പോളിറ്റ് ബ്യൂറോ - വിജയനും അച്യുതനും

News Desk — Sun, 15 Apr 2012 09:22:57 +0000

വിഎസ് അച്യുതാനന്ദനെ പീബിയിലെടുക്കുമോ ഇല്ലയോ എന്നത് കൊടുംചര്‍ച്ചയായിരുന്നു സിപിഎം സമ്മേളനത്തിനു മുന്‍പ്. എടുക്കാഞ്ഞപ്പോള്‍ അതും എടുത്തിരുന്നെങ്കില്‍ അതും കൊയ്ത്താകുക മലയാളമനോരമയ്ക്കാണല്ലോ. സമ്മേളനത്തിനുമുന്‍പ് ജനറല്‍ സെക്രട്ടറി ഒരു മാന്യനാണ് എന്ന് നിന്ദാസ്തുതി അലങ്കാരം ഉപയോഗിച്ച് അച്യുതാനന്ദന്‍ ആവേശം ആളിക്കത്തിക്കുകയും ചെയ്തു.

ഏതായാലും സഖാവ് വിഎസ് പീബീയില്‍ ഇടംനേടിയില്ല. പകരം ബേബിസഖാവ് പുതുതായി ഒരിടം നേടി. സമ്മേളനം അവസാനിക്കുംമുന്‍പ് മടങ്ങിക്കൊണ്ട് വീഎസ് ചുമ്മാ ഒരു അസ്വാരസ്യം സൃഷ്ടിക്കുകയും ചെയ്തു. സമ്മേളനത്തിനും കല്യാണത്തിനുമൊന്നും വരാന്‍ കയ്യൂല്ല, വീട്ടില്‍ അലക്കാനാളുവരും എന്നു പറഞ്ഞൊഴിഞ്ഞ ബുദ്ധദേവനാണ് ഇന്ദിരാഗാന്ധി പറഞ്ഞപോലെ, ഒടുക്കം നന്നായി ചിരിച്ചത്. ബൊസു രണ്ടാമന്‍ പൊഖ്റാനിലെ ബുദ്ധനായി ചിരിച്ചപ്പോള്‍ വീഎസ് കാബൂളിലെ ബുദ്ധനെപ്പോലെ കണ്ണീരോടെ നിലംപൊത്തി.

ഇവിടെ വിഷയം അതല്ല. യഥാര്‍ത്ഥത്തില്‍ വിഎസ് ആര്‍ക്കുവേണ്ടിയാണ് ഈ ആഗ്രഹങ്ങളൊക്കെ ഇനിയും മനസ്സില്‍ സൂക്ഷിക്കുന്നത്. പൊതുവെ മക്കള്‍ രാഷ്ട്രീയത്തെ പ്രോത്സാഹിപ്പിക്കുന്നവരല്ല ഇടതന്മാര്‍. നേതാക്കന്മാര്‍ ഓങ്ങിയാലും അടിവാങ്ങാന്‍ അണികള്‍നില്‍ക്കില്ലെന്നത് ചരിത്രം നമ്മെയും ഇഎംഎസ്സിനെയും പഠിപ്പിച്ച പാഠം. എന്നിട്ടും അങ്ങനെ മക്കള്‍ക്കായി മോഹിക്കുന്നവരുണ്ടെങ്കിലും വിഎസിനെയും മകനെയും അക്കൂട്ടത്തില്‍പ്പെടുത്തേണ്ട. കാരണം, അദ്ദേഹത്തിന്റെ മകന്‍ അരുണ്‍കുമാറിന് രാഷ്ട്രീയത്തിലല്ല, ധനതത്വശാസ്ത്രത്തിലാണ് കമ്പവും തേനിയും മറ്റും.

പിന്നെ, സന്താനങ്ങളെന്ന് ഒരു രാഷ്ട്രീയപരമോന്നതനേതാവു കരുതുന്നത് തന്റെയൊപ്പം നില്‍ക്കുന്നവരെയാണ്. അങ്ങനെ സ്ഥിരമായി തന്റെയൊപ്പം നില്‍ക്കുന്നവരൊന്നും വീയെസ്സിനില്ല. ഇന്നുനീ നാളെ മറ്റൊരു നീ എന്നതാണ്, അഥവാ, ഇന്നു ഞാന്‍, നാളെയും ഞാന്‍ എന്നതു മാത്രമാണ് ഇദ്ദേഹത്തിന്റെ തത്വശാസ്ത്രം. പോരാളിയല്ലാതെ തേരാളിയില്ലാത്തൊരു തേരാണിത്.

അങ്ങനെയൊക്കെയുള്ളപ്പോള്‍, ഈ നവതികാലത്ത്, ഒരു നവദര്‍ശനം കൈക്കൊണ്ടുകൂടേ ഈ നേതാവിന് എന്നതാണ് ചിന്തനീയമായ വിഷയം. അതു നമ്മള്‍ ചിന്തിച്ചിട്ടെന്തുകാര്യം എന്നതു വേറേ തമാശ. എന്നാലും ചിന്തിക്കുകയാണ്. വീയെസ് ഒരല്പം ഉയരാന്‍ തീരുമാനിച്ചാല്‍, മറ്റാരെക്കാളും മാന്യനായി മാറില്ലേ അദ്ദേഹം. തന്നെ, പോളിറ്റ് ബ്യൂറോയിലേക്ക് പരിഗണിക്കേണ്ട, ചെറുപ്പക്കാരായ നേതാക്കളെയാണു പരിഗണിക്കേണ്ടത് എന്ന് സമ്മേളനത്തിനു മുന്‍പ് അദ്ദേഹം ഒരു കാച്ചുകാച്ചിയിരുന്നെങ്കില്‍ അദ്ദേഹത്തെ പൊളൈറ്റ് ബ്യൂറോ ആയി ജനം കണ്ടിരുന്നേനേ. ഏജന്റുമാര്‍ വിചാരിച്ചിട്ട് പൂട്ടിക്കാന്‍ പറ്റാത്ത മനോരമ അന്നേക്കന്ന് ഇനിയൊന്നും ചെയ്യാനില്ലെന്നു കണ്ട് സ്വയം പൂട്ടി മുദ്രവച്ച് താക്കോല്‍ മാമ്മന്‍ മാപ്പിളയെ ഉണ്ടാക്കിയ മക്കള്‍തന്നെ നേരിട്ട് സിപി രാമസ്വാമി അയ്യരുടെ ഓപ്പീസില്‍ എത്തിച്ചിരുന്നേനേ.

മുംബൈ ഇന്ത്യന്‍സിന്റെയും പണ്ട് ഇന്ത്യന്‍സിന്റെ തന്നെയും ക്യാപ്റ്റന്‍ സ്ഥാനം രാജിവച്ച സച്ചിന്‍ കാട്ടുന്ന യുക്തിയും ബുദ്ധിഭദ്രതയുമെങ്കിലും വീയെസിനു കാട്ടിക്കൂടേ എന്നതാണു ചോദ്യം. അദ്ദേഹത്തിന്റെ വാക്കും പ്രവൃത്തിയും തമ്മിലുള്ള അകലങ്ങള്‍ കഴിഞ്ഞ ഭരണലബ്ധി മുതല്‍ ആളുകള്‍ പതിയെ മനസ്സിലാക്കിത്തുടങ്ങിയതാണ്. അതിനാല്‍, ഇനിയും ഈ വൈകിയ വേളയില്‍ ഒരു മര്‍മയുദ്ധത്തിനു നില്‍ക്കാതെ, ശരിയായ ധര്‍മയുദ്ധത്തിന് തുടക്കമിടാന്‍ അദ്ദേഹത്തിന് ആര്‍ജവം കാട്ടിക്കൂടേ. സ്ഥാനങ്ങളും മറ്റും വിട്ടൊഴിഞ്ഞ്, വിഭാഗീയത പാടില്ലെന്നുള്ള ആഹ്വാനവുമായി, ഔദ്യോഗികവിഭാഗത്തെ അംഗീകരിച്ച്, എന്നാല്‍, അവര്‍ക്കിടയിലെ ഒരു തെറ്റുതിരുത്തല്‍ ശക്തിയായി അദ്ദേഹത്തിനു പ്രവര്‍ത്തിക്കാനാവില്ലേ. അമ്പുകുറേ എയ്തെങ്കിലും അരികളെ അരിഞ്ഞെങ്കിലും, ഭഗവദ്ഗീത എഴുതി, എഡിഷനുകളോട് എഡിഷനുകള്‍ ഇറക്കി, റോയല്‍റ്റിയും പ്രശസ്തിയും നേടിയതും യുദ്ധം നയിച്ചതും വീരനായ വിജയനല്ല, തന്ത്രജ്ഞനായ അച്യുതനത്രേ....

പിണറായി വിജയനും വി എസ് അച്യുതാനന്ദനും

കേരളം

Country:

Default Home Page

Authors:

News Desk

malayal.am

പോളിറ്റ് ബ്യൂറോ - വിജയനും അച്യുതനും