#കപടവാർത്ത

ആത്മഹത്യാ മുനമ്പില്‍ മറ്റൊരു കൂട്ടം കൃഷിക്കാര്‍

ക്രൂഡ് ഓയിൽ‌പുരം : വയനാട്ടില്‍ ആത്മഹത്യ ചെയ്ത ഒന്നോ രണ്ടോ കർഷകരെ സംബന്ധിച്ച വാര്‍ത്തകൾ പത്രങ്ങളിലും, ചാനല്‍ ചര്‍ച്ചകളിലും, സൈബര്‍ സ്പേസിലും ഇടം നേടുമ്പോള്‍ ആത്മഹത്യയുടെ വക്കത്തെത്തി നില്‍ക്കുന്ന മറ്റൊരു കൂട്ടം കൃഷിക്കാരുടെ കദനകഥ എവിടെയും ഇടം തേടാതെ പോകുന്നു. എന്ന് മാത്രമല്ല, പലപ്പോഴും ഇവര്‍ പഴി ചാരപ്പെടുകയും ചെയ്യുന്നു. കോര്‍പ്പറേറ്റ് വിരോധത്തിന്റേതായ ഈ കാലഘട്ടത്തില്‍ കോര്‍പ്പറേറ്റ് ആയിരിക്കുക എന്നത് തികഞ്ഞ വിപ്ലവപ്രവര്‍ത്തനമാണെന്ന് ജോര്‍ജ്ജ് ഓര്‍വെല്ലിനെ ഉദ്ധരിച്ച് കേഴുകയാണ് ഈ പാവങ്ങള്‍..

“ ഹമേ റൊട്ടി, കപടേ ഔര്‍ മക്കാൻ ചാഹിയേ. ഹമാരാ ഇലക്ട്രിസിറ്റി ബില്‍ ബഹൂത് ബഡാ ഹേ. പൈസേ നഹീ മിലേ തോം ഹം ക്യാ കരൂംഗാ? ആത്മഹത്യാ കര്‍നീ പടേഗീ ഗൂ.. (ഞങ്ങളും ദിവസേന റൊട്ടിയും പാലും മക്കാനിയുമാണ് കഴിക്കുന്നത്. ഞങ്ങടെ ഇലക്ട്രിസിറ്റി ബില്‍ കണ്ടാല്‍ നിന്റെയൊക്കെ അണ്ടം പൊളിയും. പൈസ കിട്ടീല്ലെങ്കിപ്പിന്നെ നിനക്കൊക്കെ പോയിച്ചത്താ മതി. ഞങ്ങടെ കാര്യം അങ്ങനാണോ?)," മുംബൈയിലെ പാവപ്പെട്ട പെട്രോള്‍ കര്‍ഷകനായ മുകേഷ് അംബാനി ചോദിക്കുന്നു. 27 നിലക്കെട്ടിടത്തിന്റെ ഇലക്ട്രിസിറ്റി ബില്‍, വെള്ളക്കരം, തന്റെ വാഹനങ്ങളുടെ റോഡ് ടാക്സ്, അഞ്ചു നക്ഷത്രത്തിലെ ഭക്ഷണത്തിനുള്ള വക..ഇതൊക്കെ എങ്ങിനെ കണ്ടെത്തുമെന്ന് അറിയാതെ വിലപിക്കുകയാണ് അംബാനി.

അപ്പനപ്പാപ്പനപ്പൂപ്പന്മാരുടെ കാലത്ത് കുടിയേറിയതാണ് അംബാനി കുടുംബം. പെട്രോകൊതുകുകളെയും മലമ്പനിയെയും കൂസാതെ വെട്ടിപ്പിടിച്ച ഇത്തിരി പെട്രോള്‍ പാടങ്ങളാണ് ആകെയുള്ള സ്വത്ത്. പെട്രോളിയം ഉല്പന്നങ്ങള്‍ക്ക് ന്യായമായ വില കിട്ടാതെ തങ്ങള്‍ എങ്ങനെ രണ്ടറ്റവും കൂട്ടിമുട്ടിക്കും എന്ന് അദ്ദേഹം ചോദിക്കുന്നു.

മറ്റുള്ള സാധനങ്ങളുടെ വില കയറുന്നതിനനുസരിച്ച് പെട്രോളിനു വില ലഭിക്കുന്നില്ല. പെട്ടെന്ന് ബാഷ്പീകരിച്ചു പോകുന്ന സ്വഭാവമുള്ള പെട്രോളിയം ഉല്പന്നങ്ങള്‍ തങ്ങളെ കടക്കാരാക്കുന്നു. കൂടുന്ന വിലയുടെ തീരെ ചെറിയൊരു ശതമാനം മാത്രമേ പെട്രോളിയം കര്‍ഷകര്‍ക്ക് ലഭിക്കുന്നുള്ളൂ എന്നും ബാക്കിയൊക്കെ നികുതിയും ടാക്സുമായി പോകുകയാണെന്നും അദ്ദേഹം പരിതപിക്കുന്നു. ലിറ്ററിനു 100 രൂപയെങ്കിലും താങ്ങുവില ലഭിക്കാത്ത പക്ഷം കൃഷി ഉപേക്ഷിക്കേണ്ടി വരുമെന്ന് അദ്ദേഹം പറഞ്ഞു.