#കപടവാർത്ത

മമതാ ബാനെര്‍ജിക്ക് എതിരേ ഗൂഢാലോചന

ബംഗാൾ മുഖ്യമന്ത്രി മമതാ ബാനെർജിയെ വധിക്കുവാനുള്ള ഗൂഢാലോചന നടത്തിയ പത്തു പേരെ എഫ്.ബി.ഐ കസ്റ്റഡിയിലെടുത്തു. അറസ്റ്റിലായവരെല്ലാം അവരുടെ മാവോയിസ്റ്റ്-സി.പി.എം ബന്ധം സമ്മതിച്ചിട്ടുണ്ട്. നേരത്തെ മാര്‍ക്സിസ്റ്റ്-മാവോയിസ്റ്റുകള്‍ തന്നെ വധിക്കുവനായി പാകിസ്താൻ, വെനസുവേല, ഉത്തര കൊറിയ, ഹംഗറി എന്നീ രാജ്യങ്ങളുമായി ചേര്‍ന്ന് സഖ്യമുണ്ടാക്കുകയാണെന്ന് വാഷിങ്ടൺ പോസ്റ്റിനു നൽകിയ അഭിമുഖത്തില്‍ മമത ആരോപിച്ചിരുന്നു. 'മരിക്കാന്‍ ഭയമില്ല, എന്നാല്‍ ജനങ്ങളെ വഞ്ചിക്കാനാവില്ല' എന്ന മമതയുടെ പ്രസ്താവന ജനങ്ങളെ ഇളക്കിമറിച്ചിരുന്നു. എന്നാല്‍ ഈ ആരോപണങ്ങളെ പരിഹസിച്ച് തള്ളിക്കളയുകയായിരുന്നു സി.പി.എം കേന്ദ്രം. 

പാകിസ്താന്‍, വെനസുവേല, കൊറിയ, ഹംഗറി എന്നിവിടങ്ങളില്‍ നിന്നായി മലയാളി ഉള്‍പ്പടെ പത്തു പേരെയാണ് കസ്റ്റഡിയിലെടുത്തത്. തങ്ങളുടെ ആകെയുള്ള കോട്ടകളില്‍ കേരളം അങ്ങോട്ടൊ ഇങ്ങോട്ടോ എന്നറിയാതെയിരിക്കുന്ന സാഹചര്യത്തില്‍ ഇനി ബംഗാളിന്റെ കാര്യത്തിലൊരു തീരുമാനമെടുത്തെ പറ്റൂ എന്നു കരുതിയാണത്രേ സി.പി.എം ഇങ്ങനെ ചിന്തിച്ചത്. അതിനായി അവര്‍ മാവോയിസ്റ്റുകളുടെ സഹായം തേടി. തങ്ങളുടെ കൈകളാണിതിനു പിന്നിലെന്ന് അറിയേണ്ടയെന്നു കരുതിയാണ് ഇന്ത്യക്കു പുറത്തുള്ള വഴികള്‍ ആരാഞ്ഞത്. അങ്ങനെ ഈ നാലു രാഷ്ട്രത്തലവന്മാരുമായി ചര്‍ച്ച നടത്തി തീരുമാനമെടുക്കുകയായിരുന്നു. ഇന്ത്യയുടെ പ്രധനമന്ത്രിപദത്തില്‍ ഉടനേയെത്തുമെന്നും, അങ്ങനെ തങ്ങളുടെ വലിയ ഭീഷണിയായി മാറുമെന്നുമാണ് മമതെയെ കുറിച്ച് പാകിസ്താനുള്‍പ്പടെയുള്ളവരുടെ ധാരണ. അതിനാല്‍ അവരും പൂര്‍ണ്ണ പിന്തുണയേകി.

കടുത്ത സുരക്ഷ നിലനില്‍ക്കേ അതു മറികടന്നു ആക്രമണം നടത്തുക എന്നതു പ്രയാസമാണെന്നിരിക്കേയാണ് മാര്‍ക്സിസ്റ്റ്-മാവോയിസ്റ്റ് സഖ്യം ആ ദൗത്യം സഖ്യരാഷ്ട്രങ്ങളെ ഏല്പിച്ചത്. എന്നാല്‍   ആയുധനിര്‍മ്മാണം, പ്ലാനിങ്ങ് തുടങ്ങിയ കാര്യങ്ങളിലെല്ലാം മികച്ചു നില്‍ക്കുന്നത് ക്രിമിനലുകള്‍ തന്നെയാണെന്നറിയാവുന്ന ഭരണാധികാരികള്‍ അതാതു രാജ്യത്തെ പ്രമുഖ കുറ്റവാളികളെ തന്നെ നോട്ടമിട്ടു. അറസ്റ്റിലായവരില്‍ ഒന്‍പതു പേരും ഉന്നതരുമായി ബന്ധമുള്ളവരാണെന്ന് തെളിഞ്ഞിട്ടുണ്ട്. എന്നാല്‍ ഈ ജോലികളിലൊക്കെ മികച്ച രീതിയില്‍ ചെയ്യുവാനായാണ് കേരളത്തില്‍ നിന്നും പരിചയസമ്പന്നനായ ഒരു പാര്‍ട്ടിപ്രവര്‍ത്തകനെ ഇവര്‍ കണ്ടത്. പാര്‍ട്ടിയെ കുറിച്ച് പഠിക്കാനെന്ന വ്യാജേന ഹംഗറിയിലേക്ക് പറന്ന ഇയാളുടെ പിന്നാലെയെത്തിയാണ് എഫ്.ബി.ഐ ഇവരെ കുടുക്കിയത്.  തന്റെ ഹംഗറി യാത്ര ഇയാള്‍ ഫേസ്ബുക്കില്‍ അപ്പ്ഡേറ്റ് ചെയ്തു. അത് കണ്ടറിഞ്ഞവര്‍ ഫേസ്ബുക്കില്‍ വന്‍ ചര്‍ച്ചകള്‍ നടത്തിയും, ഇയാളെക്കുറിച്ചുള്ള ചിത്രങ്ങള്‍ ഷെയര്‍ ചെയ്തും പ്രതികരിച്ചപ്പോഴാണ് രഹസ്യാന്വേഷണ വിഭാഗം ഇയാളെ നോട്ടമിട്ടതത്രേ.

ഒരു സംസ്ഥാന മുഖ്യമന്ത്രിയായ തന്നെ വധിക്കാന്‍ നടന്ന നീക്കങ്ങള്‍ കണ്ടെത്താന്‍ കഴിയാത്തത് ഇന്ത്യയുടെ കേന്ദ്രസേനയുടെ പരാജയമാണെന്നും, അതിന്റെ ഉത്തരവാദിത്തം ഏറ്റെടുത്ത് പ്രതിരോധമന്ത്രി ഏ.കെ.ആന്റണി രാജിവയ്ക്കണമെന്നും പകരം പ്രസിഡന്റ് സ്ഥാനം ലഭിക്കാത്ത മീരാകുമാറിനെ ആ ചുമതല ഏല്പ്പിക്കണമെന്നും ആവശ്യപ്പെട്ട് മമത ഇറ്റലിയിലേക്ക് കത്തയച്ചു. വെസ്റ്റ് ബംഗാളിലെ അമേരിക്കന്‍ നിക്ഷേപങ്ങളെക്കുറിച്ച് സംസാരിച്ചപ്പോള്‍ മമത വികാരധീനയായി. ബംഗാളില്‍ നിക്ഷേപാനുമതി നല്‍കിയതിന്റെ സ്നേഹമാണ് അമേരിക്ക കാണിച്ചതെന്നും, അവര്‍ക്കാണ് ഏറ്റവും നന്ദിയുള്ളതെന്നും മമത പറഞ്ഞു. അമേരിക്കന്‍ ഏജന്‍സി തന്റെ ജീവന്റെ കാര്യത്തില്‍ കാണിക്കുന്ന ശ്രദ്ധ അമേരിക്കയുടെ നിക്ഷേപങ്ങളില്‍ താനും കാണിക്കുമെന്നവര്‍ പറഞ്ഞു. 'ഞങ്ങള്‍ നിങ്ങളുടെ  ഹൃദയത്തെ സ്പര്‍ശിക്കും' എന്നു അമേരിക്കയോടു പറഞ്ഞ മമത, 'പക്ഷേ സാമ്പത്തികമായിട്ടയിരിക്കില്ല' എന്നു കൂടി കൂട്ടിച്ചേര്‍ത്തു.