയമസഭാ തെരഞ്ഞെടുപ്പും എന്ന വിഷയത്തെക്കുറിച്ച്. വക്കമായതുകൊണ്ട് റിപ്പോര്‍ട്ടെങ്കിലും ഉണ്ടായി, കൊട് കെ പി സി സി വക പൊന്‍മോതിരം ഒരെണ്ണം വക്കത്തിന്.

വക്കം

വിശകലനം

Country:

Default Home Page

Authors:

Shibu Joseph

വീഴ്ച പഠിക്കാന്‍ കോണ്‍ഗ്രസ്, മാസ്കറ്റ് ഹോട്ടലിലെ ഷെഫിനു പണിയായി!

Gossip Mongers — Wed, 08 Jun 2011 17:18:36 +0000

നിയമസഭാ തിരഞ്ഞെടുപ്പില്‍ കോണ്‍ഗ്രസിനുണ്ടായ മോശം പ്രകടനത്തെക്കുറിച്ച് പഠിക്കാന്‍ മൂന്നംഗ സമിതിയെ കെപിസിസി നിയോഗിച്ചതായി വാര്‍ത്ത. തലമുതിര്‍ന്ന നേതാക്കളും പഴയ പടക്കുതിരകളുമായ വക്കം പുരുഷോത്തമന്‍, വി എസ് വിജയരാഘവന്‍, എ സി ജോസ് എന്നിവരാണ് സമിതിയിലെ അംഗങ്ങള്‍. മൂന്നുമാസത്തിനകം പഠിച്ച് റിപ്പോര്‍ട്ട് നല്‍കാനാണ് സമിതിയോട് ആവശ്യപ്പെട്ടിരിക്കുന്നതെന്നും അറിയുന്നു.

കോണ്‍ഗ്രസ് നേതൃത്വം നല്‍കുന്ന യു ഡി എഫ് ഭരണത്തിലുള്ളതിനാല്‍ സമിതി അംഗങ്ങള്‍ക്ക് ഇനി കുശാലാണ്. മാസ്‌കറ്റ് ഹോട്ടലില്‍ നിന്ന് മൂന്നുനേരം ശാപ്പാടടിക്കാം. ഉണ്ടുറങ്ങി അന്വേഷണം നടത്താം. മൂന്നുമാസമെന്ന അന്വേഷണ കാലാവധി വെറുതെ ഡാവടിക്കുന്നതാണ്, വേണമെങ്കില്‍ അത് മൂന്നോ, മുപ്പതോ കൊല്ലം വരെയാകാം. വക്കം പുരുഷോത്തമനാണെങ്കില്‍ മുമ്പ് ഗോള്‍ഫ് ക്ലബായിരുന്നു ആസ്ഥാനം. ഗോള്‍ഫ് ക്ലബില്‍ അല്ലറ ചില്ലറ കശപിശയുള്ളതിനാല്‍ ടിയാനും ഇനി മാസ്‌കറ്റ് ഹോട്ടലില്‍ കാണും.

ഇനി എന്തായിരിക്കും കോണ്‍ഗ്രസിന്റെ മോശം പ്രകടനത്തിന് കാരണമായി ഇവര്‍ കണ്ടെത്തുക? എന്തുതരം അന്വേഷണമാകും ഇവര്‍ നടത്തുക? നാട്ടിലെ കോണ്‍ഗ്രസുകാരെയും വന്‍കിട-ചെറുകിട നേതാക്കളെയൊക്കെ കണ്ട് ഇവര്‍ പരാജയകാരണം പഠിക്കുമോ? ഇനി ഇവര്‍ പഠിച്ച് തയ്യാറാക്കുന്ന റിപ്പോര്‍ട്ട് ആര്‍ക്ക് കൊടുക്കും? റിപ്പോര്‍ട്ടില്‍ സ്വാഭാവികമായും മോശം പ്രകടനത്തിന് ഉത്തരവാദികളായ കുറെയേറെപ്പേര്‍ കാണില്ലേ? ഇവര്‍ക്കെതിരെ എന്തെങ്കിലും നടപടികള്‍ ഉണ്ടാവുമോ?

വെറുതെ ഇങ്ങനെ കുറെ ചോദ്യങ്ങള്‍ ചോദിച്ച് സമയം മെനക്കെടുത്താമെന്ന് മാത്രം. പഠന സമിതിയും അന്വേഷണ കമ്മിഷനും വെക്കാന്‍ ഈ കോണ്‍ഗ്രസുകാരെന്താ സി പി എമ്മിന് പഠിക്കുകയാണോ? ഒരു സമിതിയും അന്വേഷണം നടത്താതെ തന്നെ നാട്ടിലെ കോണ്‍ഗ്രസുകാര്‍ക്കും അല്ലാത്തവര്‍ക്കും കാരണങ്ങളൊക്കെ വ്യക്തമാണ്. മന്ത്രിയാകാത്തതിന്റെ വിഷമവും പേറി നടക്കുന്ന വി ഡി സതീശനും എം എല്‍ എയായിട്ടും മന്ത്രിയാകാതെ കെ പി സി സി പ്രസിഡന്റിന്റെ കസേരയൊഴിയാന്‍ രമേശ് ചെന്നിത്തല തയ്യാറാകാത്തതിന്റെ രോഷം ഉള്ളിലുള്ള വി എം സുധീരനും കെ പി സി സി നിര്‍വ്വാഹക സമിതി യോഗത്തില്‍ കാര്യങ്ങളൊക്കെ പച്ചയായി പറഞ്ഞിട്ടുണ്ട്. പിന്നെയെന്തിനൊരു പഠന സമിതി?

ഉമ്മന്‍ ചാണ്ടിയും രമേശ് ചെന്നിത്തലയും കൂടി സീറ്റുകള്‍ വീതിച്ചെടുത്ത് ഇഷ്ടക്കാര്‍ക്കൊക്കെ നല്‍കിയാല്‍ നാട്ടുകാര്‍ വോട്ട് ചെയ്ത് ജയിപ്പിക്കണമെന്ന് നിയമം വല്ലതുമുണ്ടോ? മൊത്തം സീറ്റുകള്‍ അവര്‍ എടുത്തെന്ന് പറയുന്നില്ല, അല്ലറ ചില്ലറ നക്കാപ്പിച്ചകള്‍ ചിലര്‍ക്കൊക്കെ കിട്ടിയിട്ടുണ്ട്. മുഖ്യമന്ത്രിയാകാന്‍ സ്വന്തം ഗ്രൂപ്പില്‍ എം എല്‍ എമാരുടെ എണ്ണം കൂട്ടാനുള്ള അങ്കമായിരുന്നു കോണ്‍ഗ്രസില്‍ സീറ്റ് വിഭജനവും സ്ഥാനാര്‍ത്ഥി നിര്‍ണയവും അടക്കമുള്ള കാര്യങ്ങളില്‍ ആദ്യം നടന്നത്. പിന്നീടാണ് തെരഞ്ഞെടുപ്പും വോട്ടെണ്ണലുമൊക്കെ വന്നത്. തല്‍ക്കാലം ഉമ്മന്‍ ചാണ്ടിയുടെ വീതംവെയ്പ്പിന് മുന്‍കൈ ലഭിച്ചതിനാല്‍ അങ്ങോര് മുഖ്യനായി.

പി കെ കുഞ്ഞാലിക്കുട്ടിയും ആര്‍ ബാലകൃഷ്ണപിള്ളയും പി ജെ ജോസഫും ടി എം ജേക്കബും ഒക്കെയുള്ള മുന്നണിക്ക് കോണ്‍ഗ്രസുകാര്‍ പോലും വോട്ടുചെയ്യാന്‍ മടിക്കുമെന്ന തെരഞ്ഞെടുപ്പ് രസതന്ത്രം കാലേകൂട്ടിയറിഞ്ഞ വി എസ് അച്യുതാനന്ദനെയാണ് കെ പി സി സി അന്വേഷണ സമിതി ആദ്യം അപ്പോയിന്റ്‌മെന്റ് എടുത്ത് കാണേണ്ടത്. കോണ്‍ഗ്രസിനുണ്ടായ മോശം പ്രകടനത്തെക്കുറിച്ച് ഇന്ന് കേരളത്തില്‍ ഇത്ര വ്യക്തമായി പറയാന്‍ കഴിയുന്ന ആള്‍ വി എം സുധീരനല്ല, മറിച്ച് സാക്ഷാല്‍ വി എസ് അച്യുതാനന്ദനാണ്.

കോണ്‍ഗ്രസിന്റെ മോശം പ്രകടനത്തിന് ഉത്തരവാദികള്‍ അഥവാ ഒന്നും രണ്ടും പ്രതികള്‍ ഉമ്മന്‍ ചാണ്ടിയും രമേശ് ചെന്നിത്തലയുമാണ്. ഇത് പറഞ്ഞത് ടി എന്‍ പ്രതാപനും വി എം സുധീരനും വി ഡി സതീശനും അടക്കമുള്ളവരാണ്. അന്വേഷണ സമിതി ഇവരെ തന്നെ കുറ്റക്കാരായി കണ്ടെത്തിയാല്‍ ഉമ്മന്‍ ചാണ്ടിയെ മുഖ്യമന്ത്രി സ്ഥാനത്തുനിന്നും രമേശ് ചെന്നിത്തലയെ കെ പി സി സി പ്രസിഡന്റ് സ്ഥാനത്തുനിന്നും മാറ്റുമോ? കാത്തിരിക്കാം, അന്വേഷണ റിപ്പോര്‍ട്ട് ആദ്യമിങ്ങ് വരട്ടെ.

പ്രത്യേക വാര്‍ത്ത:

കോണ്‍ഗ്രസില്‍ പുനഃസംഘടന കൂട്ടയടി അടുത്തമാസം തുടങ്ങും. ഒഴിവ് വരുന്ന കോര്‍പറേഷന്‍, ബോര്‍ഡ് അധ്യക്ഷ സ്ഥാനത്തേക്ക് തിരഞ്ഞെടുപ്പില്‍ മത്സരിച്ച് പരാജയപ്പെട്ടവരെ പരിഗണിക്കില്ലത്രേ!

സംശയം: മത്സരിച്ചവരുടെയും പരാജയപ്പെട്ടവരുടെയും ഭാര്യമാരായാല്‍ കുഴപ്പമുണ്ടോ സര്‍ ?

വക്കം പുരുഷോത്തമന്‍

പരിഹാസം

Country:

Default Home Page

Authors:

Gossip Mongers