#കപടവാർത്ത

വൈദ്യശാസ്ത്ര നോബല്‍ കേരളത്തിലേക്ക്

പൂജപ്പുര: വൈദ്യശാസ്ത്രരംഗത്തെ മൌലിക നേട്ടത്തിനുള്ള നൊബേൽ സമ്മാനം ഇത്തവണ കേരളത്തിലേക്ക് വരാനുള്ള സാധ്യത തള്ളിക്കളയാനാവില്ലെന്ന് ഈ മേഖലയിലെ വിദഗ്ദർ സൂചിപ്പിച്ചു. ആധുനിക വൈദ്യശാസ്ത്രത്തിനു പ്രഹേളികയായിരുന്ന ഡിസിലിപിലിഡെമിയ, ഹീമോക്രോമോറ്റോസിസ് വിത്ത് ക്രോണിക്ക് ലിവര്‍ ഡിസീസസ്, ഡയബറ്റിക് മെലിറ്റസ്, ഹിയാറ്റസ് ഹെര്‍മിയ വിത്ത് ജര്‍ഡ്, സര്‍വിക്കല്‍ സ്‌പോണ്ടിലോസിസ്, അഡ്വാൻസ്ഡ് കണ്ടക്ഷന്‍ സിസ്റ്റം ഡിസോര്‍ഡര്‍, റൈറ്റ് ബണ്ടില്‍ ബ്രാഞ്ച് ബ്ലോക്ക് വിത്ത് പ്രീമെച്ചര്‍ വെന്‍ട്രിക്കുലാര്‍ കോൺട്രാക്ഷന്‍സ്, ഡയബറ്റിക്കല്‍ പെരിഫറല്‍ ന്യൂറോപ്പതി എന്നീ രോഗങ്ങൾക്ക് ഫലപ്രദമായ ചികിത്സ കണ്ടുപിടിച്ചത് നൊബല്‍ സമ്മാനത്തിനര്‍ഹമായ മൌലികമായ കണ്ടെത്തലാണെന്ന് വിദഗ്ദര്‍ പറഞ്ഞു.

ഇതുവരെയായും ഈ രോഗങ്ങള്‍ക്ക് പ്രത്യേകം പ്രത്യേകം ചികിത്സയായിരുന്നു ലോകത്തിലെമ്പാടും ഡോക്ടര്‍മാര്‍ സ്വീകരിച്ചു പോന്നിരുന്നത്. എന്നാല്‍ കേരളത്തിലെ ഉമ്മന്‍ ചാണ്ടി സര്‍ക്കാര്‍ ഒരു ഒറ്റ ഉത്തരവിലൂടെ ഈ രോഗങ്ങള്‍ക്കുള്ള ഒറ്റമൂലി കണ്ടെത്തിയിരിക്കുകയാണ്. ഇത്തരം രോഗങ്ങള്‍ മൂലം ദുരിതമനുഭവിക്കുന്ന ലോകമെമ്പാടുമുള്ള ആയിരക്കണക്കിനു രോഗികള്‍ക്ക് ഈ ഒറ്റമൂലി ആശ്വാസം പകരുമെന്നുമാണ് വൈദ്യശാസ്ത്രരംഗത്തെ വിദഗ്ദ്ധരുടെ വിലയിരുത്തല്‍.

ബഹുരാഷ്ട്രകുത്തകകള്‍ ഈ നേട്ടം സ്വന്തമാക്കുന്നതിനു മുന്‍പേ കേരള സര്‍ക്കാര്‍ ഈ ഒറ്റമൂലിക്ക് പേറ്റന്റെടുക്കണം എന്നും അഭിപ്രായമുയര്‍ന്നിട്ടുണ്ട്.